ମୁମ୍ବାଇ: ବିବାହକୁ ନେଇ ଚର୍ଚ୍ଚାରେ ରହିଛନ୍ତି ବଲିଉଡ ଅଭିନେତ୍ରୀ ପରିଣୀତି ଏବଂ ଆପ ସାଂସଦ ରାଘବ ଚଢା । ନିକଟରେ ଉଭୟଙ୍କର ନିର୍ବନ୍ଧ ହୋଇଥିଲା। ଏବଂ ଖୁବଶୀଘ୍ର ଉଭୟଙ୍କ ପଡିବ ହାତଗଣ୍ଠି । ଏହାରି ମଧ୍ୟରେ ବର୍ତ୍ତମାନ ଏହି କପଲକୁ ପଞ୍ଜାବ ଅମୃତସରର ସ୍ବର୍ଣ୍ଣ ମନ୍ଦିରରେ ଦେଖିବାକୁୂ ମିଳିଥିଲା । ଏହି ସମୟରେ ଉଭୟ ମନ୍ଦିରର ସେବା କରୁଥିବା ମଧ୍ୟ ନଜର ଆସିଛନ୍ତି । ତେବେ ସେଠାରୁ ଉଭୟଙ୍କର ଫଟୋ ଏବଂ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି ।
ବିବାହ ପୂର୍ବରୁ ଏହି କପଲ ଅମୃତସରର ସ୍ବର୍ଣ୍ଣ ମନ୍ଦିର ପରିଦର୍ଶନ କରି ବାବଙ୍କ ଆର୍ଶୀବାଦ ନେଇଛନ୍ତି । ଉଭୟଙ୍କ ଫଟୋ ଏବଂ ଭିଡିଓ ସୁବର୍ଣ୍ଣ ମନ୍ଦିରରୁ ଆସିଥିଲା, ଯେଉଁଥିରେ ପରିଣୀତି ଫିକା ହଳଦିଆ ରଙ୍ଗର ସୁଟରେ ନଜର ଆସିଥିବା ବେଳେ ରାଘବ ଚଢା ଧଳା ରଙ୍ଗର କୁର୍ତ୍ତା ସହ ଜ୍ୟାକେଟରେ ନଜର ଆସିଥିଲେ । କଡା ସୁରକ୍ଷା ମଧ୍ୟରେ ଉଭୟ ବାବଙ୍କ ଦର୍ଶନ କରିଛନ୍ତି । ତେବେ ମନ୍ଦିର ପରିସରର ଆଉ ଏକ ଭିଡିଓ ସାମ୍ନକୁ ଆସିଛି । ଯେଉଁଥିରେ ଏହି କପଲ ଅନ୍ୟ ଲୋକମାନଙ୍କ ସହ ମିଶି ମନ୍ଦିରରେ ସେବା କରୁଥିବା ନଜର ଆସିଛନ୍ତି ।
ଏହା ମଧ୍ୟ ପଢନ୍ତୁ: ରାଜସ୍ଥାନରେ ପରିଣୀତି-ରାଘବଙ୍କ ବିବାହ !
ସୋସିଆଲ ମିଡିଆରେ ଭାଇରାଲ ଭିଡିଓ ପରେ ସ୍ବର୍ଣ୍ଣ ମନ୍ଦିରରେ ସେବା କରୁଥିବା କପଲଙ୍କୁ ଦେଖି ସେମାନଙ୍କ ପ୍ରଶଂସକମାନେ ପ୍ରତିକ୍ରିୟାରେ ସେମାନଙ୍କୁ ପ୍ରଶଂସା କରୁଛନ୍ତି । ଜଣେ ପ୍ରଶଂସକ ଲେଖିଛନ୍ତି,'ବହୁତ ଭଲ କାମ କରିଛନ୍ତି ।' ଜଣେ ଲେଖିଥିବା ବେଳେ 'ଗୁରୁ ବନ୍ଦନା... ବହୁତ ସୁନ୍ଦର'।
ସୂଚନା ଥାଉ କି, ଦୁଇ ପରିବାରର ଉପସ୍ଥିତିରେ ମେ' 13ରେ ରାଘବ ଏବଂ ପରିଣୀତିଙ୍କ ନିର୍ବନ୍ଧ ହୋଇଥିଲା । ଦୁହିଁଙ୍କର ବିବାହ ନଭେମ୍ବର ମାସରେ ହେବା ନେଇ ଚର୍ଚ୍ଚା ହେଉଛି । ବିବାହ ପ୍ରସ୍ତୁତି ପୂର୍ବରୁ ପରିଣୀତି ଏବଂ ରାଘବ ଆଶୀର୍ବାଦ ପାଇବା ପାଇଁ ସ୍ବର୍ଣ୍ଣ ମନ୍ଦିରରେ ପହଞ୍ଚିଥିଲେ, ସେମାନେ ମନ୍ଦିର ପରିସରରେ ପ୍ରାର୍ଥନା କରୁଥିବା ଦେଖିବାକୁ ମିଳିଥିଲା । ଏହି କପଲ ଉଦୟପୁରରେ ବିବାହ କରିବେ ବୋଲି କୁହାଯାଉଛି । ପୂର୍ବରୁ ଦୁହେଁ ଲଣ୍ଡନ ଯାଇ ବିବାହର ସପିଂ କରିଥିଲେ । ତେବେ ଲଣ୍ଡନରେ ରହିଥିବା ବେଳେ ଦୁହିଁଙ୍କର ଅନେକ ଭିଡିଓ ଭାଇରାଲ ହୋଇଥିଲା । ସେପଟେ ପରିଣୀତିଙ୍କ ୱାର୍କଫ୍ରଣ୍ଟ୍ କଥା କହିବାକୁ ଗଲେ, ଖୁବ୍ଶୀଘ୍ର ପରିଣୀତିଙ୍କୁ ଇମତିଆଜ୍ ଅଲିଙ୍କ ନିର୍ଦ୍ଦେଶିତ ଫିଲ୍ମ 'ଚମକିଲା'ରେ ଦେଖିବାକୁ ମିଳିବ । ଏହି ଫିଲ୍ମରେ ଦିଲଜିତ୍ ଦୋସାଞ୍ଜଙ୍କ ସହ ସ୍କ୍ରିନ୍ ସେୟାର କରୁଥିବାର ନଜର ଆସିବେ ।
