ରାଞ୍ଚି: 'କହୋ ନା ପ୍ୟାର ହେ' ଏବଂ 'ଗଦର' ଫେମ ଅଭିନେତ୍ରୀ ଅମିଷା ପଟେଲଙ୍କ ନାଁରେ ଠକେଇ ମାମଲା । ମାମଲାର ଶୁଣାଣି ପାଇଁ ରାଞ୍ଚି କୋର୍ଟରେ ହାଜର ହୋଇଛନ୍ତି ଅମିଷା । ଏହା ପରେ କୋର୍ଟ ତାଙ୍କୁ ଜାମିନ ପ୍ରଦାନ କରିଛନ୍ତି । ମାମଲାର ପରବର୍ତ୍ତୀ ଶୁଣାଣି ଜୁନ୍ 21ରେ ହେବ । ତେବେ କୋର୍ଟ ପରିସରର ଏକ ଭିଡିଓ ସାମ୍ନାକୁ ଆସିଛି । ଯେଉଁଥିରେ ଅମୀଷା ମୁହଁ ଲୁଚାଇ କୋର୍ଟରେ ପହଞ୍ଚିଥିବା ନଜର ଆସିଛନ୍ତି ।
ଅମିଷା ପଟେଲଙ୍କ ବିରୋଧରେ ରାଞ୍ଚି ଭିତ୍ତିକ ଚଳଚ୍ଚିତ୍ର ନିର୍ମାତା ଅଜୟ କୁମାର ସିଂ ଚେକ୍ ବାଉନ୍ସ, ପ୍ରତାରଣା ଏବଂ ଧମକ ଦେଇଥିବା ଅଭିଯୋଗ କରିଥିଲେ । ଏହି ମାମଲା ନଭେମ୍ବର 2018ର ଅଟେ । ଠକେଇ ଏବଂ ଚେକ୍ ବାଉନ୍ସ ମାମଲାରେ ଅମୀଷାଙ୍କୁ ରାଞ୍ଚି ସିଭିଲ କୋର୍ଟ ଅନେକ ଥର ସମନ ଜାରି କରାଯାଇଥିଲା, କିନ୍ତୁ ସେ କୋର୍ଟରେ ହାଜର ହୋଇନଥିଲେ । ପରେ କୋର୍ଟ ତାଙ୍କ ବିରୋଧରେ ୱାରେଣ୍ଟ ଜାରି କରିଥିଲେ । ତେବେ ଅମିଷା ଶନିବାର ରାଞ୍ଚି ସିଭିଲ କୋର୍ଟ ସିନିୟର ଡିଭିଜନ୍ ଜଜ୍ ଡି.ଏନ୍ ଶୁକ୍ଲାଙ୍କ କୋର୍ଟରେ ହାଜର ହୋଇ ଆତ୍ମସମର୍ପଣ କରିଥିଲେ । ପରେ କୋର୍ଟ ଅଭିନେତ୍ରୀଙ୍କୁ ସର୍ତ୍ତମୂଳକ ଜାମିନ ପ୍ରଦାନ କରିଛନ୍ତି ।
ଅଜୟ କୁମାର ସିଂ ଅଭିଯୋଗ କରିଥିଲେ ଯେ, ଅମିଷା ପଟେଲ ତାଙ୍କଠାରୁ 2.5 କୋଟି ଟଙ୍କା ନେଇଛନ୍ତି । ଟଙ୍କା ନେବା ପରେ ମଧ୍ୟ ସେ ତାଙ୍କ 'ଦେଶୀ ମ୍ୟାଜିକ୍' ଫିଲ୍ମର କାମ କରିନଥିଲେ । ଚୁକ୍ତିନାମା ଆଧାରରେ, 2018 ମସିହାରେ ଯେତେବେଳେ ଫିଲ୍ମ ରିଲିଜ୍ ହୋଇପାରିଲା ନାହିଁ, ସେତେବେଳେ ଅଜୟ ଟଙ୍କା ମାଗିଥିଲେ । ଅମିଷା ପଟେଲ ଏହା ଉପରେ ବିଳମ୍ବ କରିବା ଆରମ୍ଭ କରିଥିଲେ । ଚାପ ପକାଇବା ପରେ ସେ 2.5 କୋଟି ଟଙ୍କାର ଚେକ୍ ଦେଇଥିଲେ, ଯାହା ବାଉନ୍ସ ହୋଇଥିଲା । ଏହା ପରେ ଅଜୟ ସିଂ କୋର୍ଟରେ ଏନେଇ ଏକ ମାମଲା ଦାୟର କରିଥିଲେ । ଅଜୟ କୁମାର ସିଂଙ୍କ ଓକିଲ ବିଜୟା ଲକ୍ଷ୍ମୀ ଶ୍ରୀବାସ୍ତବ କହିଛନ୍ତି ଯେ ବର୍ତ୍ତମାନ ତାଙ୍କୁ ଜାମିନ ମିଳିଛି । କିନ୍ତୁ ଜୁନ୍ 21ରେ ପୁନର୍ବାର ହାଜର ହେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ମାମଲାର ପରବର୍ତ୍ତୀ ଶୁଣାଣି ଜୁନ୍ 21ରେ ହେବ।
ଅମିଷାଙ୍କ ୱାର୍କପ୍ରଣ୍ଟ କଥା କହିବାକୁ ଗଲେ, ଖୁବଶୀଘ୍ର ଅମୀଷାଙ୍କୁ ପୁଣି ''ଗଦର-୨''ରେ ଦେଖିବାକୁ ମିଳିବ । 22 ବର୍ଷ ପୂର୍ବର ସେହି ପୁରୁଣା ତାରା ସିଂ ଓରଫ ବଲିଉଡ ଅଭିନେତା ସନ୍ନି ଦେଓଲଙ୍କ ସହ ନଜର ଆସିବେ ଅମିଷା । ଅନିଲ ଶର୍ମାଙ୍କ ନିର୍ଦ୍ଦେଶିତ ଏହି ଫିଲ୍ମ ପୁଣି 2001 ବ୍ଲକବଷ୍ଟର ଫିଲ୍ମ 'ଗଦର: ଏକ ପ୍ରେମ କଥା' ଦର୍ଶକଙ୍କୁ ମନୋରଞ୍ଜନ କରାଇବ ବୋଲି ଆଶା । ଅଗଷ୍ଟ 11ରେ ରିଲିଜ ହେବ ଫିଲ୍ମ । ଏହି ଫିଲ୍ମ ସନ୍ଦୀପ ରେଡ୍ଡୀ ଭଙ୍ଗା ନିର୍ଦ୍ଦେଶିତ ଫିଲ୍ମ ଆନିମୋଲ ଏବଂ ଅକ୍ଷୟ କୁମାର ଅଭିନୀତ ଫିଲ୍ମ OMG-2 ସହ କଡା ଟକ୍କର ଦେବ ।
