କେପ କାନାଭେରାଲ: ସୌରମଣ୍ଡଳର ଏହି ଗ୍ରହକୁ ଯିବା ପାଇଁ ପ୍ରତ୍ୟେକ ରାଷ୍ଟ୍ରର ଚାଲିଛି ଆପ୍ରାଣ ଉଦ୍ୟମ । ଏଠାରେ ଜଳର ସ୍ଥିତି ଓ ଜୀବନର ସତ୍ତା କେତେ ସମ୍ଭବ ସେନେଇ ମଧ୍ୟ ଅବିରତ ପରୀକ୍ଷା ନିରୀକ୍ଷା ଜାରି ରହିଛି । ହେଲେ ଏହି ଗ୍ରହରେ ପହଞ୍ଚିବା ସେତେଟା ସହଜ ନୁହେଁ । ଅନେକ ବିଫଳତା ପରେ ଖୁବ କମ ରାଷ୍ଟ୍ର ସଫଳତାର ସହ ଏଠାରେ ପହଞ୍ଚିବାର ସୌଭାଗ୍ୟ ଅର୍ଜନ କରିଛନ୍ତି । ଏ ହେଉଛି ସୌରମଣ୍ଡଳର ଲାଲ ଗ୍ରହ ଭାବେ ପରିଚିତ ମଙ୍ଗଳ ଗ୍ରହ ।
ଚଳିତ ବର୍ଷ ଏହି ଗ୍ରହରେ ପହଞ୍ଚିବା ପାଇଁ 3ଟି ମିଶନର ପରିକଳ୍ପନା ହୋଇଛି । ଯେଉଁଥିରେ ସାମିଲ ହୋଇଛି ୟୁଏଇ, ଚୀନ ଓ ଆମେରିକା ଭଳି ଶକ୍ତିଶାଳୀ ରାଷ୍ଟ୍ର । ଏହା ପୂର୍ବରୁ ଆମେରିକା 8 ଥର ସଫଳତାର ସ୍ବାଦ ଚାଖି ସାରିଥିବା ବେଳେ ପ୍ରଥମ ଥରର ବିଫଳତା ପରେ ଦ୍ବିତୀୟ ଥର ଚେଷ୍ଟା ଆରମ୍ଭ କରିଛି ଚୀନ । ସେହିପରି ଅନେକ ବାଧା ବିଘ୍ନ ସତ୍ତ୍ବେ ମଙ୍ଗଳ ଅଭିମୁଖେ ପ୍ରଥମ ମିଶନ ଲଞ୍ଚ କରିଛି ୟୁଏଇ ।
ଏହିକ୍ରମରେ ଗୁରୁବାର ମଙ୍ଗଳ ଅଭିମୁଖେ ନିଜର ନବମ ମିଶନ ଲଞ୍ଚ କରିଛି ଆମେରିକା । ନାସାର ଦୀର୍ଘ ପ୍ରତୀକ୍ଷିତ ଏହି ପରଜର୍ଭରେନ୍ସ ରୋଭର ମିଶନ ନେଇ ଆମେରିକା ଅନେକ ଆଶାବାଦୀ ରହିଛି । ଲକ୍ଷ୍ୟ ରହିଛି କି ଏହାକୁ ମଙ୍ଗଳ ଗ୍ରହର ସବୁଠାରୁ ଜଟିଳତମ ପୃଷ୍ଠରେ ଅବତରଣ କରାଇ ସେଠାରୁ ପଥରର ନମୂନା ସଂଗ୍ରହ କରିବା ଓ ଗ୍ରହରେ ମାଇକ୍ରୋବିଆଲ ଜୀବ ସତ୍ତାର ପ୍ରମାଣ ଏକତ୍ରିତ କରି ପୃଥିବୀ ଫେରାଇ ଆଣିବା । ତେବେ ଏହି ସ୍ପେଶକ୍ରାଫ୍ଟ 300 ମିଲିୟନ ମାଇଲ ଅତିକ୍ରମ କରି ଆସନ୍ତା ବର୍ଷ ଫେବୃଆରୀରେ ମଙ୍ଗଳଗ୍ରହର କକ୍ଷ ପଥରେ ପ୍ରବେଶ କରିବା ନେଇ ସୂଚିନା ରହିଛି ।
ନାସାର ଏହି ମିଶନ ପାଇଁ ୟୁରୋପିଆନ ସ୍ପେଶ ଏଜେନ୍ସି ମଧ୍ୟ ସହାୟତାର ହାତ ବଢାଇଛି । ବର୍ତ୍ତମାନ ସୁଦ୍ଧାରୁ ସବୁଠାରୁ ବିକଶିତ ରୋଭର ହେଉଛି ପରଜର୍ଭରେନ୍ସ । ଏହା ମଙ୍ଗଳ ପୃଷ୍ଠରେ ଏପରି ସ୍ତାନରେ ଅବତରଣ କରିବ ଯେଉଁଠାରେ ଲକ୍ଷ ଲକ୍ଷ ବର୍ଷ ପୂର୍ବେ ବିରାଟ ହ୍ରଦ ରହିଥିବା ପୂର୍ବରୁ ବୈଜ୍ଞାନିକମାନେ ପ୍ରମାଣ ପାଇଥିଲେ । ଏହି ସ୍ଥାନରୁ ପରୀକ୍ଷା ପାଇଁ ନମୂନା ସହଜରେ ସଂଗ୍ରହ କରାଯାଇପାରେ । ତେବେ ଏହି ମିଶନରେ ସଂଗୃହୀତ ପଥର ଖଣ୍ଡର ନମୂନା ଆସନ୍ତା 2031 ସୁଦ୍ଧା ପୃଥିବୀକୁ ଫେରିବ ବୋଲି ସୂଚନା ରହିଛି ।
ନାସାର ଏହି ମିଶନ ପଛରେ 8 ବିଲିୟନ ଡଲାର ଖର୍ଚ୍ଚ ହୋଇଥିବା ବେଳେ ଏହି ମିଶନ ଅଧିନରେ ଆଗକୁ ଏକାଧିକ ଲଞ୍ଚିଂ ହେବା ନେଇ ନାସା ସ୍ପଷ୍ଟ କରିଛି । ତେବେ ମଙ୍ଗଳ ଗ୍ରହରେ ଜୀବନ ସତ୍ତାର ସମ୍ଭାବନା ରହିଛି କି ନାହିଁ ତାହା ଜଣା ନଥିଲେ ମଧ୍ୟ ଅତୀତରେ ଏହା ମଧ୍ୟ ପୃଥିବୀ ପରି ଏକ ଗ୍ରହ ଥିବା ନେଇ ବୈଜ୍ଞାନିକମାନେ ଆକଳନ କରୁଛନ୍ତି । ଏନେଇ ସୂଚନା ଦେଇଛନ୍ତି ନାସା ପରିଚାଳକ ଜିମ ବ୍ରିଡେନଷ୍ଟାଇନ ।
ମଙ୍ଗଳ ମିଶନରେ ଏକାଧିକ ଥର ସଫଳତା ହାସଲ କରିଥିବା ଦେଶ ଭାବେ ଆମେରିକା ନିଜର ରେକର୍ଡ ସୃଷ୍ଟି କରିସାରିଛି । ଚଳିତ ମିଶନରେ ଯଦି ଫେବୃଆରୀ ସୁଦ୍ଧା ସବୁକିଛି ଯୋଜନା ମୁତାବକ ଚାଲେ ତେବେ ଆମେରିକାର ପରଜର୍ଭରେନ୍ସ ଆମେରିକାର ନବମ ସଫଳ ମିଶନ ସାବ୍ୟସ୍ତ ହେବ ।
ଆଟଲାସ ଭି ରକେଟ ଲଞ୍ଚିଂ ପାଇଁ ଭଲ ପାଣିପାଗ ଉପରେ ରହିଥିଲା ବିଶେଷ ନଜର । ତେବେ ଡେନଭର ସ୍ଥିତ ଓ ଏହି ରକେଟ ମେକର ଓ ଏହାର ହେରିଟେଜ କମ୍ପାନୀ ଏଯାବତ୍ ନାସାର ସମସ୍ତ ମଙ୍ଗଳ ମିଶନକୁ ଲଞ୍ଚ କରିଛନ୍ତି । 1964 ମସିହାରୁ ନାସାର ପ୍ରଥମ ମଙ୍ଗଳ ମିଶନ ମରାଇନର୍ସ ସହ ୟନାଇଟେଡ ଲଞ୍ଚ ଆଲାଏଆନ୍ସ ଆଟଲାସ ଭିର ନାସା ସହ ଯାତ୍ରା ଆରମ୍ଭ ହୋଇଥିଲା ।
ଏନେଇ ୟୁଏଲଏ ମୁଖ୍ୟ କାର୍ଯ୍ୟକାରୀ ଅଧିକାରୀ ଟୋରୀ ବ୍ରୁନୋଙ୍କ କହିବା ଅନୁଯାୟୀ ଏପର୍ଯ୍ୟନ୍ତ ଲଞ୍ଚ ହୋଇଥିବା ମିଶନ ମଧ୍ୟରୁ ସବୁଠାରୁ ଜଟିଳତମ ମିଶନ ହେଉଛି ପରଜର୍ଭରେନ୍ସ ।
ବ୍ୟୁରୋ ରିପୋର୍ଟ, ଇଟିଭି ଭାରତ
