ସିକାଗୋ: ଏବେ ବି ଆମେରିକାରେ କୁହୁଳିଛି ଜାତିଆଣ ବିରୋଧୀ ଆନ୍ଦୋଳନର ନିଆଁ । ଏମିତିରେ କୋରୋନା ସଂକ୍ରମଣ ସତ୍ତ୍ବେ ବିକ୍ଷୋଭକାରୀ ଆନ୍ଦୋଳନ ଜାରି ରଖିଥିବା ବେଳେ ସିକାଗୋ ସହରରେ ଥିବା କ୍ରିଷ୍ଟୋଫର କୋଲମ୍ବସଙ୍କ ଦୁଇଟି ପ୍ରତିମୂର୍ତ୍ତୀକୁ ଅସ୍ଥାୟୀ ଭାବେ ହଟାଇ ଦିଆଯାଇଛି । ଏହା ପଛରେ କାରଣ ହେଉଛି ବିକ୍ଷୋଭକାରୀମାନେ ଏହି ପ୍ରତିମୂର୍ତ୍ତୀ ଦ୍ବୟ ମଧ୍ୟରୁ ଗୋଟିଏକୁ ଗତ ସପ୍ତାହ ଭାଙ୍ଗିବା ପାଇଁ ଉଦ୍ୟମ କରିଥିଲେ ।
ଏନେଇ ବିଧିବଦ୍ଧ ଭାବେ ଏକ ବିଜ୍ଞପ୍ତି ପ୍ରକାଶ କରି ସୂଚନା ଦେଇଛନ୍ତି ସିକାଗୋ ଅଧିକାରୀବୃନ୍ଦ । ଏଥିରେ ମେୟର ଲୋରି ଲାଇଟଫୁଟ କହିଛନ୍ତି କି ସହରର ଦୁଇଟି ସ୍ଥାନ ଯଥା ଗ୍ରାଣ୍ଟ ପାର୍କ ଓ ଆରିଗୋ ପାର୍କରେ ରହିଛି କୋଲମ୍ବସଙ୍କ ପ୍ରତିମୂର୍ତ୍ତୀ । ହେଲେ ବିକ୍ଷୋଭକାରୀଙ୍କ ହିଂସାରୁ ଉଭୟ ପ୍ରତିମୂର୍ତ୍ତୀକୁ ସୁରକ୍ଷା ଦେବାକୁ ଯାଇ ଉଭୟକୁ ଅନିର୍ଦ୍ଧିଷ୍ଟ କାଳ ପାଇଁ ଯଥା ସ୍ଥାନରୁ ହଟାଇ ଦିଆଯାଇଛି । ଆଗାମୀ ନୋଟିସ ପରେ ହିଁ ପରବର୍ତ୍ତୀ ପଦକ୍ଷେପ ନିଆଯିବା ନେଇ ସେ ସ୍ପଷ୍ଟ କରିଛନ୍ତି ।
ସେପଟେ ଦୀର୍ଘ ଦିନ ପରେ ପୁଣି ବିକ୍ଷୋଭକାରୀଙ୍କ କ୍ରୋଧରୁ ବଞ୍ଚାଇବା ପାଇଁ କିଛି ପ୍ରତିମୂର୍ତ୍ତୀ ହଟାଯିବାର ପଦକ୍ଷେପ ନିଆଯାଇଥିବା ମଧ୍ୟ ସେ ପ୍ରକାଶ କରିଛନ୍ତି । ଏସବୁ ପଛରେ ମେ’ 25ରେ ଜର୍ଜ ଫ୍ଲଏଡଙ୍କ ପୋଲିସ ହେପାଜତରେ ମୃତ୍ୟୁ ନିଆଁ ଦାୟୀ ବୋଲି ମଧ୍ୟ ସେ କହିଛନ୍ତି । ଅଧିକ ସୂଚନା ଦେଇ ସେ କହିଛନ୍ତି କି ଏହାପୂର୍ବରୁ ଗତ ମାସ ମିନେସୋଟାଠାରେ ଥିବା 10 ଫୁଟର କୋଲମ୍ବସଙ୍କୁ ପିତ୍ତଳ ମୂର୍ତ୍ତୀକୁ ବିକ୍ଷୋଭକାରୀମାନେ ଭାଙ୍ଗି ଦେଇଥିଲେ । ଏଥିସହ ବୋଷ୍ଟନରେ ମଧ୍ୟ ତାଙ୍କର ଏକ ପ୍ରତିମୂର୍ତ୍ତୀକୁ ଭଙ୍ଗା ଯାଇଥିଲା ।
ଏହି ଇଟାଲିଆନ ଆବିଷ୍କାରକଙ୍କ ଯୋଗୁଁ ପଞ୍ଚଦଶ ଶତାବ୍ଦୀରେ ଏକ ନୂଆ ଦୁନିଆ ଆବିଷ୍କୃତ ହୋଇଥିବା ବେଳେ ଆମେରିକୀୟ ବିଭିନ୍ନ ପାଠ୍ୟ ପୁସ୍ତକରେ କୋଲମ୍ବସଙ୍କ ସମ୍ପର୍କରେ ଲେଖା ରହିଛି । ହେଲେ ମୂଳ ଆମେରିକୀୟମାନେ ଆରମ୍ଭରୁ ହିଁ ତାଙ୍କୁ ବିରୋଧ କରି ଆସିଛନ୍ତି । ସେମାନଙ୍କ କହିବା ମୁତାବକ କୋଲମ୍ବସଙ୍କ ୟୋଗୁଁ ତାଙ୍କର ପୂର୍ବଜମାନଙ୍କର ବିନାଶ ହୋଇଛି ।
@IANS
