ପୁରୀ: ଆରମ୍ଭ ହୋଇଛି କାର୍ତ୍ତିକ ମାସ । ଏଥିପାଇଁ ଚଳଚଞ୍ଚଳ ଶ୍ରୀକ୍ଷେତ୍ର ପୁରୀ। ହବିଷ୍ୟାଳି ଶ୍ରୀକ୍ଷେତ୍ରରେ ନିଜର ହବିଷ ବ୍ରତ ପାଳୁଥିବାବେଳେ ଏଥିପାଇଁ ଉତ୍ସବମୁଖର ହୋଇ ଉଠିଛି ପୁରୀ ଧାମ। କାର୍ତ୍ତିକ ମାସରେ ମହାପ୍ରଭୁଙ୍କ ସ୍ବତନ୍ତ୍ର ନୀତିକାନ୍ତି ସବୁଦିନ ଶ୍ରୀମନ୍ଦିରରେ ଅନୁଷ୍ଠିତ ହୋଇଥାଏ।
ଶ୍ରୀକ୍ଷେତ୍ରରେ ବାର ମାସରେ ତେର ପର୍ବ। ଏଥି ମଧ୍ୟରୁ ପବିତ୍ର କାର୍ତ୍ତିକ ମାସ ଅନ୍ୟତମ। ପୁରାଣର ବର୍ଣ୍ଣନା ଅନୁସାରେ କାର୍ତ୍ତିକ ମାସ ହେଉଛି ଧର୍ମ ମାସ । ତେବେ ଏହି ଧର୍ମ ମାସରେ ରାଜ୍ୟର କୋଣ ଅନୁକୋଣରୁ ହଜାର ହଜାର ଶ୍ରଦ୍ଧାଳୁ ଏବେ ଶ୍ରୀକ୍ଷେତ୍ରକୁ ଆଗମନ କରୁଛନ୍ତି । ରତ୍ନ ସିଂହାସନରେ ମହାପ୍ରଭୁଙ୍କ ଦର୍ଶନ ସହ ମହାପ୍ରସାଦ ପାଇ ଆନନ୍ଦ ମନରେ ଫେରୁଛନ୍ତି ଶ୍ରଦ୍ଧାଳୁ। କାର୍ତ୍ତିକ ମାସରେ ମହାପ୍ରଭୁଙ୍କ ସ୍ବତନ୍ତ୍ର ନୀତିକାନ୍ତି ସବୁଦିନ ଶ୍ରୀମନ୍ଦିରରେ ଅନୁଷ୍ଠିତ ହୋଇଥାଏ। ସେଥିମଧ୍ୟରୁ ବାଳ ଭୋଗ ନୀତି ଅନୁଷ୍ଠିତ ହୋଇଥାଏ। ସେପଟେ କାର୍ତ୍ତିକ ମାସର ପଞ୍ଚୁକ ଯାଏଁ ମହାପ୍ରଭୁ ରାଧା ଦାମୋଦର ବେଶରେ ଭକ୍ତଙ୍କୁ ଦର୍ଶନ ଦିଅନ୍ତି।
କାର୍ତ୍ତିକ ବ୍ରତ ପାଇଁ ଏବେ ଶ୍ରୀକ୍ଷେତ୍ରରେ ହଜାର ହଜାର ହବିଷ୍ୟାଳି। ସକାଳୁ ସକାଳୁ ପଞ୍ଚତୀର୍ଥରେ ସ୍ନାନ ସହ ଚଉରା ମୂଳେ ରାଇ ଦାମୋଦର ପୂଜା ସମେତ ସନ୍ଧ୍ୟାବେଳେ ଆକାଶ ଦୀପ ପ୍ରଦାନ, ମହାପ୍ରସାଦ ସେବନ କରି କାର୍ତ୍ତିକ ବ୍ରତ ପାଳନ କରୁଛନ୍ତି ହବିଷ୍ୟାଳି। ଆଉ ହବିଷ୍ୟାଳିଙ୍କ ସୁବିଧା ପାଇଁ ଚଳିତ ବର୍ଷ ରାଜ୍ୟ ସରକାରଙ୍କ ଶିବିରରେ 2 ହଜାର 565 ହବିଷ୍ୟାଳି ରହୁଛନ୍ତି। ଏହି ଶିବିରରେ ମାଗଣାରେ ରହିବା ସହ ମହାପ୍ରସାଦ ସେବନ, ଶ୍ରୀଜୀଉଙ୍କ ଦର୍ଶନର ବି ବ୍ୟବସ୍ଥା ରହିଛି।
ପୁରୀରେ ଏବେ ହବିଷ୍ୟାଳିଙ୍କ ଭିଡ ଲାଗି ରହିଥିବାବେଳେ ସନ୍ଧ୍ୟାରେ ଶିବିରରେ ଭଜନ, କୀର୍ତ୍ତନ, ପାଲା, ଦାସ କାଠିଆ ଆଦି ଅନୁଷ୍ଠିତ ହେଉଛି। ଯାହାକି ବେଶ ଆନନ୍ଦ ଦେଇଛି ହବିଷ୍ୟାଳିଙ୍କୁ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
