ସାନ ଫ୍ରାନ୍ସିସ୍କୋ: ଜାପାନିଜ ମିଡିଆ ଓ ଇକମର୍ସ ଗ୍ରୁପ ରାକୁତେନର ସବସିଡାରୀ ବା ସହାୟକ ଭାବେ ପରିଚାଳିତ ହେଉଛି ଇ-ରିଡର କମ୍ପାନୀ କୋବୋ । ଏହି କମ୍ପାନୀ ୟୁରୋପିଆନ ୟୁନିଅନରେ ଆପଲ୍ର ଆପ ଷ୍ଟୋରରେ ପ୍ରତିଯୋଗିତାର ନିୟମ ଉଲଙ୍ଘନ କରୁଥିବା ଅଭିଯୋଗ କରିଛି । ଯାହାକୁ ନେଇ କ୍ରମାଗତ ଦ୍ବିତୀୟ ଥର ପାଇଁ ଟେକ ଜାଏଣ୍ଟ ଆପଲ୍ର ବିଶ୍ବସନୀୟତା ଉପରେ ସୃଷ୍ଟି ହୋଇଛି ବଡ ପ୍ରଶ୍ନବାଚୀ ।
ସୂଚନା ମୁତାବକ ୟୁରୋପିଆନ ୟୁନିଅନରେ କୋବୋର ଇ-ବୁକ ଗୁଡିକ ଆପଲ୍ ଆପ୍ ଷ୍ଟୋରରେ ବିକ୍ରି ହେଲେ ପ୍ରତି ଇ-ବୁକ ପିଛା ଆପଲ୍ କମ୍ପାନୀ 30 ପ୍ରତିଶତ କମିଶନ ନେଉଥିବା ଅଭିଯୋଗ ହୋଇଛି । ଯାହା ପ୍ରତିଯୋଗିତା ନିୟମକୁ ଉଲଙ୍ଘନ କରୁଥିବା ଅଭିଯୋଗରେ ଦର୍ଶାଯାଇଛି । ଗତ ମାର୍ଚ୍ଚରେ ଏନେଇ ୟୁରୋପିଆନ କମିଶନରେ ଅଭିଯୋଗ ଦାଖଲ କରାଯାଇଥିଲା । ଏହାପୂର୍ବରୁ ଗତ ବର୍ଷ ସମାନ କାରଣ ଦର୍ଶାଇ ସ୍ବିଡିଶ ମ୍ୟୁଜିକ ଷ୍ଟ୍ରିମିଂ ସର୍ଭିସ ସ୍ପୋଟିଫାଏ ମଧ୍ୟ କମିଶନରେ ଅଭିଯୋଗ ଦାଖଲ କରିଥିଲା ।
ସ୍ପୋଟିଫାଏ ନିଜ ଅଭିଯୋଗରେ କହିଥିଲା କି ଆପଲ୍ ନିଜ ସର୍ଭିସ ଆପଲ୍ ମ୍ୟୁଜିକର ଚାହିଦା ବଢାଇବା ପାଇଁ ଆପ୍ ଷ୍ଟୋରରେ ଅନ୍ୟ କମ୍ପାନୀର ସର୍ଭିସକୁ ନିଚ୍ଚା ଦେଖାଉଛି । ସେପଟେ ଏହି ଅଭିଯୋଗରେ ପ୍ରତିକ୍ରିୟା ଦେଇ ଆପଲ୍ କହିଥିଲା କି ସ୍ପୋଟିଫାଏ ଆପଲ୍ର ଇନଫ୍ରାଷ୍ଟ୍ରକଚରର ସହାୟତା ନେଇ ରୋଜଗାର ବଢାଇବା ପାଇଁ ଚାହୁଁଥିଲା । ହେଲେ ପ୍ରତିବଦଳରେ କମ୍ପାନୀକୁ ଏହାର ଦେୟ ଦେବା ପାଇଁ ସ୍ପୋଟିଫାଏ ରାଜି ନଥିଲା । ଏନେଇ ସମ୍ପୃକ୍ତ କମ୍ପାନୀକୁ ଚେତାବନୀ ଦିଆଯିବା ପରେ ସେ ନିଜ ଦୋଷ ସ୍ବୀକାର କରିବା ପରିବର୍ତ୍ତେ ଓଲଟା ଆପଲ୍ ବିରୋଧରେ ଅଭିଯୋଗ ଆଣିଥିଲା ।
ସ୍ପୋଟିଫାଏର ଏହି ଅଭିଯୋଗ ଉପରେ ଏଯାବତ୍ କମିଶନ କୌଣସି ପଦକ୍ଷେପ ନେଇ ନାହିଁ । ଅନ୍ୟପଟେ ଆପଲ୍ କମ୍ପାନୀ ନାମରେ ଲୁକାୟିତ ହୋଇ ଆହୁରି ଅନେକ ଅଭିଯୋଗ ରହିଥିବା କମିଶନ ସ୍ପଷ୍ଟ କରିଛି ।
@IANS
