ରାଉରକେଲା: କୋରୋନା ଲକଡାଉନ ନିୟମକୁ ନଜରରେ ରଖି ପ୍ରଶାସନର ଗୁରୁତ୍ବପୂର୍ଣ୍ଣ ନିଷ୍ପତ୍ତି । ଏଣିକି ସକାଳ 6 ରୁ 11 ଏବଂ ସଂଧ୍ୟା 5 ରୁ 8ଟା ବ୍ୟତୀତ ଅନ୍ୟ ସମୟରେ ସଂପୂର୍ଣ୍ଣ ଲକଡାଉନ ରହିବ ସହର । କେବଳ ଔଷଧ ଦୋକାନକୁ ଛାଡି ଅନ୍ୟ ସମସ୍ତ ଦୋକାନ ବଜାର ବନ୍ଦ ରହିବା ନେଇ ନିଷ୍ପତ୍ତି ହୋଇଛି ।
କୋରୋନା ସଂକ୍ରମଣକୁ ରୋକିବା ପାଇଁ ଏପରି ନିଷ୍ପତ୍ତି ନେଇଛି ପ୍ରଶାସନ । ଏହି ନୂଆ ଘୋଷଣା ଅନୁଯାୟୀ ଔଷଧ ଦୋକାନକୁ ଛାଡି ଅନ୍ୟ ସମସ୍ତ ଦୋକାନ ବଜାର, ବ୍ୟାବସାୟିକ ପ୍ରତିଷ୍ଠାନ ଆଦି ବନ୍ଦ ରହିବ । ତେଣୁ କେବଳ ସକାଳ 6 ଟାରୁ 11ଟା ପର୍ଯ୍ୟନ୍ତ ଏବଂ ସଂଧ୍ୟା 5 ଟାରୁ 8ଟା ପର୍ଯ୍ୟନ୍ତ ରାସନ ସାମଗ୍ରୀ, ପନିପରିବା, ମାଛ, ମାଂସ ଓ ଅଣ୍ଡା ଦୋକାନ ଖୋଲା ରହିବ ।
ଏହି ସମୟକୁ ଛାଡ଼ି ଅନ୍ୟ ସମସ୍ତ ସମୟରେ ରାଉରକେଲାରେ ସଂପୂର୍ଣ୍ଣ ଲକଡାଉନ ଘୋଷଣା କରାଯାଇଛି । ଏହି ସମୟରେ ଜରୁରୀକାଳୀନ ସେବାକୁ ବାଦ ଦେଇ ଅନ୍ୟ କୌଣସି ବି କାର୍ଯ୍ୟରେ କେହି ବି ଘର ବାହାରକୁ ବାହାରିପାରିବେ ନାହିଁ । କୌଣସି ଯାନବାହନ ବି ଚଳାଚଳ କରିପାରିବ ନାହିଁ । ଯିଏ ଏହି ସମୟରେ ବାହାରକୁ ବାହାରିବେ, ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରଶାସନ ପକ୍ଷରୁ ଚେତାଇ ଦିଆଯାଇଛି ।
ଶୁକ୍ରବାର ସନ୍ଧ୍ୟାରେ ରାଉରକେଲା ଏସପିଙ୍କ କାର୍ଯ୍ୟାଳୟରେ ଅନୁଷ୍ଠିତ ଏକ ମିଳିତ ବୈଠକରେ ଏହି ନିଷ୍ପତ୍ତି ନିଆଯାଇଛି । ଏହି ବୈଠକରେ ରାଉରକେଲା ଏସପି, ରାଉରକେଲା ମହାନଗର ନିଗମ କମିଶନର ଏବଂ ଅନ୍ୟ ବରିଷ୍ଠ ପ୍ରଶାସନିକ ଅଧିକାରୀ ଉପସ୍ଥିତ ରହିଥିଲେ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
