ଭୁବନେଶ୍ବର: ବିଜେପି, ବିଜେଡି ଆଉ ଏବେ କଂଗ୍ରେସ । ଶେଷରେ ପାଟକୁରା ନିର୍ବାଚନ ପାଇଁ ଅଣ୍ଟା ଭିଡିଛି କଂଗ୍ରେସ । ଏନେଇ ଦଳ ସମସ୍ତ ସାଂସଦ, ବିଧାୟକ, ଜିଲ୍ଲା ସଭାପତି, ବ୍ଲକ ଓ ଜୋନ ସଭାପତିଙ୍କୁ ଡାକି ଆଲୋଚନା କରିଛି ।
ଏହି ଆଲୋଚନାରେ ନିର୍ବାଚନ ପାଇଁ ଦଳ କୌଣସି ପ୍ରକାର ଖର୍ଚ୍ଚ କରିବ ନାହିଁ ବୋଲି ନିଷ୍ପତ୍ତି ନେଇଛି ଦଳ । ଏପରିକି ଯେଉଁ ସାଂସଦ ଓ ବିଧାୟକ ପ୍ରଚାର ପାଇଁ ଯିବେ ସେମାନେ ନିଜ ଖର୍ଚ୍ଚରେ ଯିବା ସହ ରହିବା ଖର୍ଚ୍ଚ ମଧ୍ୟ ବହନ କରିବେ ।
ଗଣତନ୍ତ୍ରରେ ଶାସନ ଚାଲିବାକୁ ହେଲେ ବିରୋଧୀଙ୍କ ଆବଶ୍ୟକତା ରହିଛି । ବର୍ତ୍ତମାନ ଓଡିଶାରେ ବିଜେଡି, ବିଜେପି ଏକ । ତେଣୁ ଏକ ସୁସ୍ଥ ଗଣତନ୍ତ୍ର ପାଇଁ କଂଗ୍ରେସ ହିଁ ଏକମାତ୍ର ଦଳ । କଂଗ୍ରେସ ହିଁ ଏଠାରେ ବିରୋଧୀ ଭୂମିକା ତୁଲାଇବ । ତେଣୁ କଂଗ୍ରେସକୁ ଭୋଟ ଦେବାକୁ ପାଟକୁରାବାସୀଙ୍କୁ ନିବେଦନ କରିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ ।
ସେପଟେ ନିରଞ୍ଜନଙ୍କ ଏଭଳି ମନ୍ତବ୍ୟକୁ ନେଇ ଜବାବ ରଖିଛନ୍ତି ବିଜେପି ମୁଖପାତ୍ର ଗୋଲକ ମହାପାତ୍ର ।
ଏଠାରେ ସୂଚନାଯୋଗ୍ୟ, ପାଟକୁରା ନିର୍ବାଚନ ପାଇଁ ପ୍ରଚାରର ମଙ୍ଗ ଧରିଛନ୍ତି ସମସ୍ତ ଦଳର ମୁଖିଆ । ଆଜି(ବୁଧବାର) ବିଜେପି ତରଫରୁ ବିଜୟ ମହାପାତ୍ରଙ୍କ ପାଇଁ ପ୍ରତାପ ଷଡଙ୍ଗୀ ପ୍ରଚାର କରିଥିବା ବେଳେ ଜୁଲାଇ 17ରେ ମଇଦାନକୁ ଓହ୍ଲାଇବେ ବିଜେଡିର ଷ୍ଟାର ପ୍ରଚାରକ ନବୀନ ପଟ୍ଟନାୟକ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
