ସମ୍ବଲପୁର: ମାନେଶ୍ବର ବ୍ଲକ ଅନ୍ତର୍ଗତ ଛାନପାଲିସ୍ଥିତ ଜିଲ୍ଲା ଶିଶୁ ସୁରକ୍ଷା ବିଭାଗ ଅଧୀନରେ ଥିବା ରୁକ୍ମିଣୀ ଲାଠ ବାଳ ନିକେତନର ଅଧୀକ୍ଷକ ପଦବୀ ନିଯୁକ୍ତିରେ ଅନିୟମିତତା ହୋଇଥିବା ଅଭିଯୋଗ । ଏନେଇ ସେ ସୂଚନା ଅଧିକାର ଆଇନ ବଳରେ ପାଇଥିବା ତଥ୍ୟକୁ ଭିତ୍ତି କରି ଅଭିଯୋଗ କରିଛନ୍ତି ପୂର୍ବତନ ସ୍ଥାନୀୟ ସରପଞ୍ଚ ତଥା ସୂଚନା ଅଧିକାର କର୍ମୀ ସଞ୍ଜୟ ଛୁରିଆ । ଏହା ସହ ଏହି ଅନିୟମିତତା ନେଇ ସେ ସମ୍ବଲପୁର ଅତିରିକ୍ତ ଜିଲ୍ଲାପାଳଙ୍କ ନିକଟରେ ଅଭିଯୋଗ ମଧ୍ୟ କରିଛନ୍ତି ।
ମିଳିଥିବା ସୂଚନା ଅନୁସାରେ, ଗତ 24 ଜୁଲାଇ 2019ର ଅଧୀକ୍ଷକ ନିଯୁକ୍ତି ବିଜ୍ଞାପନରେ ପ୍ରାର୍ଥୀମାନେ ଆବେଦନ କରିଥିଲେ। ମାର୍କକୁ ଆଧାର କରି ନିଯୁକ୍ତି ଦିଆଯିବ ବୋଲି ବିଜ୍ଞାପନରେ ଉଲ୍ଲେଖ ରହିଥିଲା । ତେବେ 3 ଆବେଦନକାରୀ ପ୍ରାର୍ଥୀଙ୍କୁ ଚୟନ କରାଯାଇ ତାଲିକାଭୁକ୍ତ କରି ଗତ ଏପ୍ରିଲ ୯ ତାରିଖରେ ପ୍ରମାଣପତ୍ର ଯାଞ୍ଚ ପାଇଁ ଡକିଥିଲେ କର୍ତ୍ତୃପକ୍ଷ । ତେବେ ତାଲିକାରେ ପ୍ରଥମ ସ୍ଥାନରେ ଥିବା ପ୍ରାର୍ଥୀ ଅନୁପସ୍ଥିତ ଥିବାବେଳେ ଦ୍ଵିତୀୟ ସ୍ଥାନରେ ଥିବା ପ୍ରାର୍ଥୀଙ୍କୁ ନିଯୁକ୍ତି ନ ଦିଆଯାଇ ୩ୟ ସ୍ଥାନରେ ଥିବା ମହିଳା ପ୍ରାର୍ଥୀଙ୍କୁ ଜାଲିଆତି କରି ନିଯୁକ୍ତି ଦିଆଯାଇଛି ବୋଲି ସୂଚନା ଅଧିକାର କର୍ମୀ ସଞ୍ଜୟ ଛୁରିଆ ଅଭିଯୋଗ କରିଛନ୍ତି ।
