ମୁମ୍ବାଇ: 'ଆଦିପୁରୁଷ'କୁ ନେଇ ବିବାଦ ଦିନକୁ ଦିନ ବଢିବାରେ ଲାଗିଛି । ସବୁଆଡେ ଫିଲ୍ମକୁ ନେଇ ବିରୋଧ ସହ ସମାଲୋଚନା କରାଯାଉଛି । ଏହାରି ମଧ୍ୟରେ ବର୍ତ୍ତମାନ ଆଦିପୁରୁଷକୁ ପଡୋଶୀ ଦେଶ ନେପାଳରୁ ଏକ ବଡ଼ ଆଶ୍ବସ୍ତି ମିଳିଛି । ନେପାଳ କୋର୍ଟ ଆଦିପୁରୁଷଙ୍କ ଉପରେ ଲାଗିଥିବା ପ୍ରତିବନ୍ଧକକୁ ହଟାଇ ଦେଇଛନ୍ତି । ହେଲେ କୋର୍ଟଙ୍କ ଏହି ନିଷ୍ପତ୍ତି ପରେ ନେପାଳର କାଠମାଣ୍ଡୁ ମେୟର ଅସନ୍ତୋଷ ପ୍ରକାଶ କରିଛନ୍ତି । ସେ ଚେତାବନୀ ଦେଇ କହିଛନ୍ତି ଯେ, ଯାହା ବି ହେଉ ଫିଲ୍ମ ଏଠାରେ ଚାଲିବାକୁ ଦେବି ନାହିଁ ।
ଆଦିପୁରୁଷ ଫିଲ୍ମ ଦେଖିବା ପରେ ନେପାଳ କୋର୍ଟ ଏହି ନିଷ୍ପତ୍ତି ଦେଇଛନ୍ତି । କୋର୍ଟଙ୍କ ଏହି ନିଷ୍ପତ୍ତି ଉପରେ କାଠମାଣ୍ଡୁ ମେୟର ବାଲେନ୍ ଶାହା ନିଜର ଅସନ୍ତୋଷ ବ୍ୟକ୍ତ କରିଛନ୍ତି । ଏହାସହ ଫିଲ୍ମକୁ ନେଇ ଚେତାବନୀ ଦେଇଛନ୍ତି । ମୁଁ ଦଣ୍ଡର ସାମ୍ନା କରିବାକୁ ପ୍ରସ୍ତୁତ, କିନ୍ତୁ ଫିଲ୍ମ ଚାଲିବାକୁ ଦେବି ନାହିଁ । ନେପାଳ କୋର୍ଟର ଏହି ନିଷ୍ପତ୍ତି ପରେ କାଠମାଣ୍ଡୁ ମେୟର ନେପାଳ ସରକାର ଏବଂ କୋର୍ଟଙ୍କୁ ଭାରତର ଦାସ ବୋଲି କହିଛନ୍ତି ।
ସୂଚନା ଥାଉ କି, ଆଦିପୁରୁଷ ଫିଲ୍ମରେ ମାତା ସୀତାଙ୍କୁ ଭାରତର ଝିଅ ଭାବରେ ବର୍ଣ୍ଣନା କରାଯାଇଥିଲା । ଏହାକୁ ନେଇ ନେପାଳରେ ବିରୋଧ କରାଯାଇଥିଲା । ଏହାସହ ମେୟର ଏହି ଆଦିପୁରୁଷ ସହିତ ସମସ୍ତ ହିନ୍ଦୀ ଚଳଚ୍ଚିତ୍ର ଉପରେ ପ୍ରତିବନ୍ଧକ ଲଗାଇଥିଲେ । ନେପାଳ ମେୟର କହିଥିଲେ ଯେ ସୀତା ନେପାଳର ଜନକପୁରରେ ଜନ୍ମଗ୍ରହଣ କରିଥିଲେ ଏବଂ ସେ ନେପାଳର ଝିଅ । ଏହି ବିବାଦୀୟ ସଂଳାପ ପାଇଁ ଫିଲ୍ମରୁ ନ ହଟାଯିବା ପର୍ଯ୍ୟନ୍ତ ନେପାଳରେ ଫିଲ୍ ଚଳାଇବାକୁ ଅନୁମତି ଦିଆଯିବ ନାହିଁ ବୋଲି ମେୟର କହିଥିଲେ ।
ସେପଟେ ରାମାୟଣ ଉପରେ ଆଧାରିତ ଏହି ଫିଲ୍ମର ସଂଳାପ ଯୋଗୁଁ ଲୋକଙ୍କ ଆକ୍ରୋଶର ଶିକାର ହୋଇଛି । ବର୍ତ୍ତମାନ ଫିଲ୍ମ ରିଲିଜ୍ ହେବାର ଏକ ସପ୍ତାହ ବିତିଗଲାଣି । ଯଦିଓ ଏହି ଚଳଚ୍ଚିତ୍ର ଏକ ସପ୍ତାହ ମଧ୍ୟରେ ବିଶ୍ବର 400 କୋଟି ଟଙ୍କା ଅତିକ୍ରମ କରିଛି, କିନ୍ତୁ ନିର୍ମାତାମାନେ ଫିଲ୍ମ ବଜେଟ ମୂଲ୍ୟ ବର୍ତ୍ତମାନ ଯାଏଁ ହାସଲ କରିପାରିନାହାନ୍ତି । ଏନେଇ ନିର୍ମାତାମାନେ ଫିଲ୍ମ ଟିକେଟର ମୂଲ୍ୟ ହ୍ରାସ କରିଥିଲେ ସୁଦ୍ଧା ଫିଲ୍ମ ଦର୍ଶକଙ୍କୁ ଆକୃଷ୍ଟ କରିବାରେ ବିଫଳ ହେଉଛି ।
ଏହି ଫିଲ୍ମଟି ଜୁନ୍ 22 ଏବଂ 23 ରେ 150 ଟଙ୍କା ଟିକେଟର ଏକ ସ୍ୱତନ୍ତ୍ର ଅଫର୍ ଦିଆଯାଇଛି । ତଥାପି ବିବାଦ ଯୋଗୁଁ ଫିଲ୍ମର ଆୟ ଦିନକୁ ଦିନ କମିବାରେ ଲାଗିଛି । 7ମ ଦିନରେ ଫିଲ୍ମ ମାତ୍ର 5.50କୋଟି ଆୟ କରିଛି। ଫିଲ୍ମର ମୋଟ ଆୟ 260କୋଟି ଟଙ୍କାକୁ ବୃଦ୍ଧି ପାଇଛି। 600 କୋଟି ଟଙ୍କା ବଜେଟରେ ପ୍ରସ୍ତୁତ ଆଦିପୁରୁଷ ଉଦଘାଟନୀ ଦିନରେ 88 କୋଟି ଟଙ୍କା ସଂଗ୍ରହ କରିଥିଲା ଏବଂ ବର୍ତ୍ତମାନ ସପ୍ତମ ଦିନର ସଂଗ୍ରହ ଏକକ ସଂଖ୍ୟାରେ ଆସିଛି । ସିନେମାହଲରେ ଆଦିପୁରୁଷଙ୍କ 7ଦିନର ମୋଟ ସଂଗ୍ରହ 260 କୋଟିରୁ ଅଧିକ ଟଙ୍କା ଆୟ କରିଛି ଏବଂ ବିଶ୍ବ ବକ୍ସ ଅଫିସରେ 410 କୋଟି ଟଙ୍କା ରୋଜଗାର କରିଛି ।
