ପୁରୀ: ସେ ହେଉଛନ୍ତି ଜଗତର ନାଥ । ବିଶ୍ବ ବ୍ରହ୍ମାଣ୍ଡର ଅଧିପତି । ସେ ଚାହିଁଲେ ସବୁ ସମ୍ଭବ । ଏମିତି କିଛି କହି ଭଗବାନ ଦୁଆରେ କାନ୍ଦୁଛି ଭକ୍ତ । ମାନସିକ ପୁରା ପାଇଁ ବାଲେଶ୍ବରରୁ ଚାଲି ଚାଲି ଧାଇଁ ଆସିଛି କାଳିଆ ପାଖକୁ । ସ୍ତ୍ରୀଙ୍କୁ ସୁସ୍ଥ କରିବାକୁ ମହାପ୍ରଭୁ ପାଖରେ ଗୁହାରି କରିଛନ୍ତି ଭକ୍ତ ଗୌରୀ ଶଙ୍କର ଦାସ ।
ସୂଚନାଅନୁସାରେ ବାଲେଶ୍ବର ଜିଲ୍ଲାର ଗୌରୀ ଶଙ୍କରଙ୍କ ପତ୍ନୀ ଅସୁସ୍ଥ ଅଛନ୍ତି । ତାଙ୍କୁ ଭଲ କରି ଦେବାକୁ କାଳିଆ ପାଖରେ ବିନତୀ କରିବାକୁ ଚାଲି ଚାଲି ଆସିଛନ୍ତି ଗୌରୀ । ସେ ଗତକାଲି ପୁରୀରେ ପହଞ୍ଚିଥିବାବେଳେ ନରେନ୍ଦ୍ର ପୁଷ୍କରିଣୀରେ ସ୍ନାନ କରି ସେଠାରୁ ଦଣ୍ଡ ପ୍ରଣାମ କରି କରି ସିଂହଦ୍ବାର ପାଖରେ ପହଞ୍ଚିଥିଲେ । କୋଭିଡ କଟକଣା ପାଇଁ ସେ ଅରୁଣ ସ୍ତମ୍ଭ ଛୁଇଁ ନ ପାରି ଦୂରରେ ଥିବା ବ୍ୟାରିକେଡ ପାଖରେ ବସିଥିଲେ ।
ସେ ବହୁତ ହାଲିଆ ହୋଇଯାଇଥିଲେ । ତାଙ୍କ ସ୍ବାସ୍ଥ୍ୟବସ୍ଥା ଦେଖି ଅନେକ ଲୋକ ତାଙ୍କୁ ପାଣି ଦେଇଥିଲେ ହେଲେ ସେ ଟୋପାଏ ବି ପାଣି ଗ୍ରହଣ କରିନଥିଲେ । ଜାଗା ଦୁଆରେ ପହଁଚି ଥିଲେ ବି ଅରୁଣ ସ୍ତମ୍ଭ ଟିକେ ଛୁଇଁ ନ ପାରିବାରୁ ମହାପ୍ରଭୁଙ୍କ ଉପରେ ଅଭିମାନ କରି ଦୀର୍ଘ ସମୟ ଧରି କାନ୍ଦିଥିଲେ ଗୌରୀ ।
ତେବେ ସେବାୟତମାନେ ମହାପ୍ରଭୁଙ୍କ ତୁଳସୀ ଦେଇ ବୁଝାଇବା ପରେ ସେ ବୁଝିଥିଲେ । ତେବେ ପତିତପାବନଙ୍କ ସମ୍ମୁଖରେ ଏହି ଦୃଶ୍ୟ ସମସ୍ତଙ୍କୁ ଭାବୁକ କରିଥିଲା । ଯେ କେହି ବି ଏହି ଦୃଶ୍ୟ ଦେଖିଥିଲା କାନ୍ଦି ପକାଇଥିଲା । ଭଗବାନ ତାଙ୍କ ସ୍ତ୍ରୀକୁ ଭଲ କରି ଦିଅନ୍ତୁ ଓ ଭକ୍ତଙ୍କୁ ଦର୍ଶନ ସୁଯୋଗ ଦିଅନ୍ତୁ ବୋଲି ପ୍ରାର୍ଥନା କରିଥିଲେ ସ୍ଥାନୀୟ ଲୋକ ।
ପୁରୀରୁ ଶକ୍ତି ପ୍ରସାଦ ମିଶ୍ର,ଇଟିଭି ଭାରତ
