ରାଉରକେଲା: ସୁନ୍ଦରଗଡ ଜିଲ୍ଲାପାଳ ନିଖିଲ ପୱନ କଲ୍ୟାଣ ଓ ରାଉରକେଲା ଏସପି କେ ଶିବା ସୁବ୍ରମଣୀ ଶୁକ୍ରବାର ଦିନିକିଆ କୋଇଡା ଗସ୍ତରେ ଆସି ବିଭିନ୍ନ ସମସ୍ୟା ଉପରେ ଆଲୋଚନା କରିଛନ୍ତି । ଏହାସହିତ ସମସ୍ୟାର ତୁରନ୍ତ ସମାଧାନ ପାଇଁ ବିଭାଗୀୟ ଅଧିକାରୀଙ୍କ ସହିତ ଆଲୋଚନା କରିଛନ୍ତି ।
ଜିଲ୍ଲାପାଳ ଓ ଏସପି କୋଇଡାରେ ପହଞ୍ଚି ପ୍ରଥମେ ୨୧୫/୫୨୦ ଜାତୀୟ ରାଜପଥର ରାସ୍ତା ପରିଦର୍ଶନ କରି ଟ୍ରାଫିକ ସମସ୍ୟା ଉପରେ ଆଲୋଚନା କରିଥିଲେ । ରେଙ୍ଗାଳବେଢ଼ା ଠାରୁ ନାରାୟଣପୋଷ ଛକ ପର୍ଯ୍ୟନ୍ତ ନିର୍ମାଣ ଚାଲିଥିବା ବାଇପାସ ରାସ୍ତାର କାର୍ଯ୍ୟ ତୁରନ୍ତ ଶେଷ କରିବାକୁ ବିଭାଗୀୟ ଅଧିକାରୀଙ୍କୁ ନିର୍ଦେଶ ଦେବା ସହିତ କେନ୍ଦୁଝର ଓ ସୁନ୍ଦରଗଡର ସୀମାକୁ ଯାଇ ରାସ୍ତାର ପରିଦର୍ଶନ କରି ଟ୍ରାଫିକ ନିୟମକୁ କଡାକଡି କରିବା ପାଇଁ ବଣାଇ ଅତିରିକ୍ତ ଏସପି ଓ ସ୍ଥାନୀୟ ଥାନା ଅଧିକାରୀଙ୍କୁ ଏସପି ନିର୍ଦ୍ଦେଶ ଜାରି କରିଥିଲେ ।
ପରେ କୋଇଡା ଠାରୁ ରେଙ୍ଗାଳବେଢା ରାସ୍ତାର ଦୂରାବସ୍ଥା ଦେଖିବା ପରେ ଯଥାଶୀଘ୍ର ଏହି ରାସ୍ତାକୁ ଉନ୍ନତି କରଣ କରାଇବା ସହିତ ତୁରନ୍ତ କାର୍ଯ୍ୟ ସମ୍ପର୍ଣ୍ଣ କରିବା ପାଇଁ ବିଭାଗୀୟ ଅଧିକାରୀଙ୍କୁ ଖୋଦ ଜିଲ୍ଲାପାଳ ନିର୍ଦ୍ଦେଶ ଜାରି କରିଥିଲେ । ପରେ ବ୍ଲକ କାର୍ଯ୍ୟାଳୟରେ ପହଞ୍ଚି କୋଇଡା ବିଡିଓ ଓ ତହସିଲଦାର ସହିତ ବ୍ଲକରେ ଲଘୁଚାପ ଜନିତ କ୍ଷୟକ୍ଷତି, ରାସ୍ତାଘାଟର ଦୂରାବସ୍ଥା, ନାରାୟଣପୋଷସ୍ଥିତ ରାଜାମୁଣ୍ତା-ପାଣିକୋଇଲି ୨୧୫/୫୨୦ ରାଜପଥର ଅସ୍ଥାୟୀ କାରୋପୋଲ ଭାସି ଯିବା, ଲୌହପଥର ପରିବହନ ବାଧାପ୍ରାପ୍ତ , ଗିତାରାଣୀ ଲୌହଖଣି ସାମ୍ନାରେ ପାର୍କିଂ ରାସ୍ତା ପାର୍ଶ୍ବରେ ଥିବା ସମସ୍ତ ଗ୍ୟାରେଜକୁ ଅନ୍ୟତ୍ର ସ୍ଥାନାନ୍ତର ସହିତ ରାସ୍ତାକଡରେ ବେଆଇନ ପାର୍କିଂ ବନ୍ଦ କରିବା ସହ ବିଭିନ୍ନ ସମସ୍ୟା ଓ ଏହାର ସମାଧାନ ଉପରେ ଆଲୋଚନା କରିଥିଲେ ।
ଶେଷରେ କୋଇଡାରେ ୧୦୦ ଶଯ୍ୟା ବିଶିଷ୍ଟ ଜେ.ଏସ୍.ଡବ୍ଲୁ ହସ୍ପିଟାଲ୍ ପାଇଁ ସରଗିଗଡ ଓ ଡେଙ୍ଗୁଳାରେ ଜମି ପରିଦର୍ଶନ କରିବା ସହିତ ମଡେଲ ବିଦ୍ୟାଳୟ ଓ ଲୌହପଥର ବୋଝେଇ ଯାଞ୍ଚ କରିବା ସହଫାଟକ ନିର୍ମାଣ ଲାଗି ସ୍ଥାନ ବୁଲି ଦେଖିଥିଲେ । ଏହି ଗସ୍ତରେ ବଣାଇ ଉପଜିଲ୍ଲାପାଳ - ପ୍ରଦୀପ କୁମାର ଡାଙ୍ଗ, ପୃର୍ତ୍ତ ବିଭାଗର ଏକ୍ସିକ୍ୟୁଟିଭ୍ ଦୁର୍ଗା ଚରଣ ବେହେରା, ଏନ୍.ଏଚ୍.ଆଇ ଆର ପିଡିଙ୍କ ସମେତ ଅନ୍ୟ ବିଭାଗର ବିଭାଗୀୟ ଅଧିକାରୀମାନେ ଉପସ୍ଥିତ ରହିଥିଲେ ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
