ୱାଶିଂଟନ: ଆମେରିକାରେ କୋରୋନାର ପ୍ରଭାବ କମିନଥିବା ବେଳେ ସାମ୍ନାକୁ ଆସିଛି ଦେଶରେ କୋରୋନାର ମହଙ୍ଗା ଚିକିତ୍ସାର ଅସଲ ରୂପ । ନିକଟରେ ଆମେରିକାର କୋଲୋରୋଡୋ ରାଜ୍ୟର ଜନୈକ ଆକ୍ରାନ୍ତଙ୍କ ମେଡିକାଲ ବିଲ ଉଡାଇଛି ଅନେକଙ୍କ ନିଦ । ଆକ୍ରାନ୍ତ ଜଣଙ୍କ ଜଣେ ହାଇସ୍କୁଲ ଶିକ୍ଷକ ଥିବା ବେଳେ ତାଙ୍କର ଚିକିତ୍ସାର ବିଲ ଆସିଥିଲା 1.5 ମିଲିଅନ ଡଲାର ଅର୍ଥାତ 11,32,84,800 ଲକ୍ଷ ଟଙ୍କା । ଯାହାକୁ ଦେଖିବା ପରେ ଉଡିଯାଇଛି ତାଙ୍କ ହୋସ ।
ସମ୍ପୃକ୍ତ ବ୍ୟକ୍ତି ଜଣଙ୍କ ହେଉଛନ୍ତି ସେଣ୍ଟେନିଆଲ ହାଇ ସ୍କୁଲର ଶିକ୍ଷକ ରବର୍ଟ ଡେନିସ । ସେ କୋରୋନାରେ ଆକ୍ରାନ୍ତ ହେବା ପରେ ଡେନଭର୍ସ ସ୍କାଏ ରିଜ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି ହୋଇଥିଲେ । ରବର୍ଟଙ୍କ ସ୍ବାସ୍ଥ୍ୟାବସ୍ଥା ଗମ୍ଭୀର ରହିଥିବାରୁ ତାଙ୍କୁ ଦୁଇ ସପ୍ତାହ ପର୍ଯ୍ୟନ୍ତ ଭେଣ୍ଟିଲେଟରରେ ରଖାଯାଇଥିଲା । ହେଲେ ଏବେ ସୁସ୍ଥ ହେବା ପରେ ତାଙ୍କର ମେଡିକାଲ ଖର୍ଚ୍ଚ 1.5 ମିଲିଅନ ଡଲାର ଅର୍ଥାତ 11,32,84,800 ଲକ୍ଷ ଟଙ୍କା ଆସିଥିବା ଦେଖି ତାଙ୍କ ପାଦ ତଳୁ ଭୂଇଁ ଖସିଯାଇଛି ।
ଆପଣ ଜାଣିଲେ ଆହୁରି ଆଶ୍ଚର୍ଯ ହେବେ କି ଏହା କେବଳ ଦୁଇ ସପ୍ତାହ ଭେଣ୍ଟିଲେଟରରେ ରହିବା ଖର୍ଚ୍ଚ । ଏହି ବିଲରୁ ରବର୍ଟଙ୍କ ସ୍ତ୍ରୀଙ୍କୁ ଏମର୍ଜେନ୍ସି ୱାର୍ଡରେ ଭର୍ତ୍ତି ଖର୍ଚ୍ଚ ଓ ତିନି ସପ୍ତାହ ପର୍ଯ୍ୟନ୍ତ ରବର୍ଟଙ୍କର ସ୍ପାଲ୍ଡିଂ ରିହାବିଲିଟେସନ ହସ୍ପିଟାଲରେ ଭର୍ତ୍ତି ଖର୍ଚ୍ଚକୁ ସାମିଲ କରାଯାଇନଥିଲା । ତେବେ ଏସମସ୍ତ ଖର୍ଚ୍ଚକୁ ମିଶାଇଲେ ଡେନିସ ଦମ୍ପତିଙ୍କ ମୋଟ ଖର୍ଚ୍ଚ 1.5 ମିଲିୟନ ଡଲାର ହୋଇଥିବା ହସ୍ପିଟାଲ କର୍ତ୍ତୃପକ୍ଷ ସୂଚନା ଦେଇଛନ୍ତି ।
ଦମ୍ପତିଙ୍କର ସ୍ବାସ୍ଥ୍ୟ ବୀମା ରହିଥିବା ବେଳେ ଏହି ବୀମାରାଶିରୁ ସେମାନଙ୍କ ଖର୍ଚ୍ଚ ବହନ ହେବ ବୋଲି ସେମାନେ ଆଶା ରଖିଛନ୍ତି ।
@IANS
