ପୁରୀ: ଦାଦାଵଟିକୁ ନେଇ ବୋମା ମାଡ଼। ଦାଦାବଟି ଆଦାୟକୁ କେନ୍ଦ୍ର କରି କଣାସ ଥାନା ଅନ୍ତର୍ଗତ ବଡାସ ପଞ୍ଚାୟତର ମହିଳା ସରପଞ୍ଚଙ୍କ ଘର ଉପରକୁ ବୋମା ମାଡ କରାଯାଇଛି । ଏହା ପରେ ପୋଲିସ 3 ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି। ଅଭିଯୁକ୍ତ ମାନଙ୍କ ନିକଟରୁ ପୋଲିସ ବାଇକ ଓ ବନ୍ଧୁକ ଜବତ କରିଛି।
ସୂଚନା ଅନୁସାରେ ପୁରୀ ଜିଲ୍ଲା କଣାସ ବ୍ଲକ ଅନ୍ତର୍ଗତ ବଡାସ ମହିଳା ସରପଞ୍ଚ ରୀତା ପଲେଇଙ୍କ ସ୍ବାମୀକୁ ବାରମ୍ବାର ଦାଦାବଟି ମାଗି ନିରାଶ ହୋଇଥିଲେ ଅଭିଯୁକ୍ତ । ଏହା ପରେ ଅଭିଯୁକ୍ତ ମାନେ ଗତ 5 ତାରିଖ ରାତିରେ ଘର ଉପରକୁ ବୋମା ମାଡ କରିବା ସହ ପଞ୍ଚାୟତ କାର୍ଯ୍ୟାଳୟରେ ବୋମା ମାଡ କରି ଫେରାର ହୋଇଯାଇଥିଲେ । ଅଭିଯୁକ୍ତ ମାନଙ୍କୁ ଗିରଫ କରିବା ପାଇଁ ପୋଲିସ 3 ଟି ଟିମ୍ ଗଠନ କରି ବିଭିନ୍ନ ସ୍ଥାନରେ ଚଢାଉ କରିଥିଲା। କଣାସ ପୋଲିସ ଅଭିଯୁକ୍ତ ମାନଙ୍କୁ ଗିରଫ କରି ବୁଧବାର କୋର୍ଟ ଚାଲାଣ କରିଛି ।
ଅଭିଯୁକ୍ତ ମାନଙ୍କ ନାମରେ ବିଭିନ୍ନ ଥାନାରେ ବହୁ ମାମଲା ରହିଥିବା ବେଳେ ତାଙ୍କ ଜାମିନ ନାମଞ୍ଜୁର ହେବାପରେ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ସେପଟେ ଅଭିଯୁକ୍ତ ଗିରଫ ହୋଇଥିଲେ ମଧ୍ୟ ଏବେ ବି ସରପଞ୍ଚଙ୍କୁ ଧମକ ଦିଆଯାଉଥିବା ଅଭିଯୋଗ ହୋଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
