ଭୁବନେଶ୍ବର: ଶ୍ରୀଜଗନ୍ନାଥ ଜମିରେ ବେଆଇନ ପଥର ଖଣି ଖନନ । ଲୁଟୁଥିଲେ ଖଣି ମାଫିଆ ଓ ଜମି ଦଲାଲ । ଖୋର୍ଦ୍ଧା ତାପଙ୍ଗ ଅଞ୍ଚଳରେ ଥିବା ଶ୍ରୀଜଗନ୍ନାଥ ଜମିରେ ଏଭଳି ବେଆଇନ ପଥର ଖଣି ଖନନ ଅଭିଯୋଗରେ ଜଣେ ଦଲାଲକୁ ଗିରଫ କରିଛି ଏସଟିଏଫ।
ଏହି ପଥର ମାଫିଆ ଓ ଖଣି ମାଫିଆଙ୍କ ମଧ୍ୟରେ ଥିଲା ବଡ ଲିଙ୍କ୍। କେଉଁ ଖଣିରୁ ଖନନ ପରେ କେଉଁ ପଥର ମାଫିଆ କେଉଁଠି ବିକ୍ରି କରିବେ ସେସବୁର ବୁଝାସୁଝା କରୁଥିଲେ ଏହି ଦଲାଲ । ଗିରଫ ଦଲାଲ ଜଣକ ହେଲେ ରାଜେଶ କୁମାର ବରାଳ ଓରଫ ପିଣ୍ଟା । ତା ଘର କୁମ୍ଭାରବସ୍ତ ଖୋର୍ଦ୍ଧାରେ । ଗିରଫ ପରେ ଏସଟିଏଫ ଜାଣିବାକୁ ପାଇଛି ରାଜେଶର ଇତିହାସ । ତା ନାଁରେ ରହିଛି ଅନେକ ମାମଲା । ସହିଦନଗର ଥାନାରେ ଏନଡିପିଏସ ବା ମାଦକ ଦ୍ରବ୍ୟ କାରବାରଠୁ ଆରମ୍ଭ କରି ବେଆଇନ ବନ୍ଧୁକ ରଖିବା ଏଥିସହ ଖୋର୍ଦ୍ଧା ଥାନାରେ 3ଟି ମାମଲା ରୁଜୁ ହୋଇଛି ।
ପିଣ୍ଟାକୁ ଆପିସିର ଧାରା ୩୭୯/୪୧୧/୪୬୭/୪୬୮/୪୭୧/୧୨୦(B),୩୪ଓ ଆର୍ମସ ଆକ୍ଟ ୨୫/୨୭ ସହ ଏକ୍ସପୋଲସିଭ ଆକ୍ଟ ୩/୪/୫ରେ ଗିରଫ କରି କୋର୍ଟ ଚାଲାଣ କରାଯାଇଛି । ଘଟଣାରେ ଗିରଫ ମୁଖ୍ୟ ଦଲାଲ ପାଖରୁ ଅନେକ ତଥ୍ୟ ଖୋଲିବା ପାଇଁ ଅଭିଯୁକ୍ତକୁ ୫ ଦିନିଆ ରିମାଣ୍ଡରେ ନେବାକୁ କୋର୍ଟକୁ ଆବେଦନ କରିଛି ଏସଟିଏଫ ଟିମ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
