ୱାଶିଂଟନ: ଆମେରିକାରେ କ୍ଷଣିକ ପାଇଁ ସାମାନ୍ୟ ଥମିଥିବା କୋରୋନା ପ୍ରଳୟ ପୁଣି ଭୟଙ୍କର ରୂପ ନେବାରେ ଲାଗିଛି । ଏହାକୁ ନେଇ ବର୍ତ୍ତମାନ ବିଭିନ୍ନ ପ୍ରକାର ମତ ସାମ୍ନାକୁ ଆସୁଥିବା ବେଳେ ସଂକ୍ରମଣ ଚିକିତ୍ସାରେ ଆମେରିକୀୟ ଏକ୍ସପର୍ଟ ଆନ୍ଥୋନୀ ଫୌସି ଦେଇଥିବା ବୟାନ ଏବେ ସମସ୍ତଙ୍କୁ ଚକିତ କରିଛି । ତାଙ୍କ କହିବା ଅନୁଯାୟୀ ଯଦି ବର୍ତ୍ତମାନ ସ୍ଥିତି ନିୟନ୍ତ୍ରଣକୁ ନଆସେ ତେବେ ଆଗକୁ ସ୍ଥିତି ଆହୁରି ଭୟଙ୍କର ହୋଇପାରେ ।
ସେ ଏନେଇ ଗଣମାଧ୍ୟମକୁ ସୂଚନା ଦେଇ କହିଥିଲେ କି ଅନ୍ୟ ଦେଶ ତୁଳନାରେ ଆମେରିକା ସବୁଠାରୁ ଅଧିକ ପ୍ରଭାବିତ ହୋଇଛି । କେବଳ ଆକ୍ରାନ୍ତ ସଂଖ୍ୟା ନୁହେଁ, ମୃତ୍ୟୁ ସଂଖ୍ୟାରେ ମଧ୍ୟ ଦେଶ ପ୍ରଥମ ସ୍ଥାନ ଅଧିକାର କରିଛି । ଯାହା ଆମେରିକାବାସୀଙ୍କ ଚିନ୍ତା ଦ୍ବିଗୁଣିତ କରିଛି । ତେବେ ଏପରି ସ୍ଥିତି ପାଇଁ ମୁଖ୍ୟ ଦାୟୀ ହେଉଛି ଅର୍ଥନୀତିକୁ ସୁଦୃଢ କରିବାକୁ ଯାଇ ସ୍ଥିତି ଅଣାୟତ୍ତ ହେବା ସତ୍ତ୍ବେ କଟକଣା କୋହଳ ପ୍ରକ୍ରିୟା । ଏହା ଦ୍ବାରା ଦେଶର ବିଭିନ୍ନ ରାଜ୍ୟରେ କୋରୋନା ସଂକ୍ରମଣର ନୂଆ ନୂଆ ରେକର୍ଡ ସାମ୍ନାକୁ ଆସୁଛି ।
ତେଣୁ ପରିସ୍ଥିତିକୁ ସୁଧାରିବାକୁ ହେଲେ ପ୍ରଥମେ ନିୟମ କଡାକଡି କରିବା ପାଇଁ ଆନ୍ଥୋନୀ ପରାମର୍ଶ ଦେଇଛନ୍ତି । ବର୍ତ୍ତମାନ ସୁଦ୍ଧା ଆମେରିକାରେ 2,685,806ଜଣ ଆକ୍ରାନ୍ତ ରହିଥିବା ବେଳେ ମୃତ୍ୟୁ ସଂଖ୍ୟା 128,061ରେ ପହଞ୍ଚିଛି । ଆନ୍ଥୋନୀ ଏହି ସଂଖ୍ୟାକୁ ନଜରରେ ରଖି କହିଥିଲେ କି ୟୁରୋପିଆନ ରାଷ୍ଟ୍ରମାନଙ୍କରେ ଲକଡାଉନରେ ଦେଶର 97 ପ୍ରତିଶତ ବନ୍ଦ ରହିଥିବାରୁ ସେମାନେ ସଂକ୍ରମଣକୁ ସହଜରେ ନିୟନ୍ତ୍ରଣ କରିପାରିଥିଲେ । ହେଲେ ଆମେରିକାରେ ଲକଡାଉନରେ ଦେଶର ମାତ୍ର 50 ପ୍ରତିଶତରୁ କମ୍ ଅଂଶ ବନ୍ଦ ରହିଥିବାରୁ ଦିନକୁ ଦିନ ସ୍ଥିତି ବିଗିଡିବାରେ ଲାଗିଛି ।
ତେଣୁ ଯଦି ଦେଶରେ ନିୟମ ପ୍ରତି ଲୋକଙ୍କ ଓ ସରକାରଙ୍କ ଖାମଖିଆଲି ନୀତି ଏପରି ଜାରି ରୁହେ ତେବେ ଦେଶରେ ଦିନକୁ 1 ଲକ୍ଷ ପରି ମାମଲା ସାମ୍ନାକୁ ଆସିବ ଏଥିରେ ସନ୍ଦେହ ନାହିଁ ବୋଲି ମଧ୍ୟ ସେ ପ୍ରକାଶ କରିଛନ୍ତି ।
@IANS
