ଭୁବନେଶ୍ବର: ପୁଣି ଓଲିଉଡ୍ ଇଣ୍ଡଷ୍ଟ୍ରିରେ ବାଜିବ ସାହାନାଇ । ଖୁବଶୀଘ୍ର ବିବାହ କରିବାକୁ ଯାଉଛନ୍ତି ଓଲିଉଡ ଅଭିନେତ୍ରୀ ତମନ୍ନା ବ୍ୟାସ । ଅଭିନେତ୍ରୀ ପ୍ରସିଦ୍ଧ ଓଡ଼ିଆ ଚଳଚ୍ଚିତ୍ର ନିର୍ମାତା ସୀତାରାମ ଅଗ୍ରୱାଲ ଏବଂ ପ୍ରସିଦ୍ଧ କଣ୍ଠଶିଳ୍ପୀ ନମିତା ଅଗ୍ରୱାଲଙ୍କ ପୁଅ ସିଦ୍ଧାର୍ଥ ଅଗ୍ରୱାଲଙ୍କୁ ଜୀବନ ସାଥୀ କରିବାକୁ ଯାଉଛନ୍ତି । ନିକଟରେ ଉଭୟଙ୍କ ନିର୍ବନ୍ଧ ସରିଥିବା ବେଳେ ସିଦ୍ଧାର୍ଥ ସୋସିଆଲ ମିଡିଆରେ ନିଜ ପୋଷ୍ଟ ଏଂଗେଜମେଣ୍ଟର ଝଲକ ଦେଖାଇଛନ୍ତି ।
ରିପୋର୍ଟ ଅନୁସାରେ, ରାଜସ୍ଥାନର ବିଳାସପୂର୍ଣ୍ଣ ପ୍ୟାଲେସରେ ତମନ୍ନା ବ୍ୟାସ ସିଦ୍ଧାର୍ଥ ଅଗ୍ରୱାଲଙ୍କ ସହ ନିର୍ବନ୍ଧ ହୋଇଥିଲା । ଏବଂ ଆସନ୍ତା ବର୍ଷ ଜାନୁଆରୀରେ ଉଭୟ ରାଜସ୍ଥାନ କିମ୍ବା ହୋମ ଟାଉନ କଟକରେ ବିବାହ କରିବେ ବୋଲି ସୂଚନା ମିଳିଛି । ସିଦ୍ଧାର୍ଥ ଅଗ୍ରୱାଲ ନିଜ ଇନଷ୍ଟାଗ୍ରାମରେ ପୋଷ୍ଟ ଏଗେଂଜମେଣ୍ଟର ଏକ ଭିଡିଓ ସେୟାର କରିଛନ୍ତି । ଯେଉଁଥିରେ ତାଙ୍କୁ ଏବଂ ତମନ୍ନାଙ୍କୁ ରୋମାଣ୍ଟିକ ଅନ୍ଦାଜରେ ଦେଖିବାକୁ ମିଳିଛି । ଭିଡିଓରେ ଉଭୟ ପାରମ୍ପରିକ ଲୁକରେ ନଜର ଆସିଛନ୍ତି ।
ଏହି ଭିଡିଓ ସେୟାର କରି ସିଦ୍ଧାର୍ଥ ଲେଖିଛନ୍ତି, କେବଳ ଆମ ପାଇଁ ନୁହେଁ ବରଂ ଆମ ଜୀବନର ସମସ୍ତଙ୍କ ପାଇଁ ଏହି ଅଦ୍ଭୁତ ଝଲକ ଉପସ୍ଥାପନ କରୁଛି #sidkitamanna । ଆମ ଦୁହିଁଙ୍କ ପାଇଁ ଏକ ଅଦ୍ଭୁତ ନୂତନ ଯାତ୍ରା ଆରମ୍ଭ କରିବାକୁ ଯାଉଛୁ । ଏବଂ ଆମେ ଆମର ସମସ୍ତ ବିଶେଷ ଲୋକଙ୍କୁ ଆମ ଜୀବନର ସବୁଠାରୁ ଖୁସିର ମୁହୂର୍ତ୍ତ ସେୟାର କରିବାକୁ ଆମନ୍ତ୍ରଣ କରିବାକୁ ଚାହୁଁଛୁ । ମୋତେ ସମର୍ଥନ କରିବା, ମୋ ଜୀବନର ପ୍ରେମ ତମନ୍ନାଙ୍କୁ ଧନ୍ୟବାଦ ।
ଏହି ଫଟୋ ଏବଂ ଭିଡିଓ ସେୟାର ହେବା ପରେ ଅନେକ ସେଲିବ୍ରିଟି ସମେତ ଫ୍ୟାନ୍ସ ତାଙ୍କୁ ତାଙ୍କ ଜୀବନର ନୂଆ ଅଧ୍ୟାୟ ପାଇଁ ଶୁଭେଚ୍ଛା ଜଣାଇଛନ୍ତି । ଅଭିନେତା ସବ୍ୟସାଚୀ ମିଶ୍ର ଏବଂ ତାଙ୍କ ସ୍ତ୍ରୀ ତଥା ଅଭିନେତ୍ରୀ ଅର୍ଚ୍ଚିତା ସାହୁ ତମନ୍ନାଙ୍କ ଏହି ପୋଷ୍ଟ ଉପରେ ପ୍ରତିକ୍ରିୟା ଦେଇ ଲେଖିଛନ୍ତି, ତୁମ ଦୁହିଁଙ୍କୁ ଏକାଠି ଦେଖି ଖୁସି । ଅନେକ ଅନେକ ଶୁଭେଚ୍ଛା ଏବଂ ଆପଣଙ୍କ ବଡ ଦିନରେ ଆପଣଙ୍କ ସହ ଯୋଗଦେବାକୁ ଅପେକ୍ଷା କରିପାରିବି ନାହିଁ । ସେହିପରି ଅଭିନେତ୍ରୀ ଏଲିନା ସାମନ୍ତରାୟ, ରିୟା ଦେ, ଭୂମିକା ଦାଶ, ଗାୟିକା ଅନ୍ତରା ଚକ୍ରବର୍ତ୍ତୀ ସମେତ ଅନେକ ସେଲିବ୍ରିଟି ଉଭୟଙ୍କୁ ଶୁଭେଚ୍ଛା ଜଣାଇଛନ୍ତି ।
ନଭେମ୍ବର ୧୪ରେ ତମନ୍ନା ତାଙ୍କ ୨୬ତମ ଜନ୍ମଦିନ ପାଳନ କରିଥିଲେ । ଏହି ସମୟରେ ତାଙ୍କ ଭାବିସ୍ବାମୀ ସିଦ୍ଧାର୍ଥ ଏବଂ ପରିବାର ସହ ଧୁମଧାମରେ ଜନ୍ମଦିନ ପାଳନ କରିଛନ୍ତି । ଯାହାର ଝଲକ ଅଭିନେତ୍ରୀ ନିଜ ଇନ୍ଷ୍ଟାଗ୍ରାମରେ ସେୟାର କରିଛନ୍ତି । ସିଦ୍ଧାର୍ଥଙ୍କ ସହ ଜନ୍ମଦିନ ସେଲିବ୍ରେଟର ଭିଡିଓ ସେୟାର କରି ତମନ୍ନା ଲେଖିଛନ୍ତି, ମୋ ଜନ୍ମଦିନ ଏତେ ସୁନ୍ଦର କରିଥିବାରୁ ଧନ୍ୟବାଦ । ଏହି ପୋଷ୍ଟ ଉପରେ ସିଦ୍ଧାର୍ଥ ଲେଖିଛନ୍ତି, ସର୍ବଦା ତୁମ ଦିନକୁ ଏମିତି ଅଧିକ ସ୍ୱତନ୍ତ୍ର କରିବି ।
ଏହା ମଧ୍ୟ ପଢନ୍ତୁ: ହୀରାକୁଦ ଡ୍ୟାମର ନିଷିଦ୍ଧାଞ୍ଚଳରେ ଭିଡ଼ିଓ କରି ହଟହଟା ଓଲିଉଡର ତିନି ଅଭିନେତ୍ରୀ
ତମନ୍ନାଙ୍କ ବିଷୟରେ କହିବାକୁ ଗଲେ, ସେ ଓଲିଉଡର ଜଣେ ଆଗଧାଡିର ଅଭିନେତ୍ରୀ । ୨୦୧୬ରେ ସେ ଭାଇନା କଣ କଲା ସେ ଫିଲ୍ମ ସହ ଓଲିଉଡରେ ପାଦ ଦେଇଥିଲେ । ପରେ ନିଝୁମ ରାତିର ସାଥୀ, ବ୍ଲାକମେଲ, ପ୍ରମେ କୁମାର, ଗୋଲମାଲ ଲଭ, ରୋମିଓ ରାଜା, ଲଗାମ ଭଳି ଫିଲ୍ମରେ ଅଭିନୟ କରି ଦର୍ଶକଙ୍କ ମନ ଜିତିଛନ୍ତି । ସେପଟେ ସିଦ୍ଧାର୍ଥ ଅଗ୍ରୱାଲ ହେଉଛନ୍ତି ପ୍ରସିଦ୍ଧ ଓଡ଼ିଆ ଚଳଚ୍ଚିତ୍ର ନିର୍ମାତା ସୀତାରାମ ଅଗ୍ରୱାଲ ଏବଂ ପ୍ରସିଦ୍ଧ କଣ୍ଠଶିଳ୍ପୀ ନମିତା ଅଗ୍ରୱାଲଙ୍କ ପୁଅ ।
