ମୁମ୍ବାଇ: ବନ୍ଧୁ ପାଇଁ ଦିନଟିଏ । ଆଜି ଅନ୍ତର୍ଜାତୀୟ ବନ୍ଧୁତା ଦିବସ । ଦେଶରେ ଆଜିର ଦିନକୁ ବେଶ ଉତ୍ସାହର ସହ ପାଳନ କରୁଥିବା ବେଳେ ବଲିଉଡ ସେଲିବ୍ରିଟିମାନେ ମଧ୍ୟ ନିଜ ନିଜ ଢଙ୍ଗରେ ଫ୍ରେଣ୍ଡସିପ୍ ଡେ' ପାଳନ କରୁଛନ୍ତି । ଏହି ବିଶେଷ ଦିନରେ ଅକ୍ଷୟ କୁମାର ତାଙ୍କ ସାଙ୍ଗମାନଙ୍କ ସହ ଏକ ମଜାଦାର ଭିଡିଓ ପୋଷ୍ଟ କରିଥିବାବେଳେ 'କାଶ୍ମୀର ଫାଇଲ୍ସ' ଫେମ୍ ଅଭିନେତା ଅନୁପମ ଖେର ତାଙ୍କ ବେଷ୍ଟିଙ୍କ ସହ ଏକ ଥ୍ରୋ' ବ୍ୟାକ୍ ଫଟୋ ସେୟାର କରିଛନ୍ତି ।
ଅଭିନେତା ଅକ୍ଷୟ କୁମାର ନିଜ ସାଙ୍ଗମାନଙ୍କ ସହ ଫ୍ରେଣ୍ଡସିପ୍ ଡେ' ପାଳନ କରୁଛନ୍ତି । ସେ ଏକ ଲୋକପ୍ରିୟ ଗୀତ 'କ୍ୟା ହୁଆ ତେରା ୱାଦା'ରେ ଏକ ମଜାଳିଆ ଭିଡିଓ ଗୀତ ଏବଂ ଡ୍ୟାନ୍ସ ପୋଷ୍ଟ କରିଛନ୍ତି, ଯାହାର କ୍ୟାପ୍ସନରେ ଲେଖା ଅଛି,' ସାଙ୍ଗମାନଙ୍କ ସହ ମଜା କରିବାର କୌଣସି ପ୍ରତିଯୋଗିତା ନାହିଁ । ପର୍ଯ୍ୟାୟ ଏବଂ ବୟସ ଗୁରୁତ୍ୱପୂର୍ଣ୍ଣ ନୁହେଁ । ମୋର ସାଙ୍ଗମାନେ ମୋର ଭିତର ପିଲାକୁ ବାହାରକୁ ଆଣି ଦେଇଛନ୍ତି । ଭଗବାନ ସମସ୍ତ ବନ୍ଧୁଙ୍କୁ ଆଶୀର୍ବାଦ କରନ୍ତୁ । ବନ୍ଧୁତା ଦିବସର ଶୁଭେଚ୍ଛା । ଏହି ପୋଷ୍ଟରେ ପ୍ରତିକ୍ରିୟା ଦେଇ ଅଭିନେତ୍ରୀ ଅର୍ଚ୍ଚନା ପୁରାଣ ସିଂ ଲେଖିଛନ୍ତି, ଏହା ଭଲ ଲାଗିଲା । ଅନ୍ୟପଟେ ଫ୍ୟାନ୍ସ ମଧ୍ୟ ଏହାକୁ ଲାଇକ୍ କରିବା ସହ ପ୍ରତିକ୍ରିୟାରେ ଅକ୍ଷୟଙ୍କୁ ଫ୍ରେଣ୍ଡସିପ୍ ଡେ' ଶୁଭେଚ୍ଛା ଜଣାଇଛନ୍ତି ।
ଏଥିସହିତ ଅନୁପମ ଖେର୍ ମଧ୍ୟ ତାଙ୍କର ବିଶେଷ ବନ୍ଧୁଙ୍କ ଫଟୋ ତାଙ୍କ ଅଫିସିଆଲ ଇନ୍ଷ୍ଟାଗ୍ରାମ୍ରେ ସେୟାର କରି ଫ୍ରେଣ୍ଡସିପ୍ ଡେ' ଶୁଭେଚ୍ଛା ଜଣାଇଛନ୍ତି । ଫଟୋ ସେୟାର କରି ସେ କ୍ୟାପ୍ସନ୍ରେ 'ହାପି ଫ୍ରେଣ୍ଡସିପ୍ ଡେ' ସହ ଲାଲ୍ ହାର୍ଟ ଇମୋଜି ଦେଇଛନ୍ତି । ଏଥିସହ ସେ ଲେଖିଛନ୍ତି, ଆଜି ସତୀଶଙ୍କ କଥା ବେଶ ମନେ ପଡ଼ୁଛି । ପ୍ରଥମ ଫଟୋରେ ଅନୁପମ ଖେର୍ ତାଙ୍କ ବନ୍ଧୁ ତଥା ଅଭିନେତା ଅନିଲ କପୁରଙ୍କ ସହ ପୋଜ୍ କରୁଥିବା ନଜର ଆସିଛନ୍ତି । ଦ୍ୱିତୀୟ ଫଟୋରେ ଅନୀଲ କପୁର ଅନୁପମ ଖେର୍ ଦିବଙ୍ଗତ ଅଭିନେତା ସତୀଶ କୌଶିକଙ୍କ ସହ ନଜର ଆସିଛନ୍ତି ।
ସେହିପରି ଶିଳ୍ପା ଶେଟ୍ଟୀ ତାଙ୍କ ସାଙ୍ଗମାନଙ୍କ ସହ ଏକ ଇନ୍ଷ୍ଟାଗ୍ରାମ୍ ଷ୍ଟୋରୀରେ ଏକ ଫଟୋ ସେୟାର କରିଛନ୍ତି । ଫଟୋରେ ସେ ତାଙ୍କ 'ଲେଡି ଗ୍ୟାଙ୍ଗ୍' ସହ ପୋଜ୍ କରୁଥିବା ନଜର ଆସିଛନ୍ତି । ଗୋଟିଏ ଫଟୋରେ, ସେ ସ୍ୱିମିଂପୁଲ୍ରେ ସାଙ୍ଗମାନଙ୍କ ସହ ମଜା କରୁଥିବା ଦେଖିବାକୁ ମିଳିଛି । ଅନ୍ୟ ଫଟୋରେ, ସେ ତାଙ୍କ ଗ୍ୟାଙ୍ଗ୍ ସହିତ ଏକ ପାର୍ଟି ପାଇଁ ପ୍ରସ୍ତୁତ ହେଉଥିବା ଦେଖିବାକୁ ମିଳିଛି ।
