ପୁରୀ: ଗଭୀର ସମୁଦ୍ରରେ ଝଡକୁ ସାମ୍ନା କରି ବ୍ରହ୍ମଗିରି ଖିରିସାହିରୁ ଆଣ୍ଡାମାନର ନାବିକ ଉଦ୍ଧାର ହେବା ପରେ ତାଙ୍କୁ ଚିକିତ୍ସାଳୟରେ ଭର୍ତ୍ତି କରାଯାଇଛି । ପେଟରେ ଗ୍ୟାସ ସମସ୍ୟା ଯୋଗୁଁ ତାଙ୍କର ସ୍ବାସ୍ଥ୍ୟାବସ୍ଥା ସାମାନ୍ୟ ବିଗିଡ଼ି ଯିବାରୁ ଆଜି ତାଙ୍କୁ ପୁରୀ ମେଡ଼ିକାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି।
ତେବେ ଅମିତଙ୍କ ସ୍ବାସ୍ଥ୍ୟାବସ୍ଥା ଭଲ ରହିଛି ବୋଲି କହିଛନ୍ତି ଚିକିତ୍ସା କରୁଥିବା ଡାକ୍ତର। ସମୁଦ୍ର ଭିତରେ ଭୋକ ଉପାସରେ କେଵଳ ଲୁଣି ସମୁଦ୍ର ପାଣି ପିଇ ଅମିତ ବଞ୍ଚିବା ପ୍ରସଙ୍ଗକୁ ନେଇ ଡାକ୍ତର ମତ ରଖିଛନ୍ତି।
ଡାକ୍ତରଙ୍କ କହିବା କଥା, କେବଳ ଅଳ୍ପ ଅଳ୍ପ ସମୁଦ୍ର ପାଣି ପିଇ ବଞ୍ଚିହେବ। କାରଣ ସମୁଦ୍ର ଜଳ ପ୍ରଦୂଷିତ ନୁହେଁ। ଏଣୁ ଅମିତଙ୍କ କ୍ଷେତ୍ରରେ ତାହା ହୋଇଛି। ତେବେ ଆସନ୍ତାକାଲି ଅମିତଙ୍କୁ ଫ୍ଲାଇଟ ଯୋଗେ ବେଙ୍ଗାଲୁରୁ ପଠାଯିବ। ସେଠାରୁ ଆଣ୍ଡାମାନର ରାଜଧାନୀ ପୋର୍ଟବ୍ଲେୟାର ଅଭିମୁଖେ ଥିବା ବିମାନରେ ସେ ଯିବେ। ଏନେଇ ପୁରୀ ଜିଲ୍ଲା ପ୍ରଶାସନ ସମସ୍ତ ପ୍ରସ୍ତୁତି କରିଛି। ତେବେ ଅମିତ ତାଙ୍କ ପରିବାର ଲୋକଙ୍କୁ ଭେଟିବାକୁ ଚାହିଁ ବସିଥିବା କହିଛନ୍ତି।
ସୂଚନା ଅନୁଯାୟୀ ଗତ 25 ତାରିଖରେ ଅମିତ ତାଙ୍କ ବୋଟ ସହିତ ବ୍ରହ୍ମଗିରି ଖିରିସାହି ସମୁଦ୍ର କୂଳରେ ଲାଗିଥିଲେ। ତେବେ ସେ ସମୁଦ୍ର ପଥରେ ଝଡ଼ ବାତ୍ୟାର ସମ୍ମୁଖୀନ ହୋଇ ଦିଶା ହୀନ ଭାବେ ଦୀର୍ଘ 26 ଦିନ ହେବ ସମୁଦ୍ରରେ ମଝିରେ ଥିଲେ । ଏହି ସମୟରେ ଖାଦ୍ୟ ନ ଥିବାରୁ ସମୁଦ୍ର ଲୁଣି ପାଣି ପିଇ ସେ ବଞ୍ଚିଥିବା ସେ କହିଛନ୍ତି। ଯାହାକୁ ନେଇ ଚର୍ଚ୍ଚା ହେବା ପରେ ତାଙ୍କୁ ଆଉ ଏକ ଜନ୍ମ ମିଳିଥିବା କୁହାଯାଉଛି। ଆଣ୍ଡାମାନର ଏକ ଦ୍ବୀପ ରୁ ଅନ୍ୟ ଏକ ଦ୍ବୀପ କୁ ଡଙ୍ଗା ଯୋଗେ ସେ ରାସନ ସାମଗ୍ରୀ ନେଇ ପହଞ୍ଚାଇଥାନ୍ତି। ତେବେ ସମୁଦ୍ର ରେ ଆସିବା ବେଳେ ଝଡ଼ ବାତ୍ୟା ଯୋଗୁଁ ସେ ଦିଶାହୀନ ହୋଇଥିଲେ।
ପୁରୀରୁ ଶକ୍ତିପ୍ରସାଦ ମିଶ୍ର, ଇଟିଭି ଭାରତ
