ହାଇଦ୍ରାବାଦ: ତେଲୁଗୁ ଚଳଚ୍ଚିତ୍ର ଜଗତର ଜଣାଶୁଣା ଅଭିନେତା ବରୁଣ ତେଜଙ୍କ ସହ ଲାବନ୍ୟା ତ୍ରିପାଠୀଙ୍କ ନିର୍ବନ୍ଧ ହୋଇଛି । ଦୁହେଁ ଗତକାଲି (ଶୁକ୍ରବାର) ନିର୍ବନ୍ଧ କରିଛନ୍ତି । ଗତ କିଛିଦିନ ଧରି ଦୁହିଁଙ୍କର ନିର୍ବନ୍ଧ ଖବର ଚର୍ଚ୍ଚା ହେଉଥିବା ବେଳେ ଶୁକ୍ରବାର ସେମାନେ ହାଇଦ୍ରାବାଦରେ ନିର୍ବନ୍ଧ କରିଛନ୍ତି । ଏହି ସେରେମନିରେ ଅନେକ ଭେଟେରାନ ସାଉଥ ଅଭିନେତା ଯୋଗ ଦେଇଥିଲେ । କୋନିଡେଲା ଏବଂ ଅଲ୍ଲୁ ପରିବାର ଏକତ୍ରିତ ହୋଇଥିଲେ । ଅନ୍ୟପକ୍ଷରେ ରାମ ଚରଣ ତାଙ୍କ ଗର୍ଭବତୀ ପତ୍ନୀ ଉପାସନା କାମିନେନିଙ୍କ ସହ ଏହି କାର୍ଯ୍ୟକ୍ରମରେ ପହଞ୍ଚିଥିଲେ। ଚିରଞ୍ଜୀବୀ, ଅଲ୍ଲୁ ଅରବିନ୍ଦ, ଅଲ୍ଲୁ ଅର୍ଜୁନ, ଭେଙ୍କଟେଶ ଡଗୁବତୀ, ରାଣା ଡଗୁବତୀ, ନିତିନଙ୍କ ସମେତ ଅନେକ ତାରକା କାର୍ଯ୍ୟକ୍ରମରେ ଯୋଗ ଦେଇଥିଲେ ।
ତେବେ ନିର୍ବନ୍ଧ ପରେ ବରୁଣ ତେଜ ନିଜ ପ୍ରଶଂସକଙ୍କ ପାଇଁ ଇନଷ୍ଟାଗ୍ରାମରେ ଫଟୋ ସେୟାର କରିଛନ୍ତି । ସେ ନିଜ ନିର୍ବନ୍ଧର ଫଟୋ ସେୟାର କରି କ୍ୟାପ୍ସନରେ ଲେଖିଛନ୍ତି, ମୋତେ ମୋ ଭଲ ପାଇବା ମିଳିଯାଇଛି(ଫାଉଣ୍ଡ ମାଇଁ ଲଭ)। ଦୁହେଁ ରିଙ୍ଗ ବା ମୁଦିର ଫଟୋ ମଧ୍ୟ ସେୟାର କରିଛନ୍ତି ।
ଅନ୍ୟପଟେ ଲାବଣ୍ୟା ଏକ ଫଟୋ ସେୟାର କରିଛନ୍ତି, "ମୁଁ 2016ରୁ ମୋର ଜୀବନସାଥି ପାଇସାରିଛି । ଆଜୀବନ ଜୀବନସାଥି ହୋଇ ରହିବ ।"
ତେବେ ଫଟୋ ଦେଖିବାକୁ ଗଲେ ଦୁହେଁ କ୍ରିମ ଏବଂ ସବୁଜ ରଙ୍ଗର ଶାଢି ଏବଂ କୁର୍ତ୍ତାରେ ଖୁବ ସୁନ୍ଦର ଦେଖାଯାଉଥିଲେ । ବରୁଣ କ୍ରିମ ରଙ୍ଗର କର୍ତ୍ତା ପିନ୍ଧିଥିବା ବେଳେ ଲାବନ୍ୟା ଲାଇଟ ଗ୍ରୀନ ରଙ୍ଗର ଏକ ଶାଢୀ ସହ ଏକ ନେକଲେସ ପିନ୍ଧିଥିଲେ । ଏହାସହ ତାଙ୍କର ମୁଣ୍ଡର ଫୁଲ ଖୋସା ବହୁତ ଆକର୍ଷଣୀୟ ଦେଖାଯାଉଥିଲା । ଷ୍ଟାର ତାଲିକା ଦେଖିବାକୁ ଗଲେ RRR ତାରକା ରାମ ଚରଣ କଳା ପ୍ୟାଣ୍ଟ ଉପରେ ଧଳା ସାର୍ଟ ପିନ୍ଧିଥିଲେ ଏବଂ ତାଙ୍କ ପତ୍ନୀ ଉପାସନା ଏକ ଲାଇଟ ଗ୍ରୀନର ଡ୍ରେସ ପିନ୍ଧିଥିଲେ।
ଉଲ୍ଲେଖନୀୟ କଥା ହେଉଛି, ବରୁଣ ତେଜଙ୍କ ପିତା ନାଗା ବାବୁ ତାଙ୍କ ପୁଅଙ୍କ ବିବାହ ଚଳିତବର୍ଷ କରିବା ନେଇ ଘୋଷଣା କରିଥିଲେ । ତେବେ ବର୍ତ୍ତମାନ ତାହା ସତ ହେବାକୁ ଯାଉଛି । ବରୁଣ ହେଉଛନ୍ତି ଚିରଞ୍ଜୀବୀ ଏବଂ ପୱନ କଲ୍ୟାଣଙ୍କ ପୁତୁରା । ୨୦୧୨ ଚଳଚ୍ଚିତ୍ର ଅନ୍ଦାଲା ରାକ୍ଷସୀ ସହିତ ଲବନ୍ୟାଙ୍କ ତେଲୁଗୁ ସିନେମା ଜରିଆରେ ଏଣ୍ଟ୍ରି କରିଥିଲେ । ହେଲେ ଗତ କିଛି ଦିନ ହେବ ଦୁହିଁଙ୍କ ସମ୍ପର୍କକୁ ନେଇ ବେଶ ଚର୍ଚ୍ଚା ହେଉଥିଲା । 2016ରୁ ଦୁହେଁ ଦୁହିଁଙ୍କୁ ଡେଟ କରୁଥିଲେ । ହେଲେ ଦୁହେଁ ଏନେଇ ମୁହଁ ଖୋଲୁନଥିୁଲେ । ହେଲେ ଶୁକ୍ରବାର ବହୁ କଳ୍ପନାଜଳ୍ପନାର ଅନ୍ତ ଘଟିଛି । ଦୁହେଁ ନିର୍ବନ୍ଧ କରିଥିବା ବେଳେ ଖୁବଶୀଘ୍ର ବିବାହ ବନ୍ଧନରେ ବାନ୍ଧି ହେବେ ବୋଲି ଚର୍ଚ୍ଚା ହେଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
