ପୁରୀ: ଦ୍ବିତୀୟ ପର୍ଯ୍ୟାୟରେ ଶ୍ରୀମନ୍ଦିରର ସେବାୟତ ଓ ତାଙ୍କ ପରିବାରକୁ ହୋମିଓପାଥିକ ଔଷଧ ପ୍ରଦାନ କରାଯାଇଛି । ଦେହରେ ରୋଗ ପ୍ରତିରୋଧକ ଶକ୍ତି ବଢିବା ଉଦ୍ଦେଶ୍ୟରେ ଏହି ହୋମିଓପାଥିକ ଔଷଧ ସେବାୟତଙ୍କୁ ପ୍ରଦାନ କରାଯାଇଛି ।
ଆୟୁଷ ମନ୍ତ୍ରଣାଳୟ ଅଧୀନରେ ଥିବା ପୁରୀର ହୋମିଓପାଥିକ କ୍ଷତ୍ରିୟ ଅନୁସନ୍ଧାନ ସଂସ୍ଥା ପକ୍ଷରୁ ଏହି ଔଷଧ ଯୋଗାଇ ଦିଆଯାଉଛି । ପୂର୍ବରୁ ଏହି ସଂସ୍ଥା ପକ୍ଷରୁ ଜୁନ 9 ରୁ 13 ତାରିଖ ଯାଏଁ ପ୍ରଥମ ପର୍ଯ୍ୟାୟରେ ଏକ ସ୍ବତନ୍ତ୍ର କ୍ୟାମ୍ପ ଅନୁଷ୍ଠିତ କରାଯାଇ ଔଷଧ ବଣ୍ଟନ କରାଯାଇଥିଲା । ଏଥିରେ 5 ହଜାରରୁ ଅଧିକ ସେବାୟତ ଓ ତାଙ୍କ ପରିବାରକୁ ଔଷଧ ପ୍ରଦାନ କରାଯାଇଥିଲା ।
ତେବେ କୋରୋନା ସଂକ୍ରମଣ ରୋକିବା ତଥା କାଶ, ଥଣ୍ଡା ନହେବା ଏବଂ ଶରୀରର ରୋଗ ପ୍ରତିରୋଧକ ଶକ୍ତି ବଢାଇବା ପାଇଁ ଏହି ଔଷଧ ପ୍ରଦାନ କରାଯାଉଛି । ଆର୍ସେନିକ 30 ନାମକ ଏହି ହୋମିଓପାଥିକ ଔଷଧ ପ୍ରଦାନ କରାଯାଇଛି । ଆୟୁଷ ମନ୍ତ୍ରଣାଳୟ ଦ୍ବାରା ଏହି ଔଷଧର ଗବେଷଣା କରାଯିବା ପରେ ପ୍ରଦାନ ହେଉଛି । ତେବେ ସାଧାରଣ ଲୋକ ମଧ୍ୟ ପୁରୀର ଗୋପାଳ ବଲ୍ଲବ ରୋଡ଼ ଏବଂ ମରିଚି କୋଟ ଛକରେ ଥିବା ହୋମିଓପାଥିକ କ୍ଷତ୍ରିୟ ଅନୁସନ୍ଧାନ ଅନୁଷ୍ଠାନରୁ ମାଗଣାରେ ମେଡ଼ିସିନ ନେଇପାରିବେ ବୋଲି ଅନୁଷ୍ଠାନ ପକ୍ଷରୁ ସୂଚନା ଦିଆଯାଇଛି ।
ପ୍ରକାଶ ଥାଉକି, ରାଜ୍ୟରେ ଦିନକୁ ଦିନ କୋରୋନା ସ୍ଥିତି ଗମ୍ଭୀର ହେଉଥିବା ବେଳେ ଶୁକ୍ରବାର ପୁରୀରେ 9 ଜଣ ପଜିଟିଭ ଚିହ୍ନଟ ହୋଇଛନ୍ତି । ଏଥିସହ ଜିଲ୍ଲାରେ ମୋଟ ପଜିଟିଭ ସଂଖ୍ୟା 383 ହୋଇଥିବା ବେଳେ ତନ୍ମଧ୍ୟରୁ 294 ଜଣ ସୁସ୍ଥ ଓ 2 ଜଣଙ୍କ ମୃତ୍ୟୁ ହୋଇଛି । ସେହିପରି ଚଳିତବର୍ଷ କୋରୋନା ପ୍ରାଦୁର୍ଭାବକୁ ଦୃଷ୍ଟିରେ ରଖି ବହୁ କଟକଣା ସହ ବିନା ଭକ୍ତରେ ପୁରୀରେ ରଥଯାତ୍ରାର ସମସ୍ତ ନୀତିକାନ୍ତି ଅନୁଷ୍ଠିତ ହୋଇଥିଲା ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
