ପୁରୀ/ଜଗତସିଂହପୁର: ବଙ୍ଗୋପ ସାଗରରେ ଲଘୁଚାପ ଫଳରେ ଉପକୂଳ ଓଡିଶାରେ ପ୍ରବଳ ବର୍ଷା ଲାଗି ରହିଛି । ତେବେ ପୁରୀରେ ବୁଧବାର ସକାଳୁ ଲାଗି ରହିଛି ବର୍ଷା ।
ଅପରାହ୍ନରେ ପ୍ରବଳ ବର୍ଷା ଦେଖିବାକୁ ମିଳିଥିଲା । ଫଳରେ ରାସ୍ତା ଘାଟ ପାଣିରେ ବୁଡି ରହିଥିଲା । ବାଧାପ୍ରାପ୍ତ ହୋଇଥିଲା ଯାତାୟତ । ତେବେ ସନ୍ଧ୍ୟାରୁ ବର୍ଷା ବନ୍ଦ ହୋଇଥିଲେ ହେଁ ପୁରୀ ସହରର ତଳିଆ ଅଞ୍ଚଳରେ କିନ୍ତୁ ଜଳ ନିଷ୍କାସନ ହୋଇ ପାରିନାହିଁ । ଫଳରେ ମାଟି ତୋଟା, ସିଦ୍ଧ ମହାବୀର, ରେଲୱେ କଲୋନୀ, ସୁଜାତା ନଗର, ବଳିଆ ପଣ୍ଡା ବସ୍ତିରେ ବର୍ଷା ଜଳ ଜମି ରହିଛି । ଯେଉଁ କାରଣରୁ ଲୋକେ ନାହିଁ ନଥିବା ଅସୁବିଧା ଭୋଗିଛନ୍ତି ।
ସେପଟେ ପୁରୀ ବଡ଼ ଦାଣ୍ଡର ମାର୍କେଟ ଛକରୁ ମେଡ଼ିକାଲ ଛକ ପର୍ଯ୍ୟନ୍ତ ଆଣ୍ଠୁଏ ଉଚ୍ଚର ପାଣି ଜମି ଯିବାରୁ ଯାତାୟତରେ ସମସ୍ୟା ଉପୁଜିଥିଲା । ବର୍ଷା ଛାଡିବା ପରେ ଜଳ ନିଷ୍କାସନ ହେବାରୁ ଯାତାୟତ ସ୍ବାଭାବିକ ହୋଇଥିଲା । ତେବେ ବର୍ଷାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ପ୍ରସ୍ତୁତ ରହିଛି । ପୁରୀ ସହରରେ ଯେପରି ଜଳ ବନ୍ଦୀ ପରିସ୍ଥିତି ନଉପୁଜେ ସେ ନେଇ ମୋଟର ପମ୍ପରେ ପାଣି ନିଷ୍କାସନ ସହ ଆବଶ୍ୟକ ବ୍ୟବସ୍ଥା କରାଯାଇଛି ।
ସେପଟେ ଜଗତସିଂହପୁରରେ ମଧ୍ୟ ଦେଖିବାକୁ ମିଳିଥିଲା ସମାନ ଅବସ୍ଥା । ଦିନ ତମାମ ଅବିଶ୍ରାନ୍ତ ବର୍ଷା ହେବା ଫଳରେ ପ୍ରଭାବିତ ହୋଇଛି ଜନଜୀବନ । ସକାଳୁ ଲଗାଣ ବର୍ଷା, ଲାଗି ରହିବା ଫଳରେ ବିଭିନ୍ନ ସରକାରୀ ଓ ବେସରକାରୀ କାର୍ଯ୍ୟାଳୟ, ଜିଲ୍ଲାପାଳଙ୍କ କାର୍ଯ୍ୟାଳୟ, ଜନଶୂନ୍ୟ ହେବା ସହ ବିଭିନ୍ନ ସ୍କୁଲ, କଲେଜ, ଦୋକାନ ବଜାର ଆଦି ପ୍ରଭାବିତ ହୋଇଥିଲା ।
କିଛି ବେସରକାରୀ ସ୍କୁଲ ବୁଧବାର ଛୁଟି ଘୋଷଣା କରିଥିଲେ । ଜଗତସିଂହପୁର, ପାରାଦ୍ବୀପ, କୁଜଙ୍ଗ, ତ୍ରିତଲ, ରଘୁନାଥପୁର, ବିରିଡ଼ି, ନାଉଙ୍ଗା ଅଞ୍ଚଳରେ ପ୍ରବଳ ବର୍ଷା ଲାଗି ରହିଥିଲା । ଏହାକୁ ନେଇ ଜିଲ୍ଲା ପ୍ରଶାସନ ସଜାଗ ରହିଥିବା ଜିଲ୍ଲା ଜରୁରୀକାଳୀନ ଅଧିକାରୀ କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର ଓ ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
