ସମ୍ବଲପୁର: ହରଡଘଣାରେ ପଡିଲେ ନକଲି କ୍ରୀଡା ଶିକ୍ଷକ । ମହଙ୍ଗା ପଡିଲା ଜାଲ ସାର୍ଟିଫିକେଟ ଦେଇ ଚାକିରି କରିବା । ଏନେଇ ସମ୍ବଲପୁର ଯୁଜୁମୁରା ଥାନାରେ ନକଲି କ୍ରୀଡା ଶିକ୍ଷକଙ୍କ ବିରୋଧରେ ଏତଲା ଦେଇଛନ୍ତି ବିଇଓ । ଯୁଜୁମୁରା ହାଇସ୍କୁଲରେ ଜାଲ ସାର୍ଟିଫିକେଟ ଦେଇ କ୍ରୀଡା ଶିକ୍ଷକ ଭାବେ କାର୍ଯ୍ୟ କରୁଥିବା ମନୋରଞ୍ଜନ ଦେହୁରୀଙ୍କ ବିରୁଦ୍ଧରେ ଯୁଜୁମୁରା ବ୍ଲକ ଶିକ୍ଷା ଅଧିକାରୀ ଲିଖିତ ଅଭିଯୋଗ କରିଛନ୍ତି ।
ସୂଚନା ଅନୁସାରେ, ସମ୍ବଲପୁର ଜିଲ୍ଲାର ଯୁଜୁମୁରା ହାଇସ୍କୁଲର ମନୋରଞ୍ଜନ ଦେହୁରୀ ନାମକ ଜଣେ କ୍ରୀଡା ଶିକ୍ଷକ ଚାକିରି କରିବା ସମୟରେ ଯୁକ୍ତ ଦୁଇର ଜାଲ ସାର୍ଟିଫିକେଟ ଦେଇଥିବା ଅଭିଯୋଗ ହୋଇଛି । ଏନେଇ ବିଭାଗୀୟ ତଦନ୍ତ କରାଯିବା ପରେ ଶିକ୍ଷକ ଜାଲ୍ ସାର୍ଟିଫିକେଟ ଦେଇ ଚାକିରି ହାତେଇଥିବା ସ୍ପଷ୍ଟ ହୋଇଥିଲା। ପରେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ବ୍ଳକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ପକ୍ଷରୁ ପଦକ୍ଷେପ ନିଆଯାଇଛି ।
କ୍ରୀଡା ଶିକ୍ଷକ ଜଣକ ନିଜେ ଚାକିରୀରୁ ଇସ୍ତଫା ଦେଇ ଥିବା ଜଣାପଡିଛି । ସେପଟେ,ନକଲି ସାର୍ଟିଫିକେଟ ଦେଇ ଚାକିରୀ ହାତେଇଥିବା ନେଇ ସମ୍ପୃକ୍ତ ଶିକ୍ଷକଙ୍କ ନାଁରେ ଥାନାରେ ମାମଲା ରୁଜୁ କରିଛନ୍ତି ଜୁଜୁମୁରା ବ୍ଳକ ଶିକ୍ଷା ଅଧିକାରୀ ଭଗବାନ ବାଙ୍କିରା । ଏନେଇ ପୋଲିସ ଘଟଣାର ତଦନ୍ତ ଆରମ୍ଭ କରିଛି।
ସମ୍ବଲପୁରରୁ ବାଦଶାହ ଜୁସ୍ମନ ରଣା,ଇଟିଭି ଭାରତ
