ମୁମ୍ବାଇ: ବଲିଉଡ କିଙ୍ଗଖାନ ଶାହାରୁଖ ଖାନଙ୍କ ପ୍ରଶଂସକଙ୍କ ପାଇଁ ଖୁସି ଖବର । ଖୁବଶୀଘ୍ର ଶାହାରୁଖ ଖାନ ତାଙ୍କ ଝିଅ ସୁହାନାଙ୍କ ସହ ବଡ ପରଦାରେ ନଜର ଆସିବେ । ଉଭୟ ଏକ ଫିଲ୍ମରେ ଏକାଠି କାମ କରିବାକୁ ଯାଉଛନ୍ତି । ଏହି ଫିଲ୍ମଟି 'ପଠାନ' ନିର୍ଦ୍ଦେଶକ ସିଦ୍ଧାର୍ଥ ଆନନ୍ଦ ଏବଂ ଶାହାରୁଖ ଖାନଙ୍କ ଦ୍ୱାରା ନିର୍ମିତ ହେବ । ଶାହାରୁଖ ଏବଂ ସିଦ୍ଧାର୍ଥଙ୍କ ଫିଲ୍ମ 'ପଠାନ' ସାରା ବିଶ୍ୱରେ ରେକର୍ଡ ସୃଷ୍ଟି କରିଥିଲା । ତେବେ ପୁଣିଥରେ ଏହି ଯୋଡ଼ି ବଲିଉଡରେ ଧମାକା କରିବାକୁ ପ୍ରସ୍ତୁତ ହେଉଛି ।
ଗଣମାଧ୍ୟମର ରିପୋର୍ଟ ଅନୁଯାୟୀ, ସିଦ୍ଧାର୍ଥ ଆନନ୍ଦ ପୁଣିଥରେ ଶାହାରୁଖ ଖାନଙ୍କ ସହ ଧମାକା କରିବାକୁ ଯୋଜନା କରୁଛନ୍ତି । ଏଥର ସିଦ୍ଧାର୍ଥ ବଲିଉଡର ପଠାନ ଶାହାରୁଖ ଏବଂ ତାଙ୍କ ଝିଅ ସୁହାନା ଖାନଙ୍କୁ ଏକାଠି ନେଇ କାମ କରିବେ । ଏହି ଚଳଚ୍ଚିତ୍ରର ନାମ ଏପର୍ଯ୍ୟନ୍ତ ସ୍ଥିର ହୋଇନାହିଁ । ଚଳଚ୍ଚିତ୍ରଟି ଶାହାରୁଖ ଖାନଙ୍କ ବ୍ୟାନର ରେଡ ଚିଲିଜ୍ ଏଣ୍ଟରଟେନମେଣ୍ଟ ଏବଂ ମାର୍ଫ୍ଲିକ୍ସ ଅଧୀନରେ ନିର୍ମିତ ହେବ ବୋଲି ଜଣାପଡିଛି । ତେବେ ଫିଲ୍ମରେ ପ୍ରଡକ୍ସନ କାମ ଆରମ୍ଭ ହୋଇଛି । ଏଥିସହିତ କିଏ ଏହି ଚଳଚ୍ଚିତ୍ରର ନିର୍ଦ୍ଦେଶନା ଦେବେ ତାହା ଏ ପର୍ଯ୍ୟନ୍ତ ପ୍ରକାଶ କରାଯାଇ ନାହିଁ । ଲାଡଲିଙ୍କ ସହ ପ୍ରଥମ ଫିଲ୍ମକୁ ନେଇ ଶାହାରୁଖ ବହୁତ ଉତ୍ସାହିତ ଅଛନ୍ତି ।
ସୂଚନା ଅନୁସାରେ, ଏହି ଚଳଚ୍ଚିତ୍ରରେ ଶାହାରୁଖ ଖାନ ମଧ୍ୟ ସମାନ ଭୂମିକାରେ ଅଭିନୟ କରିପାରିବେ, ଯାହା ସେ ଆଲିଆ ଭଟ୍ଟଙ୍କ ଫିଲ୍ମ 'ଡିଏର ଜିନ୍ଦେଗି'ରେ ଅଭିନୟ କରିଥିଲେ । ଶାହାରୁଖ ଫିଲ୍ମ 'ଡିଏର ଜିନ୍ଦେଗି'ରେ ଆଲିଆଙ୍କ ମାର୍ଗଦର୍ଶକ ଭୂମିକାରେ ଅଭିନୟ କରିଥିଲେ । ଏଠାରେ ମଧ୍ୟ ସେ ସୁହାନାଙ୍କ ମାର୍ଗଦର୍ଶକ ଭାବେ ଅଭିନୟ କରିବ ବୋଲି କୁହାଯାଉଛି । ତେବେ ଶାହାରୁଖଙ୍କ ଲାଡଲି ସୁହାନା ଖାନ 'ଦ ଆର୍ଚିସ'ରୁ ବଲିଉଡରେ ଡେବ୍ୟୁ କରିବାକୁ ଯାଉଛନ୍ତି । ଏହି ଫିଲ୍ମ ଖୁବଶୀଘ୍ର ନେଟଫ୍ଲିକ୍ସରେ ରିଲିଜ ହେବ । ଏହାର ନିର୍ଦ୍ଦେଶନା ଦେଇଛନ୍ତି ଜୋୟା ଅଖତର ଏବଂ ରେମା କାଗି । ସୁହାନା ଖାନଙ୍କ ବ୍ୟତୀତ ଫିଲ୍ମରେ ଅମିତାଭ ବଚ୍ଚନ ଏବଂ ଜୟା ବଚ୍ଚନଙ୍କ ନାତି ଅଗସ୍ତ୍ୟ ନନ୍ଦା ଓ ବୋନି କପୁର ଏବଂ ଶ୍ରୀଦେବୀଙ୍କ ଝିଅ ଖୁସି କପୁର ଡେବ୍ୟୁ କରିବାକୁ ଯାଉଛନ୍ତି ।
ସେପଟେ ଶାହାରୁଖଙ୍କ କଥା କହିବାକୁ ଗଲେ, ସିଦ୍ଧାର୍ଥ ଆନନ୍ଦ ବଲିଉଡର ସୁପରଷ୍ଟାର ଶାହାରୁଖ ଖାନ ଏବଂ ସଲମାନ ଖାନଙ୍କ ସହ ଫିଲ୍ମ 'ପଠାନ ବନାମ ଟାଇଗର' ପ୍ରସ୍ତୁତ କରିବାକୁ ଯାଉଛନ୍ତି । 2024 ମସିହାରେ ଏହି ଫିଲ୍ମ ରିଲିଜ ହେବ ବୋଲି ସୂଚନା ରହିଛି । ଶାହାରୁଖ ଆଗାମୀ ଦୁଇଟି ଫିଲ୍ମ 'ଯବାନ' ଏବଂ 'ଡଙ୍କି'ରେ ନଜର ଆସିବେ । ନିର୍ଦ୍ଦେଶକ ଅଟଲି 'ଯବାନ' ନିର୍ଦ୍ଦେଶନା ଦେଇଥିବା ବେଳେ 'ଡଙ୍କି'ର ନିର୍ଦ୍ଦେଶନା ଦେଇଛନ୍ତି ରାଜକୁମାର ହିରାନୀ । ତେବେ ଅଟଲି ଏବଂ ରାଜକୁମାର ହିରାନୀଙ୍କ ସହ ଶାହାରୁଖ ପ୍ରଥମ ଥର ପାଇଁ କାମ କରୁଛନ୍ତି । 'ଯବାନ' ଫିଲ୍ମ ହିନ୍ଦୀ, ତାମିଲ ଏବଂ ତେଲୁଗୁ ଭାଷାରେ ନିର୍ମିତ ହେଉଥିବା ବେଳେ ଚଳିତ ବର୍ଷ ସେପ୍ଟେମ୍ବର 7ରେ ରିଲିଜ ହେବ ।
