ରାଉରକେଲା: ଜୁନ 7 ତାରିଖ ସନ୍ଧ୍ୟାରେ ରାଉରକେଲା ରେଲଓ୍ବେ କୋଲୋନୀରେ ଘଟି ଥିବା ଦିଲଶାଦ ଖାନ ହତ୍ୟା ମାମଲାରେ ପୋଲିସକୁ ମିଳିଛି ସଫଳତା । ଏହି ହତ୍ୟା ମାମଲାରେ ରାଉରକେଲା ପୋଲିସ 9 ଜଣ ଅଭିଯୁକ୍ତଙ୍କୁ ଗିରଫ କରିଛି । ପୂର୍ବ ଶତ୍ରୁତାକୁ କେନ୍ଦ୍ରକରି ଏହି ହତ୍ୟାକାଣ୍ଡ ଘଟି ଥିବା ବେଳେ ଏହି ଘଟଣାରେ ଜଡ଼ିତ ଅନ୍ୟ 3 ଜଣଙ୍କୁ ଧରିବାକୁ ପୋଲିସ ଵିଭିନ୍ନ ସ୍ଥାନରେ ଚଢ଼ାଉ କରୁଛି ।
ହତ୍ୟାରେ ବ୍ୟବହୃତ ଲୁହାରଡ଼ ସହ ଅନ୍ୟ ମାରଣାସ୍ତ୍ର ପୋଲିସ ଜବତ କରିଛି । ମୁଖ୍ୟ ଅଭିଯୁକ୍ତ ଜିତେନ୍ଦ୍ର ସାହା ଏବଂ ତା'ର ଭାଇ ସୁରଜ ସାହାଙ୍କ ସମେତ 9 ଜଣ ଗିରଫ ହୋଇଥିବା ବେଳେ ଅନ୍ୟ ମାନଙ୍କୁ ଖୁବ ଶୀଘ୍ର ଗିରଫ କରାଯିବ ବୋଲି ରାଉରକେଲା ଏସପି କେ.ଶିବା ସୁବ୍ରମଣି ସାମ୍ବାଦିକ ସମ୍ମିଳନୀରେ କହିଛନ୍ତି ।
ମୃତକ ଜଣକ 2018ରେ ଜଣେ ହତ୍ୟାକାରୀକୁ ମାଡ ମାରିଥିଲେ । ତାର ପ୍ରତିଶୋଧ ନେବା ପାଇଁ ଅଭିଯୁକ୍ତ ମାନେ ଦିଲସାଦକୁ ବାରମ୍ବାର ହତ୍ୟା ଉଦ୍ୟମ କରିବା ପରେ 7 ତାରିଖରେ ହତ୍ୟାକାଣ୍ଡରେ ସଫଳ ହୋଇଥିଲେ ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
