ପୁରୀ: ଆଇସକ୍ରିମ କାଠିରେ ନନ୍ଦିଘୋଷ ରଥର ଅବିକଳ ପ୍ରତିକୃତି । ପୁରୀର ବାସିନ୍ଦା ତଥା ଯୁକ୍ତ ତିନିରେ ପଢୁଥିବା ଛାତ୍ରୀ ସୁସ୍ମିତା ମହାରଣା ତିଆରି କରିଛନ୍ତି ଏହି ଚମତ୍କାର କଳାକୃତି । 2 ହଜାରରୁ ଊର୍ଦ୍ଧ୍ବ ଆଇସିକ୍ରିମ କାଠିରେ ନିର୍ମିତ ଏହି ରଥ ପାଇଁ ତାଙ୍କୁ 7 ଦିନ ସମୟ ଲାଗିଛି । ଛାତ୍ରୀ ଜଣକ ତିଆରି କରିଥିବା ରଥକୁ ଆଜି(ମଙ୍ଗଳବାର) ରଥଖଳା ନିକଟକୁ ଆଣିଥିଲେ । ତାଙ୍କର ଏହି କଳାକୃତିଟିକୁ ଦେଖି ଅନେକ ଲୋକେ ଖୁବ୍ ପ୍ରଶଂସା କରିଛନ୍ତି ।
ବର୍ତ୍ତମାନ ଲକଡାଉନ ଯୋଗୁଁ ସ୍କୁଲ କଲେଜ ବନ୍ଦ ରହିଛି । ଆଉ ଏହି ଲକଡାଉନର ସଦୁପଯୋଗ କରିଛନ୍ତି ସୁସ୍ମିତା । ପରିବାରର ପ୍ରେରଣାରେ ସେ ଆଇସିକ୍ରିମ କାଠିରେ ଏହି ନନ୍ଦିଘୋଷ ରଥ ତିଆରି କରିଛନ୍ତି । ତେବେ ଚଳିତ ବର୍ଷ ସେ କେବଳ ନନ୍ଦିଘୋଷ ରଥ ତିଆରି କରିଥିବାବେଳେ ଆଗାମୀ ବର୍ଷ ତିନିଟି ଯାକ ରଥ ନିର୍ମାଣ କରିବେ ବୋଲି ସୁସ୍ମିତା କହିଛନ୍ତି । ଏଥିସହ ମହାମାରୀ କାରଣରୁ ପୂର୍ବ ବର୍ଷ ବିନା ଭକ୍ତରେ ରଥଯାତ୍ରା ଅନୁଷ୍ଠିତ ହୋଇଥିବାବେଳେ ଏ ବର୍ଷ ମଧ୍ୟ ଅନୁରୂପ ନିର୍ଦ୍ଦେଶ ରହିଛି । ଯାହାକୁ ନେଇ ସେ ଦୁଃଖବ୍ୟକ୍ତ କରିବା ସହ ଆସନ୍ତା ବର୍ଷକୁ ଏଭଳି ସ୍ଥିତି ନ ରହୁ ବୋଲି ସୁସ୍ମିତା ମହାପ୍ରଭୁଙ୍କ ନିକଟରେ ପ୍ରାର୍ଥନା କରିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
