ବାଲେଶ୍ୱର: ଜିଲ୍ଲାରେ ନିର୍ବାଚନୀ ପ୍ରଚାରବେଳେ ଗଣ୍ଡଗୋଳ। ଖଇରା ବ୍ଲକ ନହଙ୍ଗସ୍ଥିତ ଏକ କଲ୍ୟାଣୀ ମଣ୍ଡପରେ କଂଗ୍ରେସର ଏକ କର୍ମୀ ସମ୍ମିଳନୀରେ ଦେଖାଦେଇଛି ଗଣ୍ଡଗୋଳ। ସମ୍ମିଳନୀରେ ଯୋଗଦେବାକୁ ଆସିଥିବା ମହିଳାଙ୍କ ମଧ୍ୟରେ ଦେଖାଦେଇଛି ଅସନ୍ତୋଷ ।
ସୂଚନାନୁଯାୟୀ, ମଙ୍ଗଳବାର ସିମୁଳିଆ ନିର୍ବାଚନ ମଣ୍ଡଳୀର କଂଗ୍ରେସ ବିଧାୟକ ପ୍ରାର୍ଥୀ ଅନନ୍ତ ପ୍ରସାଦ ସେଠୀ ଏକ କର୍ମୀ ସମ୍ମିଳନୀର ଆୟୋଜନ କରିଥିଲେ । ସମ୍ମିଳନୀକୁ ଯିବାଆସିବା ଖର୍ଚ୍ଚକୁ ନେଇ ସେମାନଙ୍କୁ ଡାକିଥିବା ନେତାଙ୍କୁ ଘେରି ପାଟିତୁଣ୍ଡ କରିଥିଲେ ଉପସ୍ଥିତ ଥିବା ମହିଳାମାନେ ।
କର୍ମୀମାନଙ୍କୁ ସମ୍ମିଳନୀରେ ଯୋଗ ଦେବା ପାଇଁ କମଳାକାନ୍ତ ବିଶ୍ୱାଳ ସବୁଜ ପତ୍ରିକାଧାରୀଙ୍କୁ ଆହ୍ୱାନ ଦେଇଥିଲେ। ବିଭିନ୍ନ ପଞ୍ଚାୟତରୁ ମହିଳାମାନେ କଂଗ୍ରେସ ସମ୍ମିଳନୀରେ ଯୋଗ ଦେଇଥିଲେ। ରାଜ୍ୟ ସରକାର ବଦଳି କଂଗ୍ରେସ ସରକାର ଆସିଲେ ସବୁଜ ପତ୍ରିକାଧାରୀଙ୍କ ଦୁଃଖ ବୁଝାଯିବ ବୋଲି କୁହାଯାଇଥିଲା। କଂଗ୍ରେସ ସମ୍ମିଳନୀ ପରେ ଯାତାୟତ ଖର୍ଚ୍ଚ ବଣ୍ଟନ କରାଯାଇଥିଲା। ଏହାକୁ ନେଇ ମହିଳାଙ୍କ ମଧ୍ୟରେ ଠେଲାପେଲା ଭଳି ଘଟଣା ଉପୁଜିଥିଲା। ବେଶ କିଛି ସମୟ ଧରି ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇଥିଲା। କର୍ମୀ ସମ୍ମିଳନୀରେ ଯୋଗ ଦେବା ପାଇଁ ଡାକିଥିବା କମଳା ବିଶ୍ବାଳଙ୍କୁ ମହିଳାମାନେ ଘେରି ଯାଇଥିଲେ।
ବାଲେଶ୍ୱରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
