ଟୁନିସ: ସାରା ବିଶ୍ବକୁ ଗ୍ରାସିବାରେ ଲାଗିଛି କୋରୋନା ସଂକ୍ରମଣ । ଏମିତିରେ ଏହାର ମୁକାବିଲା ପାଇଁ ଯୁଦ୍ଧକାଳୀନ ଭିତ୍ତିରେ ପ୍ରସ୍ତୁତ କରାଯାଉଛି ପ୍ରତିଷେଧକ ଟିକା । ବିଶ୍ବର କୋଣ ଅନୁକୋଣରେ ଏହାର ବିକାଶ ପ୍ରକ୍ରିୟା ଜାରି ରହିଥିବା ବେଳେ ଉତ୍ତର ଆଫ୍ରିକାର ଟୁନିସିଆରେ ମଧ୍ୟ ଜାରି ରହିଛି ପ୍ରତିଷେଧକ ଟୀକା ପ୍ରସ୍ତୁତି ପ୍ରକ୍ରିୟା । ଯାହା ଆସନ୍ତା ବର୍ଷ ଅର୍ଥାତ୍ 2021 ପ୍ରାରମ୍ଭରେ ଲଞ୍ଚ ହେବା ନେଇ ସ୍ପଷ୍ଟ ହୋଇଛି । ଏନେଇ ସୂଚନା ଦେଇଛନ୍ତି ପାଶ୍ଚର ଇନଷ୍ଟିଚ୍ୟୁଟ ଅଫ ଟୁନିସ(ଆଇପିଟି)ର ସାଧାରଣ ନିର୍ଦ୍ଦେଶକ ହେଚମି ଲୋଜିର ।
କୋରୋନା ଲଢେଇ ପାଇଁ ଦେଶରେ ପ୍ରସ୍ତୁତ ହେଉଥିବା ପ୍ରତିଷେଧକଟି ମୂଳତଃ ଡିଏନଏ ଉପରେ ନିର୍ଭରଶୀଳ । ଯାହା ଶରୀରର ରୋଗ ପ୍ରତିରୋଧକ ଶକ୍ତି ବଢାଇବାରେ ସାହାଯ୍ୟ କରିବ ବୋଲି ହେଚମି ସୂଚନା ଦେଇଛନ୍ତି । କେବଳ ସେତିକି ନୁହେଁ ଏହି ପ୍ରତିଷେଧକ ଟିକା ଦ୍ବାରା କୋରୋନା ଭୂତାଣୁର ଅନ୍ୟ ପାର୍ଶ୍ବ ପ୍ରତିକ୍ରିୟା ଆଦିକୁ ମଧ୍ୟ ମାତ ଦେଇ ହେବ ବୋଲି ସେ ଦାବି କରିଛନ୍ତି ।
ସେପଟେ ଏନେଇ ଦେଶର ସ୍ବାସ୍ଥ୍ୟ ବିଭାଗ କହିଛି କି ପ୍ରତିଷେଧକ ପ୍ରଭାବଶାଳୀ ବୋଲି ଥରେ ପ୍ରମାଣ ହୋଇଗଲେ ଏସମ୍ବନ୍ଧରେ ଚଳିତବର୍ଷ ଶେଷ ଅର୍ଥାତ୍ ନଭେମ୍ବର କିମ୍ବା ଡିସେମ୍ବର ମାସରେ ଜଣାଇ ଦିଆଯିବ । ଏନେଇ ବିଜ୍ଞାନ ଓ ସ୍ବାସ୍ଥ୍ୟ ସମ୍ପର୍କିତ ପତ୍ରିକା ମାଧ୍ୟମରେ ସୂଚନା ଦିଆଯିବ ।
ସୂଚନା ଅନୁୟାୟୀ ଆଇପିଟିର କିଛି ଗବେଷକ ଦଳ କୋରୋନା ଲଢେଇ ପାଇଁ ପ୍ରତିଷେଧକ ଟିକା ପ୍ରସ୍ତୁତି କାର୍ଯ୍ୟ ଆରମ୍ଭ କରିଥିବା ନେଇ ଗତ ମଙ୍ଗଳବାର ହେଚମି ସୂଚନା ଦେଇଥିଲେ । ସେ କହିଥିଲେ କି ଗବେଷକମାନେ ଡିଏମନଏ ଟେକ୍ନୋଲୋଜିର ବ୍ୟବହାର କରୁଛନ୍ତି ।
@IANS
