ପୁରୀ: ସହରରେ ଉଚ୍ଛେଦ ପ୍ରକ୍ରିୟାକୁ ନେଇ ଧାରଣା । ଶତାଧିକ ମହିଳା ଓ ପୁରୁଷ ଶ୍ରୀମନ୍ଦିର ସୁରକ୍ଷା ନେଇ ୭୫ମିଟର ଉଚ୍ଛେଦକୁ ନେଇ ଆରମ୍ଭ କରାଯାଇଥିବା ଡିଜିପିଏସ୍ ମାଧ୍ୟମରେ ସର୍ଭେକୁ ବିରୋଧ କରିବା ସହ ରାଜରାସ୍ତାକୁ ଓହ୍ଲାଇଛନ୍ତି ।
ଏନେଇ ଆନ୍ଦୋଳନକାରୀ ଗାଣ୍ଡୁଆ ଚଉରା ଛକରେ ଧାରଣାରେ ବସି ପ୍ରତିବାଦ କରୁଥିବା ବେଳେ ବିଧାୟକ ଜୟନ୍ତ ଷଡ଼ଙ୍ଗୀ ସାମିଲ ହୋଇଥିଲେ । ପ୍ରଶାସନର ଏଭଳି ଉଚ୍ଛେଦ ପ୍ରକ୍ରିୟାକୁ ବିରୋଧ କରି ବିଧାୟକଙ୍କ ନେତୃତ୍ବରେ ସେ ଜିଲ୍ଲାପାଳଙ୍କୁ ଭେଟିଛନ୍ତି । ଏପରିକି ବୁଲ ଡୋଜର ଆଗରେ ଜୀବନ ଦେବାକୁ ସେ ପ୍ରସ୍ତୁତ ଥିବା କହିଛନ୍ତି ।
ଗୋଟିଏ ପଟେ ମରିବୁ ପଛେ ଭିଟାମାଟି ଛାଡିବୁ ନାହିଁ ବୋଲି ବିସ୍ଥାପିତ ମହିଳା ଜିଲ୍ଲାପାଳଙ୍କୁ କହିଥିବା ବେଳେ ସେପଟେ ସହମତି ଭିତ୍ତିରେ ଆଲୋଚନା କରି କାର୍ଯ୍ୟ କରାଯିବ ବୋଲି ଜିଲ୍ଲାପାଳ କହିଛନ୍ତି । ଶ୍ରୀମନ୍ଦିର ପଶ୍ଚିମ ପାର୍ଶ୍ବରେ ରହିଥିବା ଶତାଧିକ ମହିଳା ଓ ପୁରୁଷ ଓହ୍ଲାଇଛନ୍ତି ରାଜରାସ୍ତାକୁ ।
ଆଜି ଦୀର୍ଘ ସମୟଧରି ପୁରୀ ଜିଲ୍ଲାପାଳଙ୍କ ଅଫିସରେ ଧାରଣା ଦେଇଥିଲେ ପୁରୀରେ ନିଜ ସାତପୁରୁଷ ଭିଟାମାଟିରେ ରହିଥିବା ଲୋକେ । ଯେଉଁମାନେ କି ଫନି ବାତ୍ୟା ପରେ ଘର ସଜାଡି ଜୀବନ ଜିଉଁଛନ୍ତି । ଏଭଳି ଏକ ଘଡିସନ୍ଧି ମୂହୁର୍ତ୍ତରେ ପ୍ରଶାସନର ଅମାନବୀୟ କାର୍ଯ୍ୟକୁ ବରଦାସ୍ତ କରାଯିବ ନାହିଁ । ତେଣୁ ମରିବୁ ପଛେ ଭିଟାମାଟି ଛାଡିବୁ ନାହିଁ ବୋଲି ବିସ୍ଥାପିତ ରଣହୁଙ୍କାର ଦେଇଛନ୍ତି ।
ସେପଟେ ସ୍ଥାୟୀ ବାସୀନ୍ଦାଙ୍କ ଘର ଉଚ୍ଛେଦ ନହେଉ । ବିସ୍ଥାପିତଙ୍କ ସହ ଆଲୋଚନା ପରେ ପ୍ରତିକ୍ରିୟା ଦେଇଛନ୍ତି ଜିଲ୍ଲାପାଳ । ସରକାରଙ୍କ କାର୍ଯ୍ୟ ଅବଶ୍ୟ କରାଯିବ। କିନ୍ତୁ ସେମାନଙ୍କ ସହ କେବଳ ଥରେ ନୁହେଁ ଆବଶ୍ୟକ ପଡିଲେ ଚାରି ଚାରି ଥର ଆଲୋଚନା କରି ସହମତି ଭିତ୍ତିରେ କାର୍ଯ୍ୟ କରାଯିବ ବୋଲି ଜିଲ୍ଲାପାଳ କହିଛନ୍ତି ।
ପୁରୀରୁ ଶକ୍ତିପ୍ରସାଦ ମିଶ୍ର, ଇଟିଭି ଭାରତ
