ସମ୍ବଲପୁର: ଚକବନ୍ଦୀ ବନ୍ଦୋବସ୍ତକୁ ନେଇ ସମ୍ବଲପୁରରେ ଚାଷୀ ଅସନ୍ତୋଷ। ସମ୍ବଲପୁର ମହାନଗର ଆଖପାଖର ମାନେଶ୍ବର ବ୍ଲକ ଅଧୀନରେ ଥିବା 22 ଖଣ୍ଡ ଗାଁରେ ଦେଖାଯାଇଛି ଚାଷୀ ଅସନ୍ତୋଷ। ତେବେ ସ୍ବଳ୍ପ ବୃଷ୍ଟି, ମରୁଡି, ଅଭାବୀ ଧାନ ବିକ୍ରୀ କିମ୍ବା ସାର ବିକ୍ରି ପାଇଁ ନୁହେଁ ବରଂ ସରକାର ଚକବନ୍ଦୀ ବନ୍ଦୋବସ୍ତକୁ ନେଇ ଚାଷୀ ରାସ୍ତାକୁ ଓହ୍ଲାଇଛନ୍ତି।
1980ରୁ ଏହି ଆଇନ ବା ବ୍ୟବସ୍ଥା ଆସିଥିଲେ ମଧ୍ୟ ଚାଷୀଙ୍କୁ ଏହାର ଗାଇଡ଼ ଲାଇନ ଅନୁସାରେ ସୁବିଧା ମିଳୁ ନଥିବାରୁ ଏହି ବନ୍ଦୋବସ୍ତକୁ ବିରୋଧ କରିବା ସହ ନୂତନ ବ୍ୟବସ୍ଥା ପ୍ରଚଳନ କରିବାକୁ ଚାଷୀ ଦାବି କରିଛନ୍ତି । ଏହାସହ ସୋମବାର ଏହି 22 ଖଣ୍ଡ ଗାଁର ଚାଷୀ ମାନେଶ୍ୱର ବ୍ଲକ ଓ ତହସିଲ କାର୍ଯ୍ୟାଳୟ ଘେରାଉ କରିଛନ୍ତି ଚାଷୀ ।
ଏହି ବନ୍ଦୋବସ୍ତ ଅନୁସାରେ ପ୍ରତ୍ୟେକ ଜମିକୁ ରାସ୍ତାର ସୁବିଧା, କେନାଲ ବା କରନାଳର ସୁବିଧା ରହିବା ଦରକାର। ତେବେ ଏହି ସୁବିଧା 40 ବର୍ଷ ହେଲା ଦିଆଯାଉନଥିବାରୁ ମେଜର ବନ୍ଦୋବସ୍ତ ଅନୁସାରେ ଲୋକେ ଘର ବାଡ଼ି କରି ଚାଷ କରି ଆସୁଥିବା ବେଳେ ଗତ 19.2.2016 ମସିହାରେ ଜିଲ୍ଲା ପ୍ରଶାସନ ହଠାତ ଚକବନ୍ଦୀ ବ୍ୟବସ୍ଥା ଅନୁଯାୟୀ କର ଖଜଣା ଆଦାୟ କରିବାର ନିର୍ଦ୍ଦେଶ ଦେଇଥିଲେ ।
ଅନ୍ୟପଟେ ଚକବନ୍ଦୀ ବ୍ୟବସ୍ଥାର କୌଣସି ସୁବିଧା ମଧ୍ୟ ଦେଲେ ନାହିଁ । ଫଳରେ ଚାଷୀ ଏହାକୁ ବିରୋଧ କରିଆସୁଛନ୍ତି। ଅନ୍ୟ ପଟେ ସରକାର 3 ବର୍ଷ ହେଲା ଜୋର ଜବରଦସ୍ତ ଚକବନ୍ଦୀ ବ୍ୟବସ୍ଥା ଅନୁଯାୟୀ କର ଆଦାୟ କରୁଥିବାର ଅଭିଯୋଗ କରିଛନ୍ତି ଚାଷୀ। ତେବେ ଏହି 22 ଟି ଗାଁ 1972 ମସିହାରେ ଟାଉନ ପ୍ଲାନିଂ ବ୍ୟବସ୍ଥାରେ ଆସୁଥିବା ବେଳେ ଆଇନ ଅନୁସାରେ ଏଠାରେ ଚକବନ୍ଦୀ ବ୍ୟବସ୍ଥା ହେବା କଥା ନୁହେଁ । ମାତ୍ର କେଉଁ ଆଧାରରେ ଏଠାରେ ଚକବନ୍ଦୀ ବ୍ୟବସ୍ଥା କରାଗଲା ବୋଲି ଚାଷୀ ପ୍ରଶ୍ନ କରିବା ସହ ମାନେଶ୍ୱର ତହସିଲ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରି ତହସିଲଦାର ଜରିଆରେ ମୁଖ୍ୟମନ୍ତ୍ରୀଙ୍କୁ ଏକ ଦାବି ପତ୍ର ପ୍ରଦାନ କରିଛନ୍ତି ।
ଏହି ଦାବିପତ୍ରରେ ଚକବନ୍ଦୀ ବ୍ୟବସ୍ଥା ବନ୍ଦ କରି ମେଜର ଅଥବା ମେଜର ବନ୍ଦୋବସ୍ତ ଅନୁସାରେ ଏକ ନୂତନ ବନ୍ଦୋବସ୍ତ ପ୍ରଚଳନ କରାଯାଉ ବୋଲି ଦାବି ହୋଇଛି। ଅନ୍ୟପଟେ ତହସିଲଦାର ଏନେଇ ହେଉଥିବା ଅସୁବିଧାକୁ ସ୍ୱୀକାର କରୁଥିବା ବେଳେ ନିଜର ଅସହାୟତା ପ୍ରକଟ କରିଛନ୍ତି।
ସମ୍ବଲପୁରରୁ ବାଦଶାହା ଜୁସମନ ରଣା, ଇଟିଭି ଭାରତ
