ହାଇଦ୍ରାବାଦ: ହରିୟାଣାରେ ସରକାର ଗଠନ ପାଇଁ ଆଜି ଗୁରୁତ୍ବପୂର୍ଣ୍ଣ ବିଜେପି ବିଧାୟକ ଦଳ ବୈଠକ ଅନୁଷ୍ଠତି ହୋଇଥିଲା । ବିଜେପି ବିଧାୟକ ଦଳ ବୈଠକରେ ବିଜେପିର ବରିଷ୍ଠ ନେତା ମନୋହର ଲାଲ ଖଟ୍ଟରଙ୍କୁ ବିଧାୟକ ଦଳ ନେତା ଭାବେ ଚୟନ କରାଯାଇଥିଲା । ଏହାସ୍ପଷ୍ଟ ଯେ ଖଟ୍ଟର ହିଁ ମୁଖ୍ୟମନ୍ତ୍ରୀ ହେବେ । ଏହି ବୈଠକରେ ବିଜେପି କେନ୍ଦ୍ରୀୟ ପର୍ଯ୍ୟବେକ୍ଷକ ଭାବେ କେନ୍ଦ୍ରମନ୍ତ୍ରୀ ରବିଶଙ୍କର ପ୍ରସାଦ, ଦଳର ଜାତୀୟ ସମ୍ପାଦକ ଅରୁଣ ସିଂ ଯୋଗଦେଇଥିଲେ ।
ବୈଠକ ପରେ କେନ୍ଦ୍ରମନ୍ତ୍ରୀ ରବି ଶଙ୍କର ପ୍ରସାଦ କହିଥିଲେ ନବ ନିର୍ବାଚିତ ଦଳୀୟ ବିଧାୟକଙ୍କ ବୈଠକ ହୋଇଥିଲା । ବୈଠକରେ ଖଟ୍ଟରଙ୍କୁ ବିଧାୟକ ଦଳ ନେତା ଭାବେ ଚୟନ କରାଯାଇଛି । ରାଜ୍ୟକୁ ଏକ ସୁଦୃଢ ଶକ୍ତ ସରକାର ଦେବାପାଇଁ ବିଜେପି ପ୍ରତିଶୃତିବଦ୍ଧ । ଯେଉଁଥିପାଇଁ ଜେଜେପିର ସହଯୋଗ ନେଇଛି ଦଳ । ଏହାସହ ବିଜେପିକୁ ଅନେକ ନିର୍ଦ୍ଦଳୀୟ ବିଧାୟକ ମଧ୍ୟ ସମର୍ଥନ କରୁଛନ୍ତି । ହେଲେ ଦଳ ଗୋପାଳ କାଣ୍ଡଙ୍କ ସମର୍ଥନ ନେବ ନାହିଁ ବୋଲି ରବି ଶଙ୍କର ପ୍ରସାଦ ସ୍ପଷ୍ଟ କରିଥିଲେ । ରବି ଶଙ୍କର କହିଛନ୍ତି ଉଭୟ ଦଳର ବୁଝାମଣା ଅନୁସାରେ ବିଜେପିରୁ ମୁଖ୍ୟମନ୍ତ୍ରୀ ଓ ଜେଜେପିରୁ ଉପ-ମୁଖ୍ୟମନ୍ତ୍ରୀ ହେବେ। ତେବେ ମନ୍ତ୍ରୀ ମଣ୍ଡଳରେ କେଉଁମାନେ ସାମିଲ ହେବେ ତାହା ନିଜେ ମନୋହର ଲାଲ ସ୍ଥିର କରିବେ ବୋଲି କହିଛନ୍ତି । ଅପରାହ୍ନ 3 ଟାରେ ଉଭୟ ଦଳର ନେତା ମିଳିତ ଭାବେ ରାଜ୍ୟପାଳଙ୍କୁ ରାଜ ଭବନରେ ସାକ୍ଷାତ କରି ସରକାର ଗଠନ ପାଇଁ ଦାବି ଜଣାଇବେ ।
ଅନ୍ୟପଟେ ଆସନ୍ତା କାଲି ମୁଖ୍ୟମନ୍ତ୍ରୀ ଭାବେ ମନୋହର ଲାଲ ଖଟ୍ଟର ଶପଥ ଗ୍ରହଣ କରିବାକୁ ଚାହୁଁଛନ୍ତି ବୋଲି ଜଣାପଡିଛି । ଯେଉଁଥିପାଇଁ ମୁଖ୍ୟମନ୍ତ୍ରୀଙ୍କ ଇଛାକୁ ସମ୍ମାନ ଜଣାଇ ଦଳୀୟ ନେତା ଅପରାହ୍ନ 2ଟାରେ ରାଜଭବନରେ ଶପଥ ଗ୍ରହଣ ପାଇଁ ପ୍ରସ୍ତୁତି ଆରମ୍ଭ କରିଛନ୍ତି । ଆସନ୍ତା କାଲି ମୁଖ୍ୟମନ୍ତ୍ରୀ ଓ ଉପ-ମୁଖ୍ୟମନ୍ତ୍ରୀ ଶପଥ ନେବେ । ଦୀପାବଳି ପରେ ମନ୍ତ୍ରୀମଣ୍ଡଳ ଗଠନ ହେବ ବୋଲି ଉଭୟ ଦଳ ନିଷ୍ପତ୍ତି ନେଇଛନ୍ତି । ହରିୟାଣା ସରକାରରେ ଏବେ ଜଣେ ଉପ-ମୁଖ୍ୟମନ୍ତ୍ରୀ ହେବେ ନା 2ଜଣ ତାକୁ ନେଇ ଲାଗି ରହିଛି ସସପେନ୍ସ । କାରଣ ଜେଜେପିରୁ ଜଣେ ଉପମୁଖ୍ୟମନ୍ତ୍ରୀ ହେବା ସ୍ପଷ୍ଟ ବିଜେପିରୁ ମଧ୍ୟ ଜଣେ ଉପ-ମୁଖ୍ୟମନ୍ତ୍ରୀ ପଦ ପାଇଁ ଦାବି ହୋଇଛି । ବିଜେପିର ବରିଷ୍ଠ ନେତା ଅନୀଲ ଭିଜଙ୍କୁ ମଧ୍ୟ ଉପ-ମୁଖ୍ୟମନ୍ତ୍ରୀ କରିବାକୁ ଦାବି ହୋଇଛି । ତେବେ ଏହି ପ୍ରସଙ୍ଗରେ ରବି ଶଙ୍କର କୌଣସି ଉତ୍ତର ରଖିନାହାଁନ୍ତି ।
ସେପଟେ ରାଜ୍ୟରେ 30 ଗୋଟି ଆସନରେ ବିଜୟ ହୋଇଥିବା କଂଗ୍ରେସ ସରକାର ଗଠନ ପାଇଁ ଉଦ୍ୟମ କରିଥିଲା । ହେଲେ ବିଜେପିର ରଣନୀତି ଆଗରେ ଦଳ ହାର ମାନିଛି । ତେବେ କଂଗ୍ରେସର ମୁଖ୍ୟମନ୍ତ୍ରୀ ପଦ ପାଇଁ ଦାବିଦାର ଥିବା ଭୁପିନ୍ଦର ସିଂ ହୁଡା ଆଜି ଦଳର କାର୍ଯ୍ୟକାରୀ ସଭାପତି ସୋନିଆ ଗାନ୍ଧୀଙ୍କୁ ସାକ୍ଷାତ କରି ପରବର୍ତ୍ତୀ କାର୍ଯ୍ୟପନ୍ଥା ନେଇ ଆଲୋଚନା କରିଛନ୍ତି ।
