ହାଇଦ୍ରାବାଦ: ବର୍ତ୍ତମାନ ବକ୍ସ ଅଫିସରେ ଶାହାରୁଖ ଖାନଙ୍କ ଫିଲ୍ମ ଡଙ୍କି ଏବଂ ପ୍ରଭାସଙ୍କ ଫିଲ୍ମ ସାଲାର ମଧ୍ୟରେ କଡା ଟକ୍କର ଦେଖିବାକୁ ମିଳୁଛି । ଏଥିରେ ବାଜି ମାରିଛି ସାଲାର । ସାଲାର ଦର୍ଶକଙ୍କୁ ଆକୃଷ୍ଟ କରିବାରେ ସଫଳ ହେଉଥିବା ବେଳେ ୬ଦିନ ମଧ୍ୟରେ ବିଶ୍ବରେ ୫୦୦ କୋଟି କ୍ଲବରେ ସାମିଲ ହୋଇଛି ଏବଂ ଭାରତରେ ୩୦୦ କୋଟି ପାଖାପାଖି ଆୟ କରିଛି । ସେପଟେ କିନ୍ତୁ ଡଙ୍କି ଦର୍ଶକଙ୍କୁ ଠାରୁ ଭଲ ପ୍ରତିକ୍ରିୟା ପାଉଥିବା ସତ୍ତ୍ବେ ରୋଜଗାରରେ କମାଲ୍ କରିପାରୁନି । ଏହି ଫିଲ୍ମର ରିଲିଜର ୭ ଦିନରେ ୧୫୦ କୋଟି ପାର୍ କରିଛି ।
ସାକନିକଙ୍କ ରିପୋର୍ଟ ଅନୁଯାୟୀ, ପ୍ରଭାସଙ୍କ ଫିଲ୍ମ ସାଲାର ୯୦.୭ କୋଟି ଆୟ ସହ ଦମଦାର ଓପନିଂ କରିଥିଲା । ପରେ ଏହି ଫିଲ୍ମ ୨ୟ ଦିନରେ ୫୬.୩୫ କୋଟି, ୩ୟ ଦିନରେ ୬୨.୦୫ କୋଟି, ୪ର୍ଥ ଦିନରେ ୪୬.୩ କୋଟି, ୫ମ ଦିନରେ ୨୪.୯ କୋଟି ଆୟ କରିଥିଲା । ତେବେ ବର୍ତ୍ତମାନ ୬ଷ୍ଠ ଦିନରେ ଏହି ଫିଲ୍ମ ୧୭ କୋଟି ଆୟ କରିଛି । ଫିଲ୍ମର ମୋଟ ରୋଜଗାର ୨୯୭.୪୦ କୋଟିକୁ ବୃଦ୍ଧି ପାଇଛି ।
ସେହିପରି ଶାହାରୁଖ ଖାନଙ୍କ ଫିଲ୍ମ ଡଙ୍କି ପ୍ରଥମ ଦିନ ୨୯.୨ କୋଟି ଆୟ କରିଥିଲା । ଯାହା ସାଲାର ଅପେକ୍ଷା ବହୁତ କମ ରହିଥିବା ବେଳେ ଶାହାରୁଖଙ୍କ ଏହି ଫିଲ୍ମ ପୂର୍ବ ଫିଲ୍ମ ପଠାନ-ଜବାନକୁ ପଛରେ ପକାଇ ପାରିନଥିଲା । ୨ୟ ଦିନ ଡଙ୍କି ୨୦.୧୨ କୋଟି, ୩ୟ ଦିନ ୨୫.୬୧ କୋଟି, ୪ର୍ଥ ଦିନ ୩୦.୭ କୋଟି, ୫ମ ଦିନ ୨୪.୩୨ କୋଟି ଏବଂ ୬ଷ୍ଠ ଦିନରେ ୧୧.୫୬ କୋଟି ଆୟ କରିଥିଲା । ବର୍ତ୍ତମାନ ୭ମ ଦିନରେ ୯.୭୫ କୋଟି ଆୟ କରିଛି । ଫିଲ୍ମ ମୋଟ ୧୫୧.୨୬ କୋଟି ଟଙ୍କା ରୋଜଗାର କରିଛି ।
