ହାଇଦ୍ରାବାଦ: କରୀନା କପୁର ଖାନ ବଲିଉଡର ଅନ୍ୟତମ ଲୋକପ୍ରିୟ ଅଭିନେତ୍ରୀ । ତାଙ୍କ ନାମ ବଲିଉଡର ଦୁଇଟି ପ୍ରତିଷ୍ଠିତ ପରିବାର ସହିତ ଜଡ଼ିତ । ସେ କପୁର ପରିବାରର ଝିଅ ଏବଂ ନବାବ ଅର୍ଥାତ୍ ପଟୌଦି ପରିବାରର ବୋହୂ ଅଟନ୍ତି । କରୀନା କପୁର 1980 ସେପ୍ଟେମ୍ବର 21ରେ ମୁମ୍ବାଇରେ ଜନ୍ମଗ୍ରହଣ କରିଥିଲେ । ଆଜି କରୀନା ତାଙ୍କର 43ତମ ଜନ୍ମଦିନ ପାଳନ କରୁଛନ୍ତି । ଜନ୍ମଦିନ ଅବସରରେ ଆମେ ଅଭିନେତ୍ରୀଙ୍କ ପ୍ରୋଫେସନ୍ ନୁହେଁ, ବରଂ ରିୟଲ ଲାଇଫ୍ ସମ୍ପର୍କରେ କିଛି କହିବୁ ।
କରୀନା କପୁର ତାଙ୍କ ପିତାମାତା ଏବଂ ଭଉଣୀଙ୍କ ପଥ ଅନୁସରଣ କରି ବଲିଉଡ୍ରେ ପ୍ରବେଶ କରିଥିଲେ । ହେଲେ ବଡ଼ ରୋଚକପୂର୍ଣ୍ଣ ଭାବେ ଆରମ୍ଭ ହୋଇଥିଲା ବେବୋଙ୍କ ଫିଲ୍ମ କ୍ୟାରିଅର । ନିର୍ମାତା ରାକେଶ ରୋଶନଙ୍କ କହୋନା ପ୍ୟାର ହୈରେ ହ୍ରିତିକ ରୋଶନଙ୍କ ସହ ଡେବ୍ୟୁ କରିଥାଆନ୍ତେ କରୀନା । କିନ୍ତୁ ହ୍ରିତିକ ନିର୍ଦ୍ଦେଶକଙ୍କ ପୁଅ ହୋଇଥିବାରୁ ଫିଲ୍ମରେ ତାଙ୍କୁ ଅଧିକ ଫୋକସ କରାଯାଉଥିବା ଅଭିଯୋଗ କରି ଓହରି ଯାଇଥିଲେ କରୀନା । ପରେ 2000 ମସିହାରେ ୱାର ଡ୍ରାମା ରେଫ୍ୟୁଜିରେ ଅଭିଷେକ ବଚ୍ଚନଙ୍କ ସହ ଡେବ୍ୟୁ କରିଥିଲେ କରୀନା । ଆଜି ତାଙ୍କ ନାମ ବି-ଟାଉନର ଶ୍ରେଷ୍ଠ ଅଭିନେତ୍ରୀ ତାଲିକାରେ ସ୍ଥାନ ପାଇଛି । କରୀନା କପୁର ହିନ୍ଦୀ ସିନେମାକୁ ଗୋଟିଏ ନୁହେଁ ଅନେକ ବଡ ବଡ ହିଟ୍ ଚଳଚ୍ଚିତ୍ର ଦେଇଛନ୍ତି।
କରୀନା ୨୦୦୧ରେ ‘କଭି ଖୁସି କଭି ଗମ୍’ରେ ଦମଦାର ଅଭିନୟ କରି ବେଶ ଚର୍ଚ୍ଚାକୁ ଆସିଥିଲେ । ଏହା ପରଠୁ ଗୋଟିଏ ପରେ ଗୋଟିଏ ହିଟ୍ ଫିଲ୍ମରେ ନିଜର ଖଟା ମିଠା ଅଭିନୟରେ ଦର୍ଶକଙ୍କୁ ବାନ୍ଧି ରଖିଥିଲେ କରୀନା । ବଡିଗାର୍ଡ, ଥ୍ରି-ଇଡିଅଟ, ତଲାସ, ହଲଚଲ, ଜବ ଉଇ ମେଟ୍, ଗୋଲମାଲ୍-୩ ଓ ବଜରଙ୍ଗୀ ଭାଇଜାନ ଭଳି ସୁପରହିଟ ଫିଲ୍ମରେ ଅଭିନୟ କରି ଟପ୍ ହିରୋଇନ ସାଜିଥିଲେ କରୀନା । ତେବେ ଅଭିନେତା ସୈଫ ଅଲି ଖାନଙ୍କୁ ବିବାହ ପରେ ମଧ୍ୟ ବଲିଉଡରେ ଏବେବି ସକ୍ରିୟ ରହିଛନ୍ତି କରୀନା ।
କରୀନା କପୁର ବଲିଉଡର ସବୁଠାରୁ ଲୋକପ୍ରିୟ ପରିବାର ଅର୍ଥାତ୍ କପୁର ପରିବାରର ଅଟନ୍ତି । ଏହି କାରଣରୁ କରୀନା ପିଲାଦିନରୁ ବିଳାସପୂର୍ଣ୍ଣ ଜୀବନ ଅତିବାହିତ କରି ଆସୁଛନ୍ତି । କେବଳ ଏତିକି ନୁହେଁ କରୀନା କପୁର ସୈଫ ଅଲି ଖାନଙ୍କୁ ବିବାହ କରିବା ପରେ ମୁମ୍ବାଇର ଏକ ବିଳାସପୂର୍ଣ୍ଣ ଘରେ ରହୁଛନ୍ତି । ଯାହାର ମୂଲ୍ୟ କୋଟି କୋଟି ଟଙ୍କା । ଏହା ବ୍ୟତୀତ ସୈଫ ଏବଂ କରୀନାଙ୍କର ମଧ୍ୟ ପଟୌଦି ହାଉସ୍ ଅଛି । ଯାହାର ମୂଲ୍ୟ ପ୍ରାୟ 800 କୋଟି ଟଙ୍କା ।
ଆପଣ ଜାଣି ଆଶ୍ଚର୍ଯ୍ୟ ହେବେ ଯେ କାନଲେଜ୍ ରିପୋର୍ଟ ଅନୁଯାୟୀ କରୀନା କପୁରଙ୍କ ମୋଟ ସମ୍ପତ୍ତି ମୂଲ୍ୟ ପ୍ରାୟ 60 ନିୟୁତ ଡଲାର ଅଟେ। ଏହି ଅଭିନେତ୍ରୀ ପ୍ରତିବର୍ଷ ପ୍ରାୟ 10-12 କୋଟି ଟଙ୍କା ରୋଜଗାର କରନ୍ତି। କରୀନା କପୁରଙ୍କ କାର କଲେକ୍ସନ ବିଷୟରେ କହିବାକୁ ଗଲେ ଏହି ଅଭିନେତ୍ରୀଙ୍କ ପାଖରେ ବହୁ ଦାମୀ କାର ଅଛି । ତାଙ୍କ ଗ୍ୟାରେଜରେ ମର୍ସିଡିଜ୍-ବେଞ୍ଜ୍, ଏସ୍-କ୍ଲାସ୍, ଅଡି- R8, ଲେକ୍ସସ୍ LX 470, ଲ୍ୟାଣ୍ଡ ରୋଭର, ଡିଫେଣ୍ଡର ଏବଂ ରେଞ୍ଜ ରୋଭର ଭୋଗ୍ ଭଳି ବିଳାସପୂର୍ଣ୍ଣ କାର୍ ରହିଛି । କରୀନା କପୁର ତାଙ୍କର ଗୋଟିଏ ଚଳଚ୍ଚିତ୍ର ପାଇଁ 8 ରୁ 10 କୋଟି ଟଙ୍କା ଚାର୍ଜ୍ କରନ୍ତି । ଏହା ବ୍ୟତୀତ ଅଭିନେତ୍ରୀ ଅନେକ ବ୍ରାଣ୍ଡରୁ ମଧ୍ୟ ବହୁତ ରୋଜଗାର କରନ୍ତି ।
ୱାର୍କ ଫ୍ରଣ୍ଟ ବିଷୟରେ କହିବାକୁ ଗଲେ, ବଡ଼ ପରଦାରେ ଧମାଲ ମଚାଇବା ପରେ କରୀନା ବର୍ତ୍ତମାନ OTTରେ ଡେବ୍ୟୁ କରୁଛନ୍ତି । ତାଙ୍କର ଆଗାମୀ ଫିଲ୍ମ 'ଜାନେ ଜାନ' ସେପ୍ଟେମ୍ବର 21ରେ ନେଟଫ୍ଲିକ୍ସରେ ମୁକ୍ତିଲାଭ କରିବ ।
