ପୁରୀ: କୋଣାର୍କ ଲିଆଖିଆ ବ୍ରିଜ ଦୁର୍ଘଟଣାକୁ ନେଇ ସ୍ପଷ୍ଟୀକରଣ ଦେଇଛନ୍ତି ପୁରୀ ଏସପି । ଦୁର୍ଘଟଣାର ପାରିପାଶ୍ବିକ ସ୍ଥିତିକୁ ନେଇ ଏହା ହତ୍ୟାକାଣ୍ଡ ବୋଲି ସନ୍ଦେହ କରାଯାଉଥିଲା । ହେଲେ ଏହା କୌଣସି ହତ୍ୟାକାଣ୍ଡ ନୁହେଁ ବରଂ ଦୁର୍ଘଟଣା ବୋଲି କହିଛନ୍ତି ପୁରୀ ଏସପି । ପ୍ରାଥମିକ ତଦନ୍ତରୁ ଏହି ରିପୋର୍ଟ ସାମ୍ନାକୁ ଆସିଛି ।
ଭିଡିଓ ସୌଜନ୍ୟ: ସମ୍ବାଦଦାତା, ପୁରୀ
ଏକ କାର ଦ୍ରୁତଗତିରେ ଆସି ବାଇକକୁ ଧକ୍କା ଦେବାରୁ ମୃତକଙ୍କ ମୁଣ୍ଡ ଶରୀରରୁ ଅଲଗା ହୋଇ ଯାଇଛି ବୋଲି ଏସପି କହିଛନ୍ତି । ତେବେ ଦୁର୍ଘଟଣା ଘଟାଇ ଥିବା କାରକୁ ଚିହ୍ନଟ କରାଯାଇଛି। ଖୁବଶୀଘ୍ର ଡ୍ରାଇଭର ଧରାଯିବ ବୋଲି ସେ କହିଛନ୍ତି ।
ମଙ୍ଗଳବାର ରାତିରେ ରାମଚଣ୍ଡୀ ଥାନା ଲିଆଖିଆ ବ୍ରିଜ ନିକଟରେ ଏକ ଭୟଙ୍କର ଦୁର୍ଘଟଣା ଘଟିଥିଲା। ଯେଉଁଥିରେ ବାଇକ ଚାଳକ ଉମାଶଙ୍କର ରାୟ ପ୍ରାଣ ହରାଇ ଥିବା ବେଳେ ତାଙ୍କ ମୁଣ୍ଡଟି ଶରୀରରୁ ଅଲଗା ହୋଇଯାଇଥିଲା । ଏହା ଏକ ହତ୍ୟାକାଣ୍ଡ ବୋଲି ସନ୍ଦେହ ସୃଷ୍ଟି ହୋଇଥିଲା । ତେବେ ଏହି ଘଟଣା ରେ ପୋଲିସ ତଦନ୍ତ ଜାରି ରଖିଛି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
