ରାଞ୍ଚି: ଚେକ୍ ବାଉନ୍ସ ଏବଂ ଜାଲିଆତି ମାମଲାରେ ଅଭିନେତ୍ରୀ ଅମୀଷା ପଟେଲ ପୁଣି ଆଜି ରାଞ୍ଚି କୋର୍ଟରେ ହାଜର ହେବେ । ବର୍ତ୍ତମାନ ସେ ଜାମିନରେ ଅଛନ୍ତି । ଶେଷ ଶୁଣାଣି ପାଇଁ ତାଙ୍କୁ ଆଜି ରାଞ୍ଚିର ନିମ୍ନ ଅଦାଲତରେ ହାଜର ହେବାକୁ ନିର୍ଦ୍ଦେଶ ଦିଆଯାଇଥିଲା ।
ଜୁନ୍ 17ରେ 'ଗଦର' ଫେମ ଖ୍ୟାତି ଅଭିନେତ୍ରୀ ଅମୀଷା ପଟେଲ ଠକେଇ ଏବଂ ଚେକ୍ ବାଉନ୍ସ ମାମଲାରେ ରାଞ୍ଚି କୋର୍ଟରେ ଆତ୍ମସମର୍ପଣ କରିଥିଲେ । ଏହା ପରେ ସେ କୋର୍ଟରୁ ଜାମିନ ପାଇଥିଲେ । କୋର୍ଟରେ 10 ହଜାର ଦୁଇଟି ବେଲ ବଣ୍ଡ ଭରିବା ପରେ ତାଙ୍କୁ ଜାମିନ ଦିଆଯାଇଥିଲା ।
ରାଞ୍ଚି ଚଳଚ୍ଚିତ୍ର ନିର୍ମାତା ଅଜୟ କୁମାର ସିଂ ଅଭିନେତ୍ରୀ ଅମୀଷା ପଟେଲଙ୍କ ବିରୋଧରେ ଚେକ୍ ବାଉନ୍ସ ଏବଂ ଠକେଇ ମାମଲା ଦାୟର କରିଥିଲେ । ଏହା ସହିତ ସେ ଅମୀଷା ପଟେଲ ତାଙ୍କୁ ଧମକ ଦେଇଥିବା ଅଭିଯୋଗ କରିଥିଲେ । ଏହି ମାମଲାରେ କୋର୍ଟ ତାଙ୍କୁ ଅନେକ ଥର ନୋଟିସ ପଠାଇଥିଲେ । କିନ୍ତୁ ଅମୀଷା ପଟେଲ କୋର୍ଟରେ ହାଜର ହୋଇନଥିଲେ । ଏହା ପରେ କୋର୍ଟ ତାଙ୍କ ବିରୋଧରେ ୱାରେଣ୍ଟ ଜାରି କରିଥିଲେ । ୱାରେଣ୍ଟ ଜାରି ହେବା ପରେ ସେ ଜୁନ୍ 17ରେ କୋର୍ଟରେ ପହଞ୍ଚି ଆତ୍ମସମର୍ପଣ କରିଥିଲେ ।
ଏହି ଘଟଣାଟି ହେଉଛି 2018 ବର୍ଷର । ଅମୀଷା ପଟେଲଙ୍କ ଉପରେ 2.5 କୋଟି ଟଙ୍କାର ଚେକ୍ ବାଉନ୍ସ ଥିବା ଅଭିଯୋଗ ହୋଇଥିଲା । ନିର୍ମାତା ଅଜୟ କୁମାର ଅଭିଯୋଗ କରିଥିଲେ ଯେ, ଅମିଷା ପଟେଲ ତାଙ୍କଠାରୁ 2.5 କୋଟି ଟଙ୍କା ନେଇଛନ୍ତି । ଟଙ୍କା ନେବା ପରେ ମଧ୍ୟ ସେ ତାଙ୍କ 'ଦେଶୀ ମ୍ୟାଜିକ୍' ଫିଲ୍ମର କାମ କରିନଥିଲେ । ସେତେବେଳେ ଅଜୟ ଟଙ୍କା ମାଗିଥିଲେ । ଅମୀଷା ପଟେଲ ଏହା ଉପରେ ବିଳମ୍ବ କରିବା ଆରମ୍ଭ କରିଥିଲେ । ଚାପ ପକାଇବା ପରେ ସେ 2.5 କୋଟି ଟଙ୍କାର ଚେକ୍ ଦେଇଥିଲେ, ଯାହା ବାଉନ୍ସ ହୋଇଥିଲା । ଏହା ପରେ ଅଜୟ ସିଂ କୋର୍ଟରେ ଏନେଇ ଏକ ମାମଲା ଦାୟର କରିଥିଲେ ।
ସେପଟେ ଅମୀଷା ନିଜ ଆଗାମୀ ଫିଲ୍ମ ''ଗଦର-୨''କୁ ନେଇ ଚର୍ଚ୍ଚାରେ ରହିଛନ୍ତି । 2 ବର୍ଷ ପୂର୍ବର ସେହି ପୁରୁଣା ତାରା ସିଂ ଓରଫ ବଲିଉଡ ଅଭିନେତା ସନ୍ନି ଦେଓଲଙ୍କ ସହ ନଜର ଆସିବେ ଅମିଷା । ଏନେଇ ଉଭୟ ତାରକା ବର୍ତ୍ତମାନ ଫିଲ୍ମର ପ୍ରମୋସନରେ ବ୍ୟସ୍ତ ଅଛନ୍ତି । ନିକଟରେ ଦ କପିଲ ଶର୍ମା ଶୋ'ରେ ଫିଲ୍ମ ପ୍ରମୋସନ ପାଇଁ ପହଞ୍ଚିଥିଲେ ଅମୀଷା ଏବଂ ସନ୍ନି ଦେଓଲ । ଷ୍ଟୁଡିଓ ବାହାରେ ପାପରାଜିଙ୍କ ପାଇଁ ପୋଜ ଦେଉଥିବାର ନଜର ଆସିଥିଲେ । ଯାହାର ଭିଡିଓ ଏବଂ ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଅନିଲ ଶର୍ମାଙ୍କ ନିର୍ଦ୍ଦେଶିତ ଏହି ଫିଲ୍ମ ଅଗଷ୍ଟ 11ରେ ରିଲିଜ ହେବ ।
