ୱାଶିଂଟନ: ଆମେରିକାରେ ନିଆଁ ବେଗରେ ବ୍ୟାପିବାରେ ଲାଗିଛି କୋରୋନା ସଂକ୍ରମଣ । ବର୍ତ୍ତମାନ ସୁଦ୍ଧା ଦେଶରେ ଆକ୍ରାନ୍ତ ସଂଖ୍ୟା 2.1 ମିଲିୟନ ପାର କରିଥିବା ବେଳେ ମୃତ୍ୟୁ ସଂଖ୍ୟା 1,16,000 ଛୁଇଁଥିବା ଜଣା ପଡିଛି । ସେପଟେ ଦେଶରେ କୋରୋନାରୁ ରକ୍ଷା ପାଇଁ କଡାକଡି ନିୟମ ରହିବା ସତ୍ତ୍ବେ ଉଭା ହେବାରେ ଲାଗିଛି ନୂଆ ନୂଆ ହଟସ୍ପଟ । ମଙ୍ଗଳବାର ସୁଦ୍ଧା ଦେଶରେ ଆକ୍ରାନ୍ତ ସଂଖ୍ୟା 2,114,026ରେ ପହଞ୍ଚିଛି । ବର୍ତ୍ତମାନ ବିଶ୍ବରେ ଉଭୟ ଆକ୍ରାନ୍ତ ଓ ମୃତ୍ୟୁ ସଂଖ୍ୟାରେ ଆମେରିକା ନିଜର ଶୀର୍ଷ ସ୍ଥାନ ବଜାୟ ରଖିଛି ।
ଏକଦା କୋରୋନାର ମୁଖ୍ୟ ହଟସ୍ପଟ ଭାବେ ନ୍ୟୁୟର୍କକୁ ବିବେଚନା କରାଯାଉଥିଲା । ହେଲେ ରାଜ୍ୟପାଳ ଆଣ୍ଡ୍ରିୟୁ କୁଓମୋଙ୍କ କହିବା ଅନୁଯାୟୀ ନ୍ୟୁୟର୍କ ସବୁଠାରୁ ଖରାପ ପରିସ୍ଥିତିରୁ ବାହାରି ସବୁଠାରୁ ଭଲ ପରିସ୍ଥିତି ଦେଖିଛି । ମାର୍ଚ୍ଚ ତୁଳନାରେ ରବିବାର ନ୍ୟୁୟର୍କରେ 1608 ଆକ୍ରାନ୍ତ ଚିହ୍ନଟ ହୋଇଥିବା ବେଳେ ତିନି ଦିନରେ ମୃତ୍ୟୁ ସଂଖ୍ୟା ମାତ୍ର 27 ରହିଛି । ଯାହା ସ୍ଥିତିରେ ସୁଧାରକୁ ଇଙ୍ଗିତ କରେ । କିନ୍ତୁ ବିପରୀତ ଭାବେ ଦେଶର ଦକ୍ଷିଣ, ପଶ୍ଚିମ ଓ ଦକ୍ଷିଣ-ପଶ୍ଚିମାଞ୍ଚଳରେ ଦିନକୁ ଦିନ ପରିସ୍ଥିତି ବିଗିଡିବାରେ ଲାଗିଛି ।
ଗତ ସପ୍ତାହେ ମଧ୍ୟରେ ଆମେରିକାର ଅନ୍ୟୁନ 23ଟି ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା ବଢିଥିବା ଦେଖିବାକୁ ମିଳିଥିଲା । ଏନେଇ ଟେକ୍ସାସ ସ୍ବାସ୍ଥ୍ୟ ବିଭାଗ ସୂଚନା ଦେଇ କହିଛି କି ରବିବାର ସମ୍ପୃକ୍ତ ଅଞ୍ଚଳରେ 2287 ଜଣ ଆକ୍ରାନ୍ତଙ୍କ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଯାହା ସମ୍ପୃକ୍ତ ଅଞ୍ଚଳରେ ଗୋଟିଏ ଦିନରେ ଡାକ୍ତରଖାନାରେ ଭର୍ତ୍ତି ହୋଇଥିବା ସର୍ବାଧିକ ସଂଖ୍ୟା । ତେବେ ଏହାକୁ ରୋକିବାକୁ ହେଲେ ଦେଶରେ ପୁଣି ଥରେ କଡାକଡି ସାମାଜିକ ଦୂରତା ନିୟମ ଲାଗୁ କରିବାର ଆବଶ୍ୟକତା ରହିଥିବା ଡାକ୍ତରମାନେ ପ୍ରକାଶ କରିଛନ୍ତି ।
@IANS
