ରାଉରକେଲା: କନ୍ୟା ସନ୍ତାନ ଜନ୍ମ ଦେବା ପୂର୍ବରୁ ଚାଲିଗଲା ମା’ର ଜୀବନ। କନ୍ୟା ସନ୍ତାନ ଜନ୍ମ ଦେବା ପୂର୍ବରୁ ମହିଳାଙ୍କୁ ଶାଶୁଘର ଲୋକେ ପୋଡି ମାରିଦେଇଥିବା ଅଭିଯୋଗ ହୋଇଛି। ଏନେଇ ବନ୍ଧମୁଣ୍ଡା ପୋଲିସ ସ୍ବାମୀଙ୍କ ସହିତ 4 ଜଣଙ୍କୁ ଗିରଫ କରିଛି।
ସୂଚନା ଅନୁସାରେ, ଗୋପବନ୍ଧୁପଲ୍ଲୀ ବାସିନ୍ଦା ଶିବ ପ୍ରସାଦ ସୋନକରଙ୍କ ଝିଅ ରାଧାଙ୍କ କୋଇଲା ଗେଟ ବାସିନ୍ଦା ବିନୋଦ ସିଂଙ୍କ ସହ ବିବାହ ହୋଇଥିଲା । ବିବାହର କିଛି ବର୍ଷ ପରେ, ରାଧାଙ୍କ ପ୍ରଥମ କନ୍ୟା ସନ୍ତାନ ଜନ୍ମ ହୋଇ ମୃତ୍ୟୁ ବରଣ କରିଥିବା ବେଳେ ଦ୍ଵିତୀୟ ଝିଅଟି ଜନ୍ମ ହୋଇଥିଲା। ରାଧା ତୃତୀୟ ସନ୍ତାନ ପାଇଁ 5 ମାସର ଗର୍ଭବତୀ ଥିବା ବେଳେ ତାଙ୍କର ଭୃ୍ଣ ପରୀକ୍ଷା କରିଥିଲେ ଶ୍ୱଶୁର ଘର ଲୋକେ । ଯାହା ଆଇନ ଅନୁଯାୟୀ ଦଣ୍ଡନୀୟ ଅପରାଧ ।
ତୃତୀୟଟି କନ୍ୟା ସନ୍ତାନ ଥିବା ଜାଣି ଶ୍ବଶୂର ଘର ତାଙ୍କୁ ପୋଡି ମାରିଦେବାକୁ ଉଦ୍ୟମ କରିଥିଲେ । ହେଲେ ଗୁରୁତର ଅବସ୍ଥାରେ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କର ମୃତ୍ୟୁ ହୋଇଥିଲା। ମାଜିଷ୍ଟ୍ରେଟଙ୍କ ଉପସ୍ଥିତିରେ ପୋଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର , ଇଟିଭି ଭାରତ
