ପୁରୀ: ବଡଦାଣ୍ଡରେ ଘଟିଛି ଅଭାବନୀୟ ଘଟଣା । ପର୍ଯ୍ୟଟକଙ୍କୁ ଧକ୍କା ଦେଲା ପିକ୍ଅପ୍ ଭ୍ୟାନ୍ । ୨ ପର୍ଯ୍ୟଟକଙ୍କୁ ଧକ୍କା ଦେଇ ନନ୍ଦିଘୋଷ ରଥ କଡନକୁ ପିଟିଲା ଭ୍ୟାନ୍ । ଆହତ ୨ ପର୍ଯ୍ୟଟକ ପୁରୀ ମେଡିକାଲରେ ଭର୍ତ୍ତି କରାଯାଇଛି । ଡ୍ରାଇଭରକୁ ଅଟକ ରଖିଛି ପୋଲିସ । ପୂର୍ବରୁ ଏହିପରି ହିଟ ଆଣ୍ଡ ରନ ଘଟଣାରେ ସୁଭଦ୍ରାଙ୍କ ରଥ ଗୟଳ ଭାଙ୍ଗି ଯାଇଥିଲା ।
ପିକଅପ୍ ଭ୍ୟାନଟି ଭାରସାମ୍ୟ ହରାଇ ନନ୍ଦିଘୋଷ ରଥ ଆଡ଼କୁ ମାଡି ଯାଇଥିଲା । ଏହା ପରେ 2 ଭକ୍ତଙ୍କୁ ଧକ୍କା ଦେଇଥିଲା । ଯେଉଁଥିରେ ଦୁଇଜଣ ପର୍ଯ୍ୟଟକ ଆହତ ହୋଇଛନ୍ତି । ସେମାନେ ହେଲେ ବୈଜୟନ୍ତୀ ସାହୁ ଏବଂ ଗିରିଶ ସାହୁ । ସେମାନଙ୍କୁ ପୁରୀ ଡାକ୍ତରଖାନାରେ ଭର୍ତ୍ତି କରାଯାଇଛି । ଵୈଜୟନ୍ତୀଙ୍କ ବାମ ଗୋଡ ଭାଙ୍ଗି ଯାଇଥିବାବେଳେ, ଗିରିଶଙ୍କର ହାତରେ ଗୁରୁତର ଆଘାତ ଲାଗିଛି ।
ପିକଅପ୍ ଭ୍ୟାନ ଡ୍ରାଇଭର ଅସିତ କୁମାର ଜେନା ମଧ୍ୟ ଆହତ ହୋଇ ଚିକିତ୍ସିତ ହେଉଛନ୍ତି । ପୋଲିସ ସୂଚନା ଅନୁସାରେ ଡ୍ରାଇଭରକୁ ଫିଟସ୍ ମାରିବାରୁ ଏଭଳି ଭାରସାମ୍ୟ ହରାଇ ଗାଡିଟି ମାଡି ଯାଇଥିଲା । ଆହତଙ୍କ ସମ୍ପର୍କୀୟ ଗାଡିକୁ ଯାଇ ବ୍ରେକ୍ ଦେବାକୁ ଗାଡିଟି ଅଟକିଥିଲା । ଏହି ଘଟଣାରେ ଡ୍ରାଇଭର ଅଟକ ଅଛି । ରଥ ନିର୍ମାଣ ଅଞ୍ଚଳକୁ ନିଷିଦ୍ଧାଞ୍ଚଳ ଘୋଷଣା ପାଇଁ କରିବାକୁ ଦାବି ହୋଇଛି ।
ଇଟିଭି ଭାରତ, ପୁରୀ
