ସମ୍ବଲପୁର: ଆଜି ହେଉଛି ନୂଆବର୍ଷର ପ୍ରଥମ ଦିବସ । ବର୍ଷ 2019କୁ ବିଦାୟ ଦେଇ ସମସ୍ତେ ନୂଆବର୍ଷ 2020କୁ ସ୍ବାଗତ କରିଛନ୍ତି । ଆଉ ଏହି ଅବସରରେ ସମ୍ବଲପୁରର ଅଧିଷ୍ଠାତ୍ରୀ ଦେବୀ ମା ସମଲେଶ୍ବରୀଙ୍କ ପୀଠରେ ଶ୍ରଦ୍ଧାଳୁଙ୍କ ଭିଡ଼ ଜମିଥିଲା । ମା' ସମଲେଶ୍ବରୀଙ୍କ ଆଶିଷ ନେଇ ନୂଆ ବର୍ଷର ଶୁଭାରମ୍ଭ କରିବା ସହ ବର୍ଷ ତମାମ ଯେପରି ପରିବାରର ସମସ୍ତେ ସୁଖ ଶାନ୍ତିରେ ରହିବେ ଏହି କାମନା ନେଇ ଆଜି ସମସ୍ତେ ସମଲେଶ୍ବରୀଙ୍କ ଆଗରେ ପ୍ରାର୍ଥନା କରିଛନ୍ତି ।
ନୂଆବର୍ଷ ଅବସରରେ ମା ସମଲେଶ୍ବରୀଙ୍କ ପୀଠରେ ଶ୍ରଦ୍ଧାଳୁଙ୍କ ପ୍ରବଳ ଗହଳି ଦେଖିବାକୁ ମିଳିଛି । ଆଜି ସକାଳୁ ମାଆଙ୍କ ପୀଠରେ ଲମ୍ବା ଧାଡି ଦେଖିବାକୁ ମିଳିଛି । ସମସ୍ତେ ଶ୍ରଦ୍ଧା ଓ ହାତରେ ପୂଜା ସାମଗ୍ରୀ ଧରି ମାଆଙ୍କ ଟିକେ ଦର୍ଶନ ପାଇଁ ଛିଡ଼ା ହୋଇଥିବା ଦେଖିବାକୁ ମିଳିଛି ।
ସକାଳ 5ଟାରୁ ବିଧିପୂର୍ବକ ପୂଜାର୍ଚ୍ଚନା ସରିବା ପରେ ଶ୍ରଦ୍ଧାଳୁ ମାନଙ୍କ ପାଇଁ ସମଲେଶ୍ବରୀ ମନ୍ଦିର ଦ୍ବାର ଖୋଲିଥିଲା । ଭକ୍ତଙ୍କ ପ୍ରବଳ ସମାଗମକୁ ଦେଖି ଧାଡି ଦର୍ଶନର ବ୍ୟବସ୍ଥା କରାଯାଇଛି । ସକାଳ 5 ଟାରୁ ରାତ୍ରି 11ଟା ପର୍ଯ୍ୟନ୍ତ ମାଙ୍କୁ ଶ୍ରଦ୍ଧାଳୁ ଦର୍ଶନ କରି ପାରିବେ ।
ସମଲେଶ୍ବରୀ ପୀଠରେ ପାଖାପାଖି 1 ଲକ୍ଷ ଶ୍ରଦ୍ଧାଳୁଙ୍କ ସମାଗମ ହୋଇଥିବା ମନ୍ଦିର ଟ୍ରଷ୍ଟ ବୋର୍ଡ ତରଫରୁ କୁହାଯାଇଛି । ଏଥିପାଇଁ ଖେଚୁଡ଼ି ଭୋଗର ବ୍ୟବସ୍ଥା କରାଯାଇଛି । ଶାନ୍ତିଶୃଙ୍ଖଳା ରକ୍ଷା ପାଇଁ ସମ୍ବଲପୁର ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି ।
ସମ୍ବଲପୁରରୁ ବାଦଶାହ ଜୁସ୍ମନ ରାଣା, ଇଟିଭି ଭାରତ
