ରାଉରକେଲା: ମାଜାରେ ନିଶା ଦ୍ରବ୍ୟ ମିଶାଇ ମହିଳାଙ୍କ ଠାରୁ ଲୁଟ। ଏଭଳି ଅଭାବନୀୟ ଘଟଣା ରାଉରକେଲା ଷ୍ଟେସନରେ ଦେଖିବାକୁ ମିଳିଛି। ଝାରସୁଗୁଡାରୁ ବାମଡା ଟ୍ରେନରେ ଯାଉଥିବା ବେଳେ କବିତା ଅଗ୍ରୱାଲ ନାମକ ମହିଳା ଏହି ଲୁଟର ଶିକାର ହୋଇଛନ୍ତି।
ଏହାପରେ ମହିଳା ଜଣଙ୍କୁ ଅଚେତ ଅବସ୍ଥାରେ ଉଦ୍ଧାର କରାଯାଇଥିଲା। ପରେ ପରେ ଆରପିଏଫ ସହାୟତାରେ ଚିକିତ୍ସା ପାଇଁ ଆରଜିଏଚକୁ ପଠାଯାଇଥିଲା । ଘଟଣାର ଖବର ପାଇବା ପରେ ଚ୍ୟାମ୍ବର ଅଫ କମର୍ଷ ଏଣ୍ଡ ଇଣ୍ଡଷ୍ଟ୍ରି ସଭାପତି ପ୍ରବୀଣ ଗର୍ଗ ମହିଳାଙ୍କ ପରିବାର ବର୍ଗଙ୍କୁ ଖବର ଦେଇଥିଲେ। ଏହାପରେ ରାଉରକେଲାରେ ଥିବା ମହିଳାଙ୍କ ସମ୍ପର୍କୀୟଙ୍କ ସହାୟତାରେ ତାଙ୍କୁ ଚିକିତ୍ସା ପାଇଁ ଲାଇଫ ଲାଇନ ହସ୍ପିଟାଲରେ ଭର୍ତ୍ତି କରାଯାଇଥିଲା।
ଏହି ଘଟଣା ପରେ ସ୍ପଷ୍ଟ ହୋଇଛି ଯେ, ନିଶାଦ୍ରବ୍ୟ ଦେଇ ଯାତ୍ରୀଙ୍କ ପାଖରୁ ଲୁଟ୍ କରୁଥିବା ଗ୍ୟାଙ୍ଗ ପୁଣି ରାଉରକେଲାରେ ସକ୍ରିୟ ହୋଇଛନ୍ତି। ବର୍ତ୍ତମାନ ଏହି ଗ୍ୟାଙ୍ଗକୁ ଧରିବା ରେଳ ପୋଲିସ ତଥା RPF ପାଇଁ ଖୋଲା ଚ୍ୟାଲେଞ୍ଜ ହୋଇଯାଇଛି।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
