ମୁମ୍ବାଇ: 'ପଠାନ'ର ସଫଳତା ପରେ ଶାହାରୁଖ ଖାନ ଚଳିତ ବର୍ଷ ଦ୍ୱିତୀୟ ଚଳଚ୍ଚିତ୍ର ଜବାନ ନେଇ ବଡ ପରଦାରେ ପ୍ରତ୍ୟାବର୍ତ୍ତନ କରିଛନ୍ତି। ଆଜି ଫିଲ୍ମ ରିଲିଜ ହୋଇଛି । ପୂର୍ବରୁ ଟ୍ରେଲର ଏହଂ ଗୀତ ଦର୍ଶକ ବେଶ ପସନ୍ଦ କରିଥିବା ବେଳେ ଫିଲ୍ମକୁ ନେଇ ଏକ ଭିନ୍ନ କ୍ରେଜ ଦେଖିବାକୁ ମିଳିଛି । ଏଥିସହିତ ଆଡଭାନ୍ସ ଟିକେଟ୍ ବୁକିଂ ପାଇଁ ରେକର୍ଡ ଭାଙ୍ଗିଥିବା ପୂର୍ବାନୁମାନ କରାଯାଇଛି । ବର୍ତ୍ତମାନ ଫିଲ୍ମର ସ୍ବତନ୍ତ୍ର ସ୍କ୍ରିନିଂ ଆୟୋଜିତ ହୋଇଥିଲା । ଏଥିରେ ଅନେକ ବଲିଉଡ ସେଲିବ୍ରିଟି ସାମିଲ ହୋଇଥିଲେ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ରିଲିଜ୍ ହେବା ପୂର୍ବରୁ ଗତକାଲି(ବୁଧବାର) ରାତିରେ ନିର୍ମାତାମାନେ ମୁମ୍ବାଇ ସ୍ଥିତ ଅନ୍ଧେରୀର YRF ଷ୍ଟୁଡିଓରେ ଏକ ସ୍କ୍ରିନିଂ ଆୟୋଜନ କରିଥିଲେ । ଶାହାରୁଖ ଏବଂ ସାନିଆ ମାଲହୋତ୍ରା ଫିଲ୍ମର ସ୍ୱତନ୍ତ୍ର ସ୍କ୍ରିନିଂ ପାଇଁ ପହଞ୍ଚିଥିବା ବେଳେ ଅନେକ ତାରକା ମଧ୍ୟ ଏଥିରେ ସାମିଲ ହୋଇଥିଲେ। ଏହି ସମୟରେ ବଲିଉଡ ଅଭିନେତା ହ୍ରିତିକ ରୋଶନଙ୍କୁ YRF ଷ୍ଟୁଡିଓ ଆଡକୁ ଯାଉଥିବାର ଦେଖିବାକୁ ମିଳିଥିଲା। ଏଥିସହ ଝିଅ ସୁହାନା ଖାନ ମଧ୍ୟ ବାପା ଶାହାରୁଖଙ୍କ ଫିଲ୍ମର ସ୍ପେଶାଲ ସ୍କ୍ରିନିଂରେ ନଜର ଆସିଥିଲେ।
ସାକ୍ନଲ୍କିଙ୍କ ରିପୋର୍ଟ ଅନୁଯାୟୀ ଶାହାରୁଖଙ୍କ ଫିଲ୍ମ ଜବାନ ପାଇଁ ଆଡଭାନ୍ସ ବୁକିଂ ହିନ୍ଦୀ 2D ପାଇଁ 11ଲକ୍ଷ 34ହଜାର 451 ଟିକେଟ ବିକ୍ରି ହୋଇଥିବା ବେଳେ ତାମିଲ 2D ପାଇଁ 1,16,576 ଟିକେଟ, ହିନ୍ଦୀ IMAX ପାଇଁ 16, 438 ଏବଂ ତେଲୁଗୁ 2D ପାଇଁ 8,8711 ଟିକେଟ ବିକି ହୋଇଛି। ଭାରତରେ ଫିଲ୍ମ ରିଲିଜ ପୂର୍ବରୁ 35 କୋଟିରୁ ଅଧିକ ଆୟ କରି ସଫଳତା ହାସଲ କରିଛି। ବର୍ତ୍ତମାନ ପ୍ରଥମ ଦିନରେ ଫିଲ୍ମ କେତେ ଆୟ କରୁଛି ତାହା ଦେଖିବାକୁ ବାକି ରହିଲା।
ଏହା ମଧ୍ୟ ପଢନ୍ତୁ: ‘ଜବାନ’ ରିଲିଜ ପୂର୍ବରୁ ଝିଅ ସହ ତିରୁପତି ମନ୍ଦିର ଦର୍ଶନ କଲେ ଶାହରୁଖ, ଭିଡିଓ ଭାଇରାଲ
ସୂଚନା ଥାଉ କି, ଏହି ଫିଲ୍ମଟି ଶାହାରୁଖଙ୍କ ପ୍ରଡକ୍ସନ୍ କମ୍ପାନୀ ରେଡ୍ ଚିଲିସ୍ ଏଣ୍ଟରଟେନମେଣ୍ଟ ଦ୍ୱାରା ନିର୍ମିତ ହୋଇଥିବା ବେଳେ ନିର୍ଦ୍ଦେଶକ ଅଟଲି ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି । ଏଥିରେ ଶାହାରୁଖଙ୍କ ସମେତ ସାଉଥ୍ ବିୟୁଟି ନୟନତାରାଙ୍କ ସହ ବିଜୟ ସେଥୁପତି ଏବଂ ସଂଜୟ ଦତ୍ତ ମଧ୍ୟ ମୁଖ୍ୟ ଭୂମିକାରେ ନଜର ଆସିବେ । ଦୀପିକା ପାଦୁକୋନ ଏଥିରେ କ୍ୟାମିଓ ରୋଲରେ ନଜର ଆସିବେ । ଏହା ଏକ ଆକ୍ସନ୍-ଡ୍ରାମା ଫିଲ୍ମ ଯେଉଁଥିରେ ଶାହାରୁଖ୍ଙ୍କ ଡବଲ ରୋଲ୍ ଦେଖିବାକୁ ମିଳିବ । ତେବେ ଅଟଲି, ନୟନତାରାଙ୍କ ସହ ବିଜୟ ସେଥୁପତିଙ୍କ ସହ ପ୍ରଥମ ଥର ପାଇଁ କାମ କରିଛନ୍ତି ଶାହାରୁଖ । ସେପ୍ଟେମ୍ବର 7ରେ ଏହି ଫିଲ୍ମ ତାମିଲ, ତେଲୁଗୁ ଏବଂ ହିନ୍ଦୀ ଭାଷାରେ ରିଲିଜ ହେବ ।
