ମୁମ୍ବାଇ: ଫ୍ୟାନ୍ସଙ୍କ ପାଇଁ ଖୁସି ଖବର । ସ୍ୱରା ଭାସ୍କର ଏବଂ ଫହାଦ୍ ଅହମ୍ମଦଙ୍କ ଘରକୁ ଆସିବେ ନୂଆ ଅତିଥି । ସୋସିଆଲ ମିଡିଆରେ ସ୍ୱାମୀ ଫହାଦ୍ ଅହମ୍ମଦଙ୍କ ସହ ଏକ ସୁନ୍ଦର ଫଟୋ ସେୟାର କରି ଏହି ଗୁଡ ନ୍ୟୁଜ ଦେଇଛନ୍ତି ସ୍ବରା । ଫଟୋରେ ସ୍ବରା ବେବି ବମ୍ପ ଲୁକ ମଧ୍ୟ ଦେଖାଇଛନ୍ତି । ଏହି ଫଟୋ ସେୟାର ହେବା ପରେ ଅନେକ ତାରକାଙ୍କ ସମେତ ଫ୍ୟାନ୍ସ ତାଙ୍କୁ ଶୁଭେଚ୍ଛା ଜଣାଇଛନ୍ତି ।
ସ୍ୱରା ନିଜ ଇନଷ୍ଟାଗ୍ରାମରେ ସ୍ୱାମୀ ଫହାଦ୍ ଅହମ୍ମଦଙ୍କ ସହ ଏକ ସୁନ୍ଦର ଫଟୋ ସେୟାର କରିଛନ୍ତି । ଯେଉଁଥିରେ ସ୍ବରାଙ୍କ ବେବି ବମ୍ପ ଲୁକ ମଧ୍ୟ ଦେଖିବାକୁ ମିଳିଛି । ଫଟୋରେ ସ୍ବରା ପିଙ୍କ ରଙ୍ଗର ଫ୍ରକରେ ନଜର ଆସିଥିବା ବେଳେ ସ୍ୱାମୀ ଫହାଦ ଅହମ୍ମଦ ୟେଲୋ ଆଉଟଫିଟରେ ନଜର ଆସିଛନ୍ତି । ଫଟୋ ଗୁଡିକ ସେୟାର କରି ସ୍ୱରା ଲେଖିଛନ୍ତି, ବେଳେବେଳେ ତୁମର ସମସ୍ତ ପ୍ରାର୍ଥନାର ଉତ୍ତର ଏକ ସମୟରେ ମିଳିଯାଏ । ଆମ୍ଭେ ଏକ ନୂତନ ଦୁନିଆରେ ପାଦ ଦେବାକୁ ଯାଉଥିବାରୁ ଆଶୀର୍ବାଦ, କୃତଜ୍ଞତା କାମନା କରିବା ସହ ଉତ୍ସାହିତ ଅଛୁ ।
ଏଥିସହ ସ୍ୱରା ତାଙ୍କ ପୋଷ୍ଟରେ କହିଛନ୍ତି ଯେ ତାଙ୍କର ଅକ୍ଟୋବରରେ ଡେଲିଭରି ହେବ । ସେହି ଅନୁଯାୟୀ, ସ୍ୱରା ପାଞ୍ଚ ମାସର ଗର୍ଭବତୀ ଅଟନ୍ତି । ସ୍ୱରାଙ୍କ ଠାରୁ ଏହି ଖୁସି ଖବର ଶୁଣି ପରିବାର ଏବଂ ଫ୍ୟାନ୍ସଙ୍କ ମଧ୍ୟରେ ଖୁସିର ଲହରୀ ଖେଳି ଯାଇଛି । ସମ୍ପର୍କୀୟ, ଅନେକ ତାରକାଙ୍କ ସମେତ ଫ୍ୟାନ୍ସ ତାଙ୍କୁ ଶୁଭେଚ୍ଛା ଜଣାଇଛନ୍ତି ।
ସୂଚନା ଥାଉ କି, 34 ବର୍ଷୀୟ ସ୍ବରା ପ୍ରଥମ ଥର ପାଇଁ CAA ବିରୋଧରେ ଆନ୍ଦୋଳନ ସମୟରେ ସମାଜବାଦୀ ପାର୍ଟୀ ନେତା ଫହାଦ ଅହମ୍ମଦଙ୍କୁ ଭେଟିଥିଲେ ଏବଂ ଦୀର୍ଘ ସମୟର ବନ୍ଧୁତା ପରେ ଉଭୟଙ୍କ ମଧ୍ୟରେ ପ୍ରେମ ହୋଇଥିଲା । ପରେ ଉଭୟେ ବିବାହ କରିବାକୁ ସ୍ଥିର କଲେ । ସ୍ୱରା ଜାନୁଆରୀ 6ରେ ଫହାଦ୍ ଅହମ୍ମଦଙ୍କୁ କୋର୍ଟ ମ୍ୟାରେଜ କରିଥିଲେ । ପରେ ଫେବୃଆରୀ 16ରେ ଉଭୟ ହିନ୍ଦୁ ରୀତିନୀତିରେ ପୁଣି ବିବାହ କରିଥିଲେ । ନୂଆଦିଲ୍ଲୀରେ ସପରିବାର, ସମ୍ପର୍କୀୟ, ସାଙ୍ଗସାଥୀଙ୍କ ଉପସ୍ଥିତିରେ ଉଭୟ ବିବାହ ବନ୍ଧନରେ ବାନ୍ଧି ହୋଇଥିଲେ । ବିବାହ ସମାରୋହର ସମସ୍ତ ଫଟୋ ନିଜ ଇନଷ୍ଟାଗ୍ରାମରେ ସେୟାର କରିଥିଲେ ସ୍ବରା । ମାର୍ଚ୍ଚ 16ରେ ଉଭୟ ଗ୍ରାଣ୍ଡ ରିସ୍ପେସନର ଆୟୋଜନ କରିଥିଲେ । ଏଥିରେ ରାହୁଲ ଗାନ୍ଧୀ, ଜୟା ବଚ୍ଚନଙ୍କ ସମେତ ଅନେକ ତାରକା ସାମିଲ ହୋଇଥିଲେ । ତେବେ ବର୍ତ୍ତମାନ ମା' ହେବାକୁ ଯାଉଛନ୍ତି ସ୍ବରା । ଏନେଇ ସ୍ବରା ଏବଂ ଫହାଦ ବେଶ ଖୁସି ଥିବା ଜଣାପଡିଛି ।
