ରାଉରକେଲା: ସମାଜ ଯେତେ ଅଗ୍ରସରତାର ପ୍ରତିଶୃତି ଦେଉଥିଲେ ମଧ୍ୟ ଏବେ ବି ଅନେକ ଲୋକେ ଅନ୍ଧବିଶ୍ବାସ ଘେରରେ । ଯାହାର ଏକ ନଗ୍ନ ଉଦାହରଣ ଦେଖିବାକୁ ମିଳିଛି ଲାଠିକଟା ବ୍ଲକ ଗର୍ଜନ ନିକଟସ୍ଥ ତୁମରଣ ଗାଁରେ । ଯେଉଁଠି ଏହି ଅନ୍ଧବିଶ୍ବାସର ଶିକାର ହୋଇଛି ଗୋଟିଏ 5 ଦିନର କଅଁଳ ନିଷ୍ପାପ ଶିଶୁ ।
ଭିଡିଓ ସୌଜନ୍ୟ: ସମ୍ବାଦଦାତା, ରାଉରକେଲା
ସୂଚନା ଅନୁଯାୟୀ, ଫେବୃଆରୀ 24ତାରିଖ ସନ୍ଧ୍ୟାରେ ରୂପନ କେର୍କେଟଟା ଓ ସୁରଥ କେର୍କେଟଟାଙ୍କର ରାଉରକେଲା ସରକାରୀ ଡାକ୍ତରଖାନାରେ ଏକ ଶିଶୁ କନ୍ୟା ଜନ୍ମ ନେଇଥିଲା । ତେବେ 28 ତାରିଖରେ ଶିଶୁଟି ପେଟରେ ଯନ୍ତ୍ରଣା ଅନୁଭବ କରିବାରୁ ତାକୁ ପାଖ ଏକ ଗାଁକୁ ନିଆଯାଇ ମାତ୍ର5ଦିନର ଏହି ଶିଶୁ ପେଟରେ 10 ଥର ଚେଙ୍କ ଦିଆଯାଇଥିଲା ।
ହେଲେ ଅନ୍ଧବିଶ୍ବାସର ଅନ୍ଧାରରେ ଶିଶୁଟିର ଅବସ୍ଥା ସଙ୍କଟାପନ୍ନ ହେବାରୁ ତାକୁ ତୁରନ୍ତ ଆର୍ଜିଏଚ୍ ଡାକ୍ତରଖାନାରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି । ତେବେ ଏହା ଭୁଲବଶତଃ ହୋଇଥିବା ସଫେଇ ଦେଇଛନ୍ତି ପରିବାର ଲୋକେ ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
