ଗାନ୍ଧୀନଗର: ଆଜି ହାତକୁ ଦୁଇ ହାତ ହେବେ ବଲିଉଡ ଅଭିନେତା ରଣବୀର କପୁର ଓ ଅଭିନେତ୍ରୀ ଆଲିଆ ଭଟ୍ଟ । ବିବାହ ପର୍ଯ୍ୟାୟ ମଧ୍ୟ ଆରମ୍ଭ ହୋଇଯାଇଛି । ଏହି ଯୋଡିଙ୍କ ପାଇଁ ଆଜି ଏକ ବଡ ଦିନ । ଉଭୟଙ୍କୁ ଛୁଟୁଛି ଶୁଭେଚ୍ଛାର ସୁଅ । ସୁରଟର ଜଣେ ସୁନା ବ୍ୟବସାୟୀ ରଣବୀର ଓ ଆଲିଆଙ୍କୁ ସୁନାର ଗୋଲାପ ଫୁଲ ବୁକେ ତିଆରି କରି ଭେଟି ଦେଇଛନ୍ତି । ଯାହା ସମସ୍ତଙ୍କ ଦୃଷ୍ଟି ଆକର୍ଷଣ କରିଛି ।
ବୁକେଟି 5 ଫୁଟ ଲମ୍ବ ରହିଛି । ସମୁଦାୟ 125ଟି 24 କ୍ୟାଟେର ସୁନା ଗୋଲାପରେ ତିଆରି ହୋଇଛି ଏହି ଫୁଲତୋଡା । ସୋସିଆଲ ମିଡିଆରେ ଏହି ଫୁଲତୋଡା ଭାଇରାଲ ହେବାରେ ଲାଗିଛି । ସୁନା ବ୍ୟବସାୟୀ ଦୀପକ ଚୋକସି କହିଛନ୍ତି ତାଙ୍କ ପୁଅ ଓ ବୋହୂ ଆଲିଆ ଭଟ୍ଟ ଓ ରଣବୀରଙ୍କ ବଡ ଫ୍ୟାନ ତେଣୁ ସେମାନେ ତାଙ୍କୁ କିଛି ଭିନ୍ନ ଉପହାର ଦେବାକୁ ଚାହିଁଥିଲେ । ଏହି ଫୁଲତୋଡାରେ ଲାଗିଥିବା 125ଟି ଗୋଲାପ ଫୁଲରୁ ଗୋଟିକର ଦାମ ପାଖାପାଖି 1700 ରୁ 2000ଟଙ୍କା ହେବ ।
ମୁମ୍ବାଇ ସ୍ଥିତ ଭାସ୍ତୁ ବିଲ୍ଡିଂରେ ବୈଦିକ ରୀତିନୀତିରେ ବାହାଘର ଅନୁଷ୍ଠିତ ହେବ । ବିବାହ କାର୍ଯ୍ୟରେ ମାତ୍ର 28ଜଣ ଅତିଥି ସାମିଲ ହେବା ନେଇ ସୂଚନା ମିଳିଛି । ଆସନ୍ତା 17 ତାରିଖରେ ନବଦମ୍ପତିଙ୍କ ରିସେସ୍ପନ ପାର୍ଟି ମୁମ୍ବାଇ ସ୍ଥିତ ତାଜ ମହଲ ପ୍ୟାଲେସରେ କରାଯିବ ନେଇ ସୂଚନା ମିଳିଛି ।
