ରାଉରକେଲା: ସୁନ୍ଦରଗଡ ଜିଲ୍ଲା ଗସ୍ତରେ ରାଜ୍ୟ ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା । ସୋମବାର ଏହି ଗସ୍ତ ସମୟରେ ସେ ବିରମିତ୍ରପୁରରେ ଥିବା ଏକ କଲ୍ୟାଣ ମଣ୍ଡପର ଉଦଘାଟନ କରିଛନ୍ତି । ଏହାସହ ବିଭିନ୍ନ ପ୍ରକଳ୍ପର ଶିଳାନ୍ୟାସ କରିଥିଲେ ।
ଖବର ଅନୁଯାୟୀ, ସାରଦୀୟ ଦୁର୍ଗାପୂଜା ପରେ ସହରକୁ ଏଲିଡି ଲାଇଟରେ ଆଲୋକିତ କରାଯିବ ବୋଲି ମନ୍ତ୍ରୀ କହିଛନ୍ତି । ତେବେ ବିରମିତ୍ରପୁର ପୌରପାଳିକା ପକ୍ଷରୁ ନିର୍ମିତ କଲ୍ୟାଣ ମଣ୍ଡପରେ ବିବାହ,ସଭା ସମିତି ଲାଗି ବହୁ ସୁବିଧା ରହିଥିବା ବେଳେ ଆଗାମୀ ଦିନରେ ଅଧିକ ସୁବିଧା ପ୍ରଦାନ କରାଯିବ ବୋଲି ମନ୍ତ୍ରୀ କହିଛନ୍ତି ।
ଏହାଛଡା ଶ୍ରୀ ଜେନା ବିରମିତ୍ରପୁରରେ ଏକ ସ୍ମାର୍ଟ ପାର୍କର ଶିଳାନ୍ୟାସ କରିବା ସହ 20 କୋଟି ଅର୍ଥ ବ୍ୟୟରେ କାର୍ଯ୍ୟକାରୀ କରାଯାଉଥିବା ପାନୀୟ ଜଳ ପ୍ରକଳ୍ପର ସମୀକ୍ଷା କରିଛନ୍ତି । 2020 ସୁଦ୍ଧା ଏହି ପାନୀୟ ଜଳ ପ୍ରକଳ୍ପ ସମ୍ପୂର୍ଣ୍ଣ ହୋଇ ବିରମିତ୍ରପୁରବାସୀଙ୍କ ଜଳ କଷ୍ଟ ଦୂର କରିବ ବୋଲି ମନ୍ତ୍ରୀ କହିଛନ୍ତି । ରାଉରକେଲାର ବିଧାୟକ ସାରଦା ପ୍ରସାଦ ନାୟକ, ରାଜଗାଙ୍ଗପୁରର ପୂର୍ବତନ ବିଧାୟକ ମଙ୍ଗଳ କିଷାନଙ୍କ ସହିତ ଅନ୍ୟ ବିଜେଡ଼ି ନେତା ମାନେ ମନ୍ତ୍ରୀଙ୍କ ସହିତ କାର୍ଯ୍ୟକ୍ରମରେ ଉପସ୍ଥିତ ଥିଲେ ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
