ଢେଙ୍କାନାଳ: ଶ୍ବଶୁର ବୋହୂ ସମ୍ପର୍କରେ ରକ୍ତର ଛିଟା । ସାମାନ୍ୟ ବଚସାରୁ ଗଡିଲା ମୁଣ୍ଡ । ମଦ୍ୟପ ଶ୍ବଶୁରକୁ ଟାଙ୍ଗିଆରେ ଆଣି ହତ୍ୟା କଲା ବୋହୂ। ଏଭଳି ଲୋମଟାଙ୍କୁରା ଘଟଣା ଘଟିଛି ଢେଙ୍କାନାଳ ପରଜଙ୍ଗ ଥାନା ଅନ୍ତର୍ଗତ କୁଟୁରିଆ ଗାଁରେ । ମୃତ ବୃଦ୍ଧ ଜଣଙ୍କ ହେଉଛନ୍ତି ବେଣୁଧର ପ୍ରଧାନ । ଶ୍ବଶୁର ଆକ୍ରମଣରେ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି ହେଲେ ବୋହୂ ଯଶୋଦା ପ୍ରଧାନ ।
ମିଳିଥିବା ସୂଚନା ଅନୁଯାୟୀ, ଗତକାଲି (ଶନିବାର) ରାତିରେ କୌଣସି କାରଣକୁ ନେଇ ଶ୍ବଶୁର ବୋହୂଙ୍କ ମଧ୍ୟରେ ବଚସା ହୋଇଥିଲା । ପରେ କଳି ଉଗ୍ର ରୂପ ନେବାରୁ ମଦ୍ୟପ ଶ୍ବଶୁର ଏକ ଟାଙ୍ଗିଆରେ ବୋହୂକୁ ଆକ୍ରମଣ କରିଥିଲା । କିନ୍ତୁ ପାଲଟା ଟାଙ୍ଗିଆ ଚୋଟରେ ଶ୍ୱଶୁରର ମୃତ୍ୟୁ ହୋଇଥିଲା । ଶ୍ବଶୁର ଆକ୍ରମଣରେ ବୋହୂ ଗୁରୁତର ହେବାରୁ ପ୍ରଥମେ ପରଜଙ୍ଗ ଓ ପରେ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସା ପାଇଁ ଭର୍ତ୍ତି କରାଯାଇଥିବା ଜଣାପଡିଛି । ବେଣୁଧର ପ୍ରଧାନଙ୍କୁ ପରଜଙ୍ଗ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ଏନେଇ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ପାରିବାରିକ କଳହରୁ ଏହି ହତ୍ୟାକାଣ୍ଡ ଘଟିଥିବା ସୂଚନା ଦେଇଛି ।
