ମୁମ୍ବାଇ: 'ପଠାନ'ର ସଫଳତା ପରେ ଚଳିତ ବର୍ଷ ପୁଣି ଥରେ ବଡ ଧମାକା କରିବାକୁ ଯାଉଛନ୍ତି ବଲିଉଡ କିଙ୍ଗଖାନ ଶାହାରୁଖ ଖାନ। ଶାହାରୁଖ ଫିଲ୍ମ 'ପଠାନ' ସହିତ ବିଶ୍ବର ବକ୍ସ ଅଫିସରେ 1000 କୋଟିରୁ ଅଧିକ ବ୍ୟବସାୟ କରି ଇତିହାସ ରଚିଥିଲା । ଏହାରି ମଧ୍ୟରେ ବର୍ତ୍ତମାନ ସେ ତାଙ୍କର ଆଗାମୀ ଫିଲ୍ମ 'ଯବାନ' ସହ ପୁଣି ଧମାକା କରିବାକୁ ପ୍ରସ୍ତୁତ ହେଉଛନ୍ତି । ତେବେ ଆଜି ଫିଲ୍ମ 'ଯବାନ'ର ସୁଟିଂ ଶେଷ ହୋଇଛି । ଏହି ସମୟରେ ଫିଲ୍ମ ସେଟରୁ ଶାହାରୁଖ ଖାନ ଏବଂ ଦୀପିକା ପାଦୁକୋନଙ୍କ ଫଟୋ ଲିକ ହୋଇଛି । ଯାହା ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି ।
ସାଉଥର ଯୁବ ତଥା ହିଟ୍ ନିର୍ଦ୍ଦେଶକ ଅରୁଣ କୁମାର ଓରଫ ଅଟଲିଙ୍କ ଫିଲ୍ମ 'ଯବାନ'ରେ ନଜର ଆସିବାକୁ ଯାଉଛନ୍ତି ଶାହାରୁଖ ଖାନ । ଏହି ଫିଲ୍ମରେ ଅଭିନେତ୍ରୀ ଦୀପିକା ପାଦୁକୋନ ଏକ କେମିଓ ରୋଲରେ ନଜର ଆସିବାକୁ ଯାଉଛନ୍ତି । ଏହାରି ମଧ୍ୟରେ ବର୍ତ୍ତମାନ ସେଟରୁ ଶାହାରୁଖ ଏବଂ ଦୀପିକାଙ୍କ ଫଟୋ ଲିକ ହୋଇଛି । ଫଟୋରେ ଉଭୟ ଶାହାରୁଖ ଖାନ ଏବଂ ଦୀପିକା ପାଦୁକୋନ ବ୍ଲାକ ଏବଂ ୱାଇଟ ପ୍ୟାଣ୍ଟ ସାର୍ଟ ପିନ୍ଧିଛନ୍ତି । ଏବଂ ମଞ୍ଚରେ ନାଲି ରଙ୍ଗର କପଡା ଧରିଥିବାର ନଜର ଆସିଛନ୍ତି । ତେବେ ଏକ ଗୀତ ସୁଟିଂ ସମୟର ଉଭୟଙ୍କ ଏହି ଫଟୋ ବୋଲି କୁହାଯାଉଛି ।
ସୂଚନା ଥାଉ କି, ଏହି ସାକ୍ଷାତକାରରେ ଦୀପିକା ଶାହାରୁଖଙ୍କୁ ନେଇ ପ୍ରତିକ୍ରିୟା ଦେଇଥିଲେ । 'ପଠାନ'ର ସଫଳତା ସମୟରେ ଏକ ସାକ୍ଷାତକାରରେ ଦୀପିକା ଶାହାରୁଖଙ୍କ ପ୍ରଶଂସା କରି କହିଥିଲେ ୟେ, 'ସତ କହିବାକୁ ଗଲେ ଆମେ ରେକର୍ଡ ଭାଙ୍ଗିବା ପାଇଁ ନୁହେଁ, ବରଂ ଏକ ଭଲ ଫିଲ୍ମ ନିର୍ମାଣ କରିବାକୁ ଆସିଛୁ । ମୋର ପ୍ରଥମ ଫିଲ୍ମରେ ଶାହରୁଖ ମୋତେ ଏହା ଶିଖାଇଥିଲେ। ସେ ମୋତେ କହିଥିଲେ କାମ ସେହି ଲୋକମାନଙ୍କ ସହ କରିବା ଦରକାର, ଯେଉଁମାନଙ୍କ ସହିତ ତୁମେ ଖୁସି ଅନୁଭବ କରୁଛ । ଏହା ପରେ ସେ ଏବଂ ମୁଁ 'ଓମ୍ ଶାନ୍ତି ଓମ୍' ଏବଂ 'ଚେନ୍ନାଇ ଏକ୍ସପ୍ରେସ୍' ଫିଲ୍ମରେ ମିଳିତ ଭାବେ କାମ କଲୁ । ଯାହା ସଫଳତା ହାସଲ କରିବା ସହ ଆମ ସମ୍ପର୍କରେ ମଧ୍ୟ ଭଲପାଇବା ଏବଂ ବିଶ୍ୱାସକୁ ଦୃଢ କରିପାରିଥିଲା ।
ଗଣମାଧ୍ୟମ ଅନୁଯାୟୀ ଏହି ଫିଲ୍ମର ସୁଟିଂ 180 ଦିନ ଧରି ଚାଲିଥିଲା । ଯାହା ଗତକାଲି ଶେଷ ହୋଇଛି । ଏହି ଫିଲ୍ମର ଟିଜର ମେ’ର ପ୍ରଥମ ସପ୍ତାହରେ ରିଲିଜ କରିବ ବୋଲି କୁହାଯାଉଛି । ଫିଲ୍ମ 'ଯବାନ' ଜୁନ୍ ୨ରେ ସିନେମାହଲରେ ରିଲିଜ ହେବ । ଏହି ଫିଲ୍ମର ଷ୍ଟାରକାଷ୍ଟ ବିଷୟରେ କହିବାକୁ ଗଲେ, ଶାହାରୁଖ ଖାନଙ୍କ ସମେତ ସାଉଥର ସୁପରହିଟ ଅଭିନେତ୍ରୀ ନୟନତାରା, ସାଉଥ ଅଭିନେତା ବିଜୟ ସେତୁପତି ମୁଖ୍ୟ ଭୂମିକାରେ ନଜର ଆସିବେ । ସେହିପରି ଫିଲ୍ମରେ ଦୀପିକା ପାଦୁକୋନଙ୍କ ବ୍ୟତୀତ ସଞ୍ଜୟ ଦତ୍ତଙ୍କୁ ମଧ୍ୟ କେମିଓ ରୋଲରେ ଦେଖିବାକୁ ମିଳିବ । ତେବେ 'ପଠାନ'ର ସଫଳତା ପରି ବର୍ତ୍ତମାନ ଶାହାରୁଖ ଖାନଙ୍କ ଫିଲ୍ମ 'ଯବାନ' ଫ୍ୟାନ୍ସକୁ କେତେ ଆକୃଷ୍ଟ କରିପାରୁଛି, ତାହା ଆଗାମୀ ଦିନରେ ଜଣାପଡିବ ।
