ୱାଶିଂଟନ: ଆମେରିକାର ପରବର୍ତ୍ତୀ ସ୍ବାସ୍ଥ୍ୟମନ୍ତ୍ରୀ ହେବେ କାଲିଫର୍ଣ୍ଣିଆ ଆଟର୍ଣ୍ଣିଂ ଜେନେରାଲ ଜାଭିୟର ବେକେରା । ଏନେଇ ତାଙ୍କୁ ଆମେରିକାର ନବନିର୍ବାଚିତ ରାଷ୍ଟ୍ରପତି ଜୋ ବାଇଡେନ ଚୟନ କରିଛନ୍ତି । କୋରୋନା ମହାମାରୀ ସମୟରେ ଏହାର ମୁକାବିଲା ପାଇଁ ଜାଭିୟରଙ୍କୁ ହିଁ ଏହି ଗୁରୁତ୍ବପୂର୍ଣ୍ଣ ପଦବୀ ପାଇଁ ବାଇଡେନ ଚୟନ କରିଛନ୍ତି ।
ତେବେ ଯଦି ଏହି ପ୍ରସ୍ତାବକୁ ସିନେଟ ମୋହର ମାରେ, ତେବେ 62 ବର୍ଷୀୟ ଜାଭିୟର ଏହି ପଦବୀ ପାଇଁ ପ୍ରଥମ ଲାଟିନୋ(ଲାଟିନ ଆମେରିକୀୟ) ହେବେ। ତେବେ ପୂର୍ବରୁ ମଧ୍ୟ ଜାଭିୟର ବାରାକ ଓବାମାଙ୍କ ସରକାରରେ ଅନେକ ଗୁରୁତ୍ବପୂର୍ଣ୍ଣ ଦାୟିତ୍ବ ସମ୍ଭାଳିଥିଲେ ।
ସୂଚନାଥାଉକି, ମେକ୍ସିକୋର ଦକ୍ଷିଣାଞ୍ଚଳ ସୀମାରେ ଏକ ପ୍ରାଚୀର ନିର୍ମାଣ କରିବା ଲାଗି ଟ୍ରମ୍ପ ସମସ୍ତ ରାଜ୍ୟକୁ ଅର୍ଥ ଦେବା ପାଇଁ କହିଥିବା ପ୍ରସଙ୍ଗରେ ଏହାକୁ ବିରୋଧ କରି ଜାଭିୟର ଚର୍ଚ୍ଚାକୁ ଆସିଥିଲେ । ଟ୍ରମ୍ପଙ୍କ ଏହି ନିଷ୍ପତ୍ତିକୁ ବିରୋଧ କରି 16ଟି ରାଜ୍ୟ ଅଦାଲତର ଦ୍ବାରସ୍ଥ ହୋଇଥିଲେ ।
ଏହି ମାମଲାର ଶୁଣାଣି ଆସନ୍ତାବର୍ଷ ହେବାକୁ ଥିବାବେଳେ ବାଇଡେନ, ଜାଭିୟରଙ୍କୁ ଏପରି ଏକ ଗୁରୁତ୍ବପୂର୍ଣ୍ଣ ପଦବୀ ପାଇଁ ଚୟନ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
