ହାଇଦ୍ରାବାଦ: 'ରାମାୟଣ' ଏବଂ 'ଗୀତ୍ ହୁଇ ସବରେ ପରାଇ' ଭଳି ଟିଭି ସିରିଏଲରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ଗୁରମିତ ଚୌଧୁରୀଙ୍କୁ କିଏ ବା ନଜାଣେ । ଦମଦାର ଅଭିନୟ ହେତୁ ଗୁରୁମିତ ସମସ୍ତଙ୍କର ପ୍ରିୟ ବୋଲି ବିବେଚନା କରାଯାଏ । ବର୍ତ୍ତମାନ ଗୁରୁମିତ ଚୌଧୁରୀଙ୍କ ଏକ ନୂଆ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି, ଯେଉଁଥିରେ ରାସ୍ତା କଡ଼ରେ ଅଚେତ ଅବସ୍ଥାରେ ପଡ଼ିଥିବା ଜଣେ ବ୍ୟକ୍ତିଙ୍କୁ ସିପିଆର୍ ଦେଇ ଜୀବନ ବଞ୍ଚାଇବାକୁ ଚେଷ୍ଟା କରୁଥିବା ଦେଖିବାକୁ ମିଳିଛି ।
ବର୍ତ୍ତମାନ ସମୟରେ, ଏହା ଅନେକ ଥର ଦେଖାଯାଇଛି ଯେ ଲୋକମାନେ ହଠାତ୍ ଚେତାଶୂନ୍ୟ ହୋଇ ପଡିଯାଉଛନ୍ତି ଏବଂ ସେହି ସ୍ଥାନରେ ଉପସ୍ଥିତ ଥିବା ଅନେକ ଲୋକ ସେମାନଙ୍କୁ ସାହାଯ୍ୟ କରିବା ପାଇଁ ସିପିଆର ଦେଉଥିବାର ଦେଖାଯାଏ । ଗୁରୁବାର ମୁମ୍ବାଇର ଅନ୍ଧେରି ଅଞ୍ଚଳରେ ଏହିପରି କିଛି ଘଟିଛି ।
ଏହି ସମୟରେ ଜଣେ ବ୍ୟକ୍ତି ହଠାତ୍ ରାସ୍ତା କଡ଼ରେ ଚେତାଶୂନ୍ୟ ହୋଇ ପଡ଼ିଯାଇଥିଲେ । ଯାହା ପରେ ଟିଭି ଅଭିନେତା ଗୁରୁମିତ ଚୌଧୁରୀ ସେହି ବ୍ୟକ୍ତିଙ୍କୁ ସାହାଯ୍ୟ କରିବାକୁ ଆଗକୁ ଚାଲି ଆସିଥିଲେ । ଏହି ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଏହି ଭିଡିଓରେ, ଗୁରୁମିତ କିପରି ସେହି ବ୍ୟକ୍ତିଙ୍କୁ କ୍ରମାଗତ ଭାବରେ ସିପିଆର ଦେଉଛନ୍ତି, ତାହା ଦେଖିବାକୁ ମିଳିଛି । ଯଦିଓ ଗୁରୁମିତଙ୍କର ଅନେକ ଉଦ୍ୟମ ସତ୍ତ୍ୱେ ବ୍ୟକ୍ତି ଜଣଙ୍କ ବାରମ୍ବାର ଅଚେତ ହୋଇପଡୁଥିଲେ । ଯାହା ପରେ ଗୁରୁମିତ ତାଙ୍କୁ ଉଠାଇବାରେ ସାହାଯ୍ୟ କରିଥିଲେ ଏବଂ ପରେ ଘଟଣାସ୍ଥଳରେ ଉପସ୍ଥିତ ଥିବା ଅନ୍ୟ ଲୋକଙ୍କ ସାହାଯ୍ୟରେ ତାଙ୍କୁ ଡାକ୍ତରଖାନା ପଠାଇବାରେ ସାହାଯ୍ୟ କରିଥିଲେ ।
ଏହା ମଧ୍ୟ ପଢନ୍ତୁ: Gaming App Case: ରଣବୀରଙ୍କ ପରେ ଏହି 4 ସେଲିବ୍ରିଟିଙ୍କୁ ଇଡିର ସମନ୍, କପିଲ ବି ଅଛନ୍ତି ସାମିଲ
ସୋସିଆଲ ମିଡିଆରେ ଗୁରୁମିତଙ୍କ ପ୍ରଶଂସା
ଏହି ଭିଡିଓରେ ସ୍ପଷ୍ଟ ଦେଖାଯାଉଛି ଯେ, କିଛି ଲୋକ ଅଭିନେତାଙ୍କୁ ସାବାସି ଦେଉଛନ୍ତି । ଜଣେ ଅସହାୟ ବ୍ୟକ୍ତିଙ୍କୁ ସାହାଯ୍ୟ କରିବା ପରେ ଗୁରୁମିତଙ୍କ ଫ୍ୟାନ୍ସ ଫଲୋଇଂ ଆହୁରି ବଢ଼ି ଯାଇଛନ୍ତି । ସୋସିଆଲ ମିଡିଆରେ ଗୁରୁମିତଙ୍କୁ ବହୁତ ପ୍ରଶଂସା କରାଯାଉଛି । ଅନେକ ପ୍ରଶଂସକ ଗୁରୁମିତ ଚୌଧୁରୀଙ୍କୁ ପ୍ରକୃତ ହିରୋ ବୋଲି କହିଛନ୍ତି ।
