ବ୍ରହ୍ମଗିରି: ଆରମ୍ଭ ହୋଇଛି ପ୍ରଭୁ ଅଲାରନାଥଙ୍କ ପବିତ୍ର ଝୁଲଣ ଯାତ୍ରା । ଜଗନ୍ନାଥ ସଂସ୍କୃତି ସହ ଜଡ଼ିତ ପ୍ରଭୁ ଅଲାରନାଥଙ୍କ ଝୁଲଣ ଯାତ୍ରା ଶନିବାର ଠାରୁ ଆରମ୍ଭ ହୋଇ 5ଦିନ ଧରି ଚାଲିବ । ମହା ଆଡମ୍ବରରେ ଶ୍ରାବଣ ମାସ ଶୁକ୍ଳ ଦଶମୀ ଠାରୁ ପୂର୍ଣ୍ଣମୀ ପର୍ଯ୍ୟନ୍ତ ଏହି ଯାତ୍ରା ଅନୁଷ୍ଠିତ ହେବ ।
ଶନିବାର ମଧ୍ୟାହ୍ନ ଧୂପ ପରେ, ମନ୍ଦିର ପରିସରରେ ଥିବା ଝୁଲଣ ପିଣ୍ଡିରେ ହୋମ କରାଯାଇଥିଲା । ସନ୍ଧ୍ୟା ଧୂପ ପରେ ଚଳନ୍ତି ପ୍ରତିମା ମଦନ ମୋହନ, ମା ଲକ୍ଷ୍ମୀ ଓ ସରସ୍ବତୀ ଝୁଲଣ ବେଦିକୁ ବିଜେ କରିଥିଲେ । ସେବାୟତ ମାନେ ବାହୁ ବିଜେରେ ମନ୍ଦିର ପରିକ୍ରମା କରାଇ ଝୁଲଣ ବେଦିରେ ବିଜେ କରାଇଥିଲେ ।
ସୁସଜ୍ଜିତ ଦୋଳିରେ ପ୍ରଭୁ ଝୁଲି ଥିଲେ । ମନ୍ଦିର ପ୍ରଶାସନ ପକ୍ଷରୁ 5ଦିନ ଧରି ସାଂସ୍କୃତିକ କାର୍ଯ୍ୟକ୍ରମରେ ପାଲା, ଗୋଟିପୁଅ ଓ ଓଡ଼ିଶୀ ନୃତ୍ୟ ପରିବେଷଣ କରାଯିବ । ରାତିରେ ଝୁଲୁଥିବା ପ୍ରଭୁଙ୍କ ପାଖରେ ମାଣ୍ଡୁଅ, ଖଣ୍ଡ ଉଖୁଡା଼ ଓ ଫଳ ଲାଗି କରାଯାଇ ଠାକୁର ମାନଙ୍କୁ ମନ୍ଦିର ଭିତରକୁ ନିଆଯିବ। ଏହାପରେ ବଡ଼ସିଂହାର ବେଶ ହେବ ।
ବ୍ରହ୍ମଗିରିରୁ ଦେବାଶିଷ ଦାସ, ଇଟିଭି ଭାରତ
